Хотын даргын хошгируулалт!

Нийслэлийн Засаг дарга Х.Нямбаатар Даваа гаригт (2025.12.01) нийслэлийн удирдах ажилтнуудын шуурхай зөвлөгөөний үеэр хэлсэн үгээ хэвлэлүүдээр багагүй жиргүүлжээ. Тэрбээр “Төрийн чиг үүргийн давхардлыг арилгах, төсвийн зарцуулалтын үр ашгийг сайжруулж, бодит хэмнэлт үүсгэх зорилгоор нийслэлийн Улсын бүртгэлийн газар, нийслэлийн Хүүхэд, гэр бүлийн хөгжил, хамгааллын газрыг энэ онд татан буулгасан. Эдгээр газрыг татан буулгаснаас үүдэлтэй асуудал үүсээгүй. Дүүргүүд улсын бүртгэл, гэр бүл, хөгжил, хамгааллын үйлчилгээг хэвийн үзүүлээд явж байгаа. Цаашид нийслэлд давхардсан бүтэцтэй, татвар төлөгчдийн мөнгөөр цалинждаг төрийн захиргааны байгууллагыг татан буулгах ажлыг үе шаттай хийнэ. Ирэх жил нийслэлийн Эрүүл мэндийн газрыг татан буулгаж, эрүүл мэндийн тусламж үйлчилгээнээсээ өөрийгөө санхүүжүүлэх чадамжтай байгууллага болгож хөгжүүлнэ. Өрхийн эрүүл мэндийн төвүүдийг хэд хэдээр нь нэгтгэж, төсөв болоод хүний нөөц, техник хэрэгслийн хувьд чадамжтай болгох ёстой. Үзүүлж буй эрүүл мэндийн үйлчилгээ, чанар хүртээмжээрээ шударга өрсөлдөж, санхүүждэг болгоно.

Мөн Нийтийн тээврийн бодлогын газрыг татан буулгана. Хүн амын төвлөрөл ихтэй газрууддаа автобусны зогсоол, үйлчилгээний төв байгуулж, үл хөдлөх хөрөнгийн хөгжүүлэлт, түрээсийн орлого төвлөрүүлдэг зарчим руу шилжинэ. Энэ зарчим руу шилжихийг Дэлхийн банк зэрэг байгууллагаас ч зөвлөдөг” гэсэн нь үнэндээ олон нийтээс оноо авах гэсэн нэг заль. Нэрийг нь өөрчлөхөд нэмэгдэхүүний байрлал солигдохоос нийлбэр дүнд өөрчлөлт гарахгүй.

Энэ олон газрыг татан буулгавал цөөнгүй хүн ажлаа алдана. Ажлаасаа гарсан, ажлаа алдсан гэх нэг ч хүн Х.Нямбаатартай заргалдаагүйг бодоход дээрх байгууллагын нэрийг сольсноос биш нэдэр дээрээ хэвийн үйл ажиллагаа явуулж байгаа гэхэд хилсдэхгүй.

Төрийн алба цомхон, чадварлаг болох ёстой юу ёстой. Үүний тулд төрийн өмчийг хувьчлах, тэнд олон нийтийн хяналтыг оруулах ёстой болохоос даргын шийдвэрээр татан буулгаад, дахиад шинээр байгуулахыг хэлэхгүй.

Тэр тусмаа нийслэл өмчөө цөөлье гэвэл нээлттэй, шударга тендер зарлах ёстой юм. Мөн нийслэлийн дарга нар нүүрсний ченж хийхээ болих ёстой. Нийслэл барилга барихаа зогсоох ёстой.  Нэг амаараа нийслэлийн өмчүүдийг татан буулгана гэх атлаа нөгөө гараараа нийслэл нүүрс шуудайлдаг, зөөдөг, “баривчилдаг” байж болохгүй. Нийслэлийн Засаг дарга Х.Нямбаатарын хамгийн түрүүнд хийх ёстой ажил бол нийслэлийн цас мөсөө ядаж цэвэрлэчих хэрэгтэй. ТҮК-ийн ажилтнуудын цалин 3.5 сая болохын хэрээр хот хог тоос, цас мөсөндөө дарагдах болсныг дашрамд сануулчихад буруудахгүй биз.

Энэ мэтчилэн ажлаа хийхгүй байж Нийтийн тээврийн газрыг татан буулгана гэдэг нэг ёсондоо хий хоосон популизм. Хотын дарга хэзээ биднийг хошгируулахаа сайн мэддэг хүн шүү дээ.

Б.БАТ