Хятад улс АНУ-аас 10 сая тонн нүүрс импортолно

АНУ-ын ерөнхийлөгч Дональд Трамп болон БНХАУ-ын дарга Ши Жиньпин нарын Вашингтон хотноо хийсэн дээд хэмжээний уулзалтын дараа Цагаан ордноос гаргасан албан ёсны баримт бичигт дурдсанаар БНХАУ 2027 болон 2028 онд АНУ-аас жил бүр багадаа 10 сая тонн нүүрс худалдан авахаар амлалт өгчээ. Энэ нь хоёр улсын хоорондох худалдааны зөрчлийг намжаах чиглэлд хийгдсэн томоохон алхам юм.

www.enerdata.net (2026-09-29)

Энэхүү тохиролцоо нь шинээр ажиллаж эхэлж буй "АНУ-Хятадын Худалдааны зөвлөл"-ийн хүрээнд хийгдсэн бөгөөд талууд хоёр талын нийт 60 тэрбум ам.долларын (тал тус бүр 30 тэрбум ам.доллар) өртөг бүхий стратегийн бус бараа бүтээгдэхүүнд тарифын таатай нөхцөл олгохоор зорьж байна.

2025 оны эхээр дэгдсэн тарифын маргаанаас үүдэн Хятад улс АНУ-аас нүүрс авахаа бараг зогсоогоод байсан юм. Хятад улс хамгийн сүүлд буюу 2024 онд эрчим хүч болон гангийн үйлдвэрлэлдээ зориулж АНУ-аас 12 сая гаруй тонн нүүрс импортолж байжээ.

Нүүрсний худалдааг ийнхүү тодорхой тоогоор баталгаажуулсан боловч түүхий тос болон шингэрүүлсэн байгалийн хий (LNG) энэхүү гэрээнд багтаагүй байна.

Хятадын Худалдааны яамнаас мэдээлснээр АНУ-аас нүүрс импортлох нь Хятадын дотоодын нүүрсний зах зээлд ашигтай байхаас гадна АНУ-ын нүүрсний салбарт тогтвортой орлого, ажлын байр бий болгоход хувь нэмэр оруулна гэж үзэж байна. Энэ 10 сая тонн нүүрс нь Хятадын жилийн нийт нүүрсний импортын 2%-ийг эзлэх ажээ.

Энэхүү хэлэлцээр нь зөвхөн нүүрсний тухай биш АНУ-Хятадын худалдааны дайныг түр намжаах, Дональд Трампын засаг захиргаанд эдийн засгийн "бодит үр дүн" харуулах гэсэн Хятадын талын стратегийн буулт хэмээн шинжээчид дүгнэж байна. Гэрээний хүрээнд АНУ нь хөдөө аж ахуйн бүтээгдэхүүн, далайн гаралтай хүнс, мод, гоо сайхны бүтээгдэхүүн, эмнэлгийн хэрэгсэл зэрэгт тарифын хөнгөлөлт үзүүлэх бол Хятадын талаас гэр ахуйн жижиг цахилгаан хэрэгсэл, тоглоом, баярын чимэглэл зэрэг хэрэглээний голдуу бараа бүтээгдэхүүнийг хамруулахаар хэлэлцэж байна.