Эмээгийн нэхсэн оймсыг санагдуулам iPhone Pocket

Apple гар утсандаа зориулан гаргасан 229.95 ам.долларын үнэтэй цүнхээ 11-р сарын 14-нд худалдаанд гаргаад хэдхэн минутын дотор борлуулж дууслаа.

Цүнхийг Японы дизайнер Иссей Мияке гаргасан. Энэ нь Мияке-гийн Apple-тэй хамтарч буй хоёр дахь тохиолдол юм.

1981 онд Мияке анх Apple-ийн үүсгэн байгуулагч Стив Жобстой танилцжээ. Мияке-гийн Sony компанийн ажилчдад хийж өгсөн ажлын хувцасны дизайн Стивт маш их таалагдсан тул өөрийн компанийн ажилчдадаа зориулан хувцасны дизайн гаргаж өгөхийг Миякегээс гуйсныг Мияке тун дурамжхан хүлээж авсан хэмээн Стив өөрийн намтрыг бичигч Уолтер Айзексонд сүүлд ярьсан байдаг. Гэхдээ тэр хоёрын зам салаагүйгээр барахгүй Мияке Стивийн олонд танигдсан төрхийг бүтээж өгчээ. Хоолойтой хар цамц, Levi’s-ийн 501 загварын жинс, New Balance-ийн пүүзийн хослолыг Мияке Стивийн ажлын хувцас болгон бүрдүүлж өгсөн аж.

Түүнээс хойш Мияке Apple-тэй холбоогүй байж байгаад бараг 40 жилийн дараа түүний Miyake Design Studio дуулиантайгаар хамтарлаа. Иссей Мияке-гийн шинэ бүтээл сунадаг материалтай, нэхмэл цүнх бөгөөд урт бас богино хоёр янзын оосортой, өнгийн сонголтуудтай. “Хэсэг даавуу” хэмээн нэрлэсэн. Сунадаг материалтай учраас гар утастайгаа хамт өөр бусад жижиг зүйлсийг ч хамт хийх боломжтой. Урт оосортой нь 229.95, богино нь 149.95 ам.долларын үнэтэй.

Гар утсанд зориулсан төрөл бүрийн гэр, бүснүүд зах зээлээр дүүрэн байхад Apple-ийн энэ шинэ бүтээгдэхүүн хэр амжилт олох нь эргэлзээтэй гэж шүүмжлэх хүн олон байна. Эхний ээлжийн цүнхүүд тэр дороо зарагдсан нь дизайн сонирхогчид, цуглуулагчид авсан гэж таамаглаж байна. Өмнө нь 2004 онд iPod Socks гэсэн бүтээгдэхүүн гаргаж байсан. Үүнийгээ 2012 он хүртэл үйлдвэрлэж байгаад зогсоосноос хойш эрэлт нь улам нэмэгдэж байжээ.

Гар утасны хэмжээ улам томорсоор байгаа учраас том утсаа халаасандаа түнтийлгэж байснаас зориулалтын цүнхэндээ хийгээд мөрлөөд, эсвэл бугуйндаа углаад явах нь гар чөлөөтэй байх давуу талтай байж болох юм.