Тооноор листэд орсон гишүүдээсээ МАН гашуун сургамж авчээ

МАН-ын талцал зодоон түр зуур намжиж, ямартай ч нам гэрээ шинэчлэн заслаа. Дөрвөн өдрийн турш хуралдсан МАН-ынхны зүгээс листээр УИХ-д орсон гишүүддээ нэлээд хатуухан үг дайсан гэнэ.

Жагсаалтын нэгд бичигдсэн Г.Лувсанжамц, Х.Баасанжаргал, А.Ариунзаяа, О.Саранчулуун, С.Эрдэнэбат, М.Мандхай, Б.Уянга, Ч.Анар, О.Номинчимэг нарыг намын гишүүдтэйгээ мэндэлдэггүй, намынхнаа огт тоодоггүй, хувь улс төр хийдэг гэсэн шүүмжлэлийг МАН-ын ахмад гишүүд хэлсэн байна.

УИХ-ын 2024 оны сонгуульд МАН баахан бор халзан хонь нэр дэвшүүлсэн нь үнэндээ хонины арьс нөмөрсөн чоно болохоо таниулсан. МАН-д бүү хэл Монголд огт ажиллаж байгаагүй хүмүүсийг гадаадаас авчирч, ногоон гэрлээр УИХ-ын гишүүн болгосон нь угтаа Л.Оюун-Эрдэнэ, Д.Амарбаясгалан нарын утсан хүүхэлдэй нараа бэлдэх арга заль байсан нь нэн ойлгомжтой болсон. Иймээс МАН-ын ялалтад ямар ч үүрэг роль үзүүлээгүй, ядаж нэг удаа ч хороо, хорины ажилд оролцож яваагүй, намын дарга нарын нэр, нөлөөгөөр гишүүн болсныхоо төлөөсийг төлдөг хүмүүсийг жагсаалтад оруулахгүй байх санал, гомдол ч багагүй гарсан аж.

Тиймээс МАН-ын шинэ дарга Н.Учрал намын жагсаалтад хэнийг оруулахаа цаашид анхаарна гэсэн байр суурийг илэрхийлсэн.  Ямар ч байсан тооноор листэд орсон гишүүдээсээ МАН гашуун сургамж авсан бололтой.

Үнэндээ МАН-ын жагсаалтаар орсон эмэгтэйчүүдээс болж, эмэгтэйчүүдийн квотыг ахин анхаарах хэрэгтэй гэсэн санал шүүмжлэл ч нийгмээс гарах болсон билээ.

Б.СОНДОР