Сургуулиуд ухаалаг утсыг хориглох нь сурагчдад “шийтгэл” болж байна

Ухаалаг утсыг бүрмөсөн хориглох нь залууст урьдчилан таамаглаагүй сөрөг үр дагавар авчирч болзошгүйг Лондонгийн их сургуулийн коллеж (UCL)-ийн тайланд анхааруулжээ.

The Guardian

Сургуулийн орчинд ухаалаг утсыг хориглох нь асуудлыг “хэтэрхий хялбарчилсан” хэрэг бөгөөд үүнийг тус дэм болохоос илүү “шийтгэл” хэмээн үзэж буй учраас залуус уг шийдвэрийг дэмжихгүй байна хэмээн Лондонгийн их сургуулийн коллеж (UCL)-ийн судалгаанд дурджээ.

Английн сургуулиудад ухаалаг утас хэрэглэхийг хуулиар хориглосон шийдвэр хүчин төгөлдөр болж, сургуулиуд болон боловсролын сангууд өдрийн турш сургуулийн орчныг утасгүй байлгах хуулийн хариуцлага хүлээж эхэлсний маргааш нь буюу мягмар гаригт тус UCL-ийн тайлан нийтлэгдсэн байна. Судалгаагаар ухаалаг утсыг бүрмөсөн хориглох нь үр дүнгүй байх магадлалтай төдийгүй залууст урьдчилан таамаглаагүй сөрөг үр дагавар авчирч болзошгүйг анхааруулсан юм.

Уг судалгаанд 11-ээс 18 насны дунд, ахлах ангийн 732 сурагч, мөн 27 багш, 41 эцэг эхийг хамруулж, асуулга, ярилцлага болон фокус бүлгийн уулзалтын аргаар утасны хоригийн талаарх тэдний үзэл бодлыг танджээ.

Ухаалаг утас нь анги танхимд саад болдог гэдэгтэй хүмүүс нийтээрээ санал нэгдэж байсан ч судалгаагаар үе үеийнхний хооронд маш том үзэл бодлын зааг байгаа нь илэрсэн байна. Тухайлбал, багш нарын 87%, эцэг эхчүүдийн 88% нь бүрэн хориглох бодлогыг дэмжиж байхад сурагчдын 75% нь үүнийг эсэргүүцжээ.

"Насанд хүрэгчид утасны хориг нь хичээл үймүүлэхийг багасгаж, анги удирдлагыг хялбарчилна гэж үзэж байна. Харин сурагчдын хувьд ухаалаг утас нь харилцаа холбоо, аюулгүй байдал, сэтгэл хөдлөлөө зохицуулах болон өдөр тутмын ажлаа зохион байгуулахад нь тусалдаг хэрэгсэл юм" гэж тайланд тэмдэглэжээ.

Судалгаанд оролцсон сурагчид ухаалаг утсыг хориглосноор автобусны цагийн хуваарь харах, цаг агаарын мэдээ шалгах, гэрийн даалгаврын аппликейшн ашиглах зэрэг өдөр тутмын амьдрал болон сургуульдаа навигаци хийхэд тусалдаг "нэн шаардлагатай" хэрэгслүүдийг нь хязгаарлаж байна гэсэн байна.

Мөн тэд ухаалаг утас нь хэрэгцээтэй тусламжийн сүлжээнүүдтэй шууд холбогдох боломж олгодогт дуртай бөгөөд ялангуяа охид ганцаараа замд явж байхдаа утасныхаа тусламжтайгаар илүү аюулгүй байдлыг мэдэрдэг гэдгээ хэлжээ.

Үүнээс гадна, ухаалаг утсыг хориглох нь сургууль дээрх цахим дарамт (cyberbullying) болон бэлгийн дарамт зэрэг дижитал асуудлуудын харагдах байдлыг бууруулж болох ч, бодит байдал дээр эдгээр асуудлууд улам далд хэлбэрт шилжиж, улмаар сурагчид тулгарсан бэрхшээлээ насанд хүрэгчдэд мэдэгдэх, тусламж хүсэх боломж нь хумигдана гэдгийг сурагчид анхааруулсан байна.

