Хөлбөмбөгийн ДАШТ: Канадын анхны хожлын дараах баяр

Ерөнхий сайдаас эхлээд спортын одод, олон нийтийн сүлжээний хэрэглэгчид хүртэл бүх канадчууд үндэсний шигшээ багийнхаа ялалтад баярлан хөөрцөглөж байна.

Al Jazeera

Канадын шигшээ баг 2026 оны Хөлбөмбөгийн дэлхийн аварга шалгаруулах тэмцээнд түүхэн амжилт үзүүлж байна. Өмнөд Африкийн эсрэг тоглолтын 92 дахь минутад Стивен Эустакиогийн оруулсан гоолын ачаар энэхүү аялал цааш үргэлжлэхээр боллоо. Энэхүү гоол нь тэмцээнийг хамтран зохион байгуулагч Канад улсыг түүхэндээ анх удаа дэлхийн шилдэг 16 багийн шатанд шалгаруулсан юм.

Өдгөө 29 настай хагас хамгаалагчийн ням гаригт хийсэн уг цохилт Канадын хөлбөмбөгийн түүхийг шинээр бичсэн бөгөөд хоёр жилийн өмнө шигшээ багийн жолоог атгасан Жесси Маршийн боловсруулж ирсэн түүхийн оргил цэг боллоо.

Тоглолтын дараа талбай дээр баг хамт олноо тойруулан зогсоосон Марш сэтгэл хөдлөлөө барьж ядан төлөвлөгөөгөө ягштал баримталж, хэн байхыг хүсэж байгаадаа үнэнч үлдсэн тухайгаа ярьжээ.

Та нар бол Канадын баатрууд! Энэ спортоор хичээллэж буй манай улсын ирээдүй хойч үеийн хүүхдүүдийн хувьд канад баатрууд юм. Та бүхний ачаар энэ спорт асар том ирээдүйтэй боллоо. Та нар хэн бэ гэдгээрээ, бас энэ тоглолтоор үнэхээр бахархах хэрэгтэй. Та нар мөч бүрийн араас тууштай тэмцсэн.”

Ерөнхий сайд Марк Карни ч мөн адил үгийг давтан хэлсэн бөгөөд тэрбээр онгоцноосоо дөнгөж буугаад тоглолтын сүүлчийн минутыг гар утсаараа үзэж амжжээ. Карни олон нийтийн сүлжээндээ “Ямар гайхалтай тоглолт, ямар мундаг баг, ямар агуу улс вэ” хэмээн бичсэн байна.

Эустакиогийн төрж өссөн (түүний гэр бүл дараа нь Португал руу нүүсэн) Онтарио мужийн ерөнхий сайд Даг Форд болон Сөрөг хүчний удирдагч Пьер Пойливр нар дараагийн шатанд шалгарсан багт баяр хүргэв.

Ванкувