Манай хотын дарга галзуурчихжээ!

-Дарангуйлагч л иргэдийнхээ эсрэг иргэдээ турхирдаг-

Нийслэлийн төсвийн 30% буюу 2.3 их наяд төгрөгөөр хэмжигдэх “Туулын хурдны зам” төслөөс авлига, албан тушаалын гэмт хэргийн “үнэр” ханхалж, утаа татаж эхэллээ.

ТЭЗҮ нь нууц, байгаль орчны үнэлгээ нь эргэлзээтэй, тендерт шалгарсан компани нь “цаасан дээрх” байх магадлалтай гээд төслийг тойрсон асуултууд МАНай хотын даргыг галзууруулав.

Уг нь, УИХ дахь АН-ын бүлэг 2026 оны 3-р сарын 30-ны өдөр “Туулын хурдны зам” төслөөр Төрийн ордонд нийгмийн төлөөлөгчид, нийслэлийн удирдлагуудыг нээлттэй хэлэлцүүлэгт урьсан ч хотын дарга Х.Нямбаатар очоогүй. Харин хороо, хориноос хүчээр цуглуулсан ахмадуудыг дагуулан “улангассан бух” мэт авирлаж буйгаа ил цагаан лайвдсан билээ.

Түүний энэ үйлдэл үнэндээ нийслэлийн удирдах албан тушаалтны үг, үйлдэл гэхэд хэцүүхэн. Иргэдийг талцуулсан, хүний эрхэнд халдсан, төрийн албан тушаалтны ёс зүйд нийцэмгүй гудамжны жижигхэн хулигаан л тэрхүү төрхөөс нь харагдлаа.

Х.Нямбаатарт бүртгүүлсэн “жагсагчид”

Ням гаригт задарсан “Алсын гурван дүүргээс тус бүр 100, төвийн зургаан дүүргээс 500 хүн цуглуулж, картонон цаасан дээр уриа лоозон бичээд жагсахыг үүрэг болгож, дүүрэг хорооны дарга нарыг бүртгэнэ” гэх утгатай хотын даргын “чат” биеллээ олж, тэрбээр өчигдөр /2026.03.30/ дүүрэг, хороодын дарга нараар дамжуулан иргэдийг албадан цуглуулжээ. Хан-Уул дүүргийн Засаг дарга Б.Цэрэнгээр толгойлуулж, жагсаалд ирсэн иргэд хороо, хориноос үүрэг өгсөн болохыг ч нуусангүй. Харин хотын дарга Х.Нямбаатар тэднийг нийслэлийн намын “штаб” гэж тодорхойллоо.

Хамгийн аймшигтай нь, Туулын хурдны замын төслийг эсэргүүцсэн эмэгтэйг олигархийн гар хөлөөр нь цоллож, түүний эсрэг иргэдийг турхирч, жинхэнэ дарангуйлагч болсноо ийнхүү зарлав.

Х.Нямбаатар парламентын дээр гараад суучихжээ!

Х.Нямбаатар бол УИХ, Засгийн газарт ажлаа тайлагнадаг засаг захиргааны нэгжийн удирдлага. Атал өөрийгөө УИХ, Засгийн газраас өндөрт тавьсныг түүний авираас ил тод харлаа.

Ард түмнээс сонгогдсон УИХ-ын гишүүдийг “төлбөртэй гүтгэгч”, кнопоо тэрбумаар үнэлдэг авлигач, гадаад дотоодоор зугаалагч, дарга долоогч гэж доромжлов. Үүгээр зогсохгүй УИХ-ын гишүүдэд хандаж “Надтай үзэх хүмүүс байвал нэг нэгээрээ гараад ир” гэж гудамжны балмад этгээд шиг авирласан нь энэ хүн яг эрүүл байна уу гэж иргэд эргэлзэхэд хүргэв.

“Туулын хурдны зам” төслийг мэдээлэл нь нээлттэй биш байна, гадаад, дотоод эдийн засгийн эрсдэлтэй хүнд нөхцөлд 2.3 их наядын төсөвтэй төсөл эхлүүлэх нь цаашдаа төсөв өсөх эрсдэлтэй, Туулын эко системийг эвдэж байна, дэмжихгүй гэх мэт шүүмжлэлтэй байр суурь илэрхийлснийхээ төлөө УИХ-ын гишүүд түүний ээлжит дарамт, сүрдүүлэгт өртөв.

УИХ-ын гишүүн Д.Бум-Очир, С.Цэнгүүн, Л.Мөнхбаясгалан, Ж.Золжаргал нарыг эргүүлэн татах аяныг эхлүүлж, ард түмний санал асуулга явуулна гэж сүрдүүлэв.

Нийслэлд төвлөрсөн их хэмжээний эрх мэдэл, төсөв хөрөнгө түүнийг ийнхүү галзууруулсны ард ихээсэн ноцтой асуудал байгаа бололтой.

Иргэдээ террорист, фашист гэж харааж, “буллидах”-ыг уриалав

Хотын дарга Х.Нямбаатарт “Туулын хурдны зам”-ыг эсэргүүцсэн иргэд террорист бүлэглэл, шантаажчин, авлигачнаараа дуудуулж, Туул орчмын хотхонд амьдардаг хүмүүс хөрөнгөтнүүд болж хувирав.

Сэтгүүлч Р.Эмүжин төрийн нууц задруулагч, эдийн засагч Б.Лут-Очир авлигын хэрэгтэн, зохиолч Б.Шүүдэрцэцэгийг нөхөртэйгээ нийлсэн шантаажчин гэж зарлаж, “маргаашаас эхлээд гэр оффисынх нь гадаа очиж жагсан буллидъя” хэмээн иргэдийг гэмт хэрэгт уриаллаа.  

Тэр ч бүү хэл УИХ-ын гишүүн асан Ц.Оюунгэрэлийн гэрийн гадаа цөс нь хөөрсөн олныг дагуулж очсон нь хэрээс хэтэрсэн үйлдэл боллоо. Зөвхөн үүнийх нь төлөө Х.Нямбаатарыг баривчилж, түүнд бусдын амьд явах эрхэнд халдсан гэж ял асуух ёстой юм.

Эсэргүүцэгчдийн тоонд багтсан newsroom.mn, record.mn зэрэг сайтыг буллидаж, хаалгана хэмээн санаанд багтсан үгээ хэлж байхыг харахад тэр үнэхээр томорчээ. Эрх мэдэлтэй, мөнгөтэй болж.

Хотын дарга Х.Нямбаатарт хариуцлага тооцох цаг нь болсон

УИХ дахь Ардчилсан намын олон гишүүн МАН-ын дарга Н.Учралд хандаж, хотын дарга Х.Нямбаатарт хариуцлага тооцохыг хүссэн.

Х.Нямбаатар “Улсыг хөгжүүлэхгүй, ард түмнийг нь ядуу байлгах сонирхолтой террорист бүлэглэл зөвхөн АН болон бусад намд төдийгүй манай намд байна. Нийслэлийн МАН-ын хорооны даргын хувьд энэ луйварчидтай, атаархагчидтай, шантаачидтай ясаа гартал тэмцье” гэж хэлсэн. Энэ бүх үгнээс харвал манай хотын даргын сэтгэц эрүүл бус болжээ.

Иргэдээ террорист гэж хашгичин, гудамжны тэмцэлд уриалан турхирсныхаа төлөө Х.Нямбаатар огцрох ёстой. Ардчилсан Монголд варвар засаглал тогтох ёсгүй билээ.