Одоогоор Английн сургуулиуд утасны хоригийг өөр өөрөөр хэрэгжүүлж байна. Зарим сургууль сурагчдыг утсаа авчрахыг зөвшөөрдөг ч тусгай шүүгээ эсвэл лацадсан уутанд (sealed pouches) хийж хадгалахыг шаарддаг. Зарим нь зөвхөн интернет орох боломжгүй, маш хязгаарлагдмал үйлдэлтэй "тоосго" буюу товчлууртай утас (dumb phones) барихыг зөвшөөрдөг бол, зарим сургуулиуд сургуулийн бүс рүү ямар ч утас нэвтрүүлэхийг бүрмөсөн хориглодог байна.

UCL-ийн Боловсролын хүрээлэнгийн жендэр болон боловсролын социологийн профессор, судалгааны ахлах зохиолч Жессика Рингроз (Jessica Ringrose) хэлэхдээ:

"Бидний ярилцсан сурагчид энэхүү бүх нийтийн хоригийг дэмжлэг гэхээсээ илүү шийтгэл гэж хүлээж авч байна. Энэхүү хориг нь тэдний өдөр тутмын амьдралд утас ямар чухал үүрэг гүйцэтгэдэг болохыг насанд хүрэгчид ойлгохгүй байна гэсэн мэдрэмжийг төрүүлж, тэдний хоорондын итгэлцлийг үгүй хийж байна" гэв.

Судалгааны хамтран зохиогч, "Life Lessons Education" зөвлөх компанийн ажилтан Дон Айтун (Dawn Aytoun) нэмж хэлэхдээ, сургуулиуд утас хориглохын оронд сурагчдад дижитал ертөнцийн ёс зүй, харилцаа холбоо, улс төрийн талууд болон технологийн компаниудын ажилладаг эдийн засгийн загваруудыг ойлгож, хэлэлцэхийг уриалах хэрэгтэй гэжээ.

Мөн UCL-ийн докторант, хамтран зохиогч Эдит Родда (Edith Rodda) хэлэхдээ "Сурагчдын үзэл бодлыг харгалзахгүйгээр яаран гаргасан сургуулийн утасны тухай бодлого нь хэдий сайн санаатай байсан ч эцэстээ шийтгэлийн чөтгөрийн тойргийг бий болгож, бодлогынхоо зорилгыг нураах эрсдэлтэй. Сурагчид ямар нэгэн аргаар, жишээ нь түгжээтэй утасны уутыг хүчээр эвдэж нээх зэргээр үргэлж гарц олж таарна" гэж анхаарууллаа.

Боловсролын яамны хэвлэлийн төлөөлөгч хэлэхдээ "Бид эцэг эхчүүд болон сургуулийн удирдлагуудын өргөнөөр дэмжиж буй соёлын өөрчлөлтийг удирдахын тулд засгийн газрын эрх мэдлийг ашиглаж байна. Энэ нь хүүхдүүдийг технологийн хамгийн муу нөлөөнөөс хамгаалахын зэрэгцээ түүний шилдэг давуу талуудаас хүртэх боломжийг олгож байгаа юм.

Сургуулиудад гар утсыг хориглох шийдвэр ганцаараа хэрэгжихгүй. Бид хүүхдүүдэд цахим ертөнцөд аюулгүй аялах ур чадварыг олгож, 5-16 насны хүүхдүүдтэй эцэг эхчүүдэд зориулсан дэлгэцийн хэрэглээний анхны удирдамжийг нэвтрүүлж байна. Мөн 16-аас доош насныханд хор хөнөөлтэй нь батлагдсан сошиал медиаг хориглох, аюулгүй AI багшийн хэрэгслүүдийг хөгжүүлэхийг дэмжих, хүүхэд бүр хуурамч мэдээллийг ялгаж, медиа бичиг үсгийн бодит ур чадварыг эзэмших боломжтой болгохын тулд сургалтын хөтөлбөрийг шинэчилж байна" гэж мэдэгджээ.