Женко операцийн “трейлер”

АН-ын дарга бөгөөд бүлгийн дарга О.Цогтгэрэл Засгийн газрыг огцруулах саналыг өөрийн бланк дээрээ өргөн барина гэжээ. Гэхдээ Г.Занданшатарт долоо хоногийн дотор дэд сайдаа эгүүлэн татах хугацаат “даалгавар” өгснөө мэдэгдсэн байна. Түүний бланк дээр 20 гишүүн гарын үсэг зурсан, нэмээд 12 хүн дэмжсэн нөхцөлд Засгийн газрын хувь заяа УИХ-ын гарт очно.

Ордонд Засгийн газрыг огцруулах операцийг сөрөг хүчний дарга өөрийн биеэр эхлүүлэх цагаар ордны гадаа иргэд жагсаал хийсэн нь зохион байгуулалттай давхцал. Байгуулагдаад хагас жил болж буй Г.Занданшатарын Засгийн газрыг огцруулах акц хоёр дахь удаагаа өрнөж байгаа нь хүний муудаа биш.

Дэд сайдын асуудал бол дэд сэдэв. Шатахууны хомсдол бол шалтаг. Ард нь Оюутолгойн хувь заяа, оросуудын шахалт, “Роснефть”-ийн хүсэл.... гэх мэтчилэн олон асуудал байна.

Тэр дундаа Женкогийн Засгийн газар огцорсон, унасан “бөх” ууртай яваа. Учир нь, "бөх бол төр" юм.

1. Гавъяат тамирчин, самбо бөхийн дэлхийн аварга Х.Баттулга өөрийн хүсэлтээр улс төрөөс “зодог тайлах” хүн биш. Ганзагын наймаачнаас хувьчлалын тэрбумтан, эрүүгийн яллагдагчаас Төрийн тэргүүн болж үзсэн түүнд олон мэх бий.

Бөхөөр бол хажуугаас нь хавирна, нохой мордоно, араас нь хонгодоно.

Женко.Баттулга 2024 оны сонгуулиар УИХ-д эргэн ирсэн нь ердөө кнопны гишүүн төдий байхын тулд биш нь тодорхой. Төрийн ордонд буцаж ирэхдээ Михайлд нэг бодол төрсөн нь ойлгомжтой. Х.Баттулгын шунал барагдахгүй.

2. О.Батнайрамдалын сонсгол С.Баярцогтын “наадам” болно гэж Х.Баттулга төсөөлөөгүй нь лав. Оюутолгойн сонсголоос болж, С.Баярцогт түүний хамаг булхайг дэлгэсэнд багагүй бухимдалтай яваа байх. Оросын олигархи Олегийн дарамт, шахалтад ч орсон байж мэднэ.

3. Х.Баттулгын хүч нөлөө Ардчилсан намд буурсан ч, тэр өмхийгөө тавьтлаа удна. Түүнд мэх ч бий, мөнгө ч бий. Монголоос хулгайлсан мөнгөөрөө АН-ыг байтугай, МАН-ыг, бүр Монголыг өлхөн худалдаж авч чадна. Төгрөг нуурын орд, төмөр замын хулгай, оффтейкоос офшорт нуусан хөрөнгө гэх зэргээр түүний хөрөнгө өнгөрсөн жилүүдэд улам арвижсан уу гэхээс хорогдоогүй. Мөнгөөр бүгдийг худалдаж, бүхнийг зохицуулж ирсэн хүн мөнгөөр бүхнийг зохицуулна гэж үзнэ, гарцаагүй. Ардчилсан намд Женкогийн мөнгөнд худалдагдах хүмүүс захаасаа л тоологдоно.

УИХ дахь бүлэг дотор нь гэхэд О.Алтангэрэл, Л.Мөнхбаясгалан, Ө.Шижир, Д.Жаргалсайхан, С.Ганбаатар, Н.Алтанхуяг, Г.Очирбат, Ж.Баясгалан, Ц.Туваан нарын фракц байна. Женкогийн “12” нэртэй. АН-ын генсек Н.Ганибал бол улаан цагаан “монгол ялна”.

Алим модноосоо, АН Женкогоос хол унахгүй.

4. Г.Занданшатарын Засгийн газрыг унагааснаар О.Цогтгэрэлийн рейтинг өсөхгүй. Эсрэгээрээ эдийн засгийн хямралын буруутан, Засгийн газрыг огцруулсан гэмтэн болж үлдэж мэднэ. Үндсэн хууль зөрчин, Төрийн эргэлт хийсэн үйлдэлдээ хүртэл АН-ыг буруутгадаг хүмүүс шүү дээ, МАН-ынхан.

О.Цогтгэрэлийн энэхүү санаачилга манж мафийн загатнасан газрыг л маажина. Тэд Ардчилсан намын акцыг ашиглаж, улс орныг самарсан жагсаал болгож мэднэ. Эцэст нь энэ бүгдийн буруутан нь О.Цогтгэрэл болж үлдэнэ.

6. ҮХНӨ-өөр Х.Баттулга Ерөнхийлөгчид нэр дэвших боломжгүй. Гэвч түүнд Ерөнхий сайд болох эрх нь нээлттэй. Гэвчиг түүний шунал хүсэл зөвхөн Ерөнхий сайдаар хязгаарлагдахгүй, ханахгүй. Үндсэн хуульд нэмэлт өөрчлөлт оруулж, Монголын Путин болох нь. Х.Баттулгын гол зорилго. Тиймээс Х.Баттулга Төрийн ордноос яваагүй цагт ордны хэрүүл тасрахгүй, Монголын зовлон дуусахгүй.