FACTCHECK: Туулын хурдны замын ажил гүйцэтгэх гэрээнд БАНКНЫ БАТАЛГАА БАЙХГҮЙ

1. Банкны баталгааг зөвхөн арилжааны БАНК гаргах эрхтэй. Мөн гадаадын банкны баталгаанд үндэслэн (барьцаалан) Монгол Улсад баталгаа дамжуулж гаргах эрхтэй этгээд нь мөн л арилжааны банк байх ёстойг хуулиар зааж өгсөн.

2. Арилжааны банк гэж тусгай зөвшөөрлөөр, маш өндөр капитал (өөрийн хөрөнгө) болон төлбөрийн чадварын шаардлага хангаж байж байгуулагдаж, бас оршин тогтнодог тусгай хуулийн этгээд юм. Тиймээс нэр нь хүртэл заавал БАНК гэж төгсөх ёстой. Хэрвээ дурын компани баталгаа гаргавал дараа нь алга болчих, төлж чадахгүй байх эрсдэлтэй байдаг тул  банкны баталгаа заавал шаарддаг.

3. Банкны нэг этгээдэд гаргах баталгааны дээд хэмжээ Монголд банкны капиталын 20%-иас хэтрэхгүй, БНХАУ-д 10-5%-иаc хэтрэхгүй байх ёстой!

Өөрөөр хэлбэл ₮500 тэрбумын баталгаа гаргахын тулд ~₮2.5 их наядын капиталтай банк байх шаардлагатай! Энэ нь баталгаа нэхэгдсэн үед банк төлбөрийн чадваргүй болох эрсдлээс хамгаалсан суурь хуулийн шаардлага юм.

4. Тэгэхээр Туулын хурдны зам дээр ирүүлсэн 500 тэрбум төгрөгийн APG (урьдчилгаа төлбөрийн баталгаа) гээч нь банкны баталгаа огт биш. Тодруулбал, баталгаа гаргагч нь банк биш “Jianbang Engineering Performance Guarantee (Shandong) Co., Ltd” гэх энгийн компани.

Мөн “Мөнх даатгал” ХХК нь энэ баталгаанд зөвхөн мэдээлэл дамжуулах, зуучлах үүрэгтэй оролцож байна, ямар ч санхүүгийн хариуцлага хүлээгээгүй байна.

5. Тиймээс Туулын хурдны замын тендерийн хүрээнд ₮500 тэрбумын ард бодит банкны баталгаа байхгүй гэсэн үг юм.

Үүнээс  хоёр ноцтой дүгнэлт гарч байна.

1. Хэрэв хуурамч банкны баталгаа үзүүлэн мөнгө гаргуулсан, гаргасан бол хууль бус, хуурамч бүтэц зохион байгуулж ашигласан бол эрүүгийн гэмт хэрэгт тооцогдоно.

2. Тус төслийг ямар ч аргаар хамаагүй явуулах гэж үхэн хатан зүтгээд байгаагийн цаад шалтгаан нь авлига, хулгай байх магадлалтай.

Х.Нямбаатар илт хуурамч баталгаагаар ₮500 тэрбумын урьдчилгаа олгох ямар ашиг сонирхол байв? Үүнийг хуулийн байгууллагаар шалгуулах ёстой.

Туулын хурдны замын төслийг зогсоох шаардлага биелсэн тул төв талбайд биетээр жагсахаа бид зогсоосон. Харин цаасан дээрх тэмцэл буюу баримт цуглуулах, мэтгэлцэх, асуудлыг хуулийн байгууллагаар шалгуулах ажил зогсоогүй байгаа гэж #saveTUUL-ын хөдөлгөөнийхөн мэдэгджээ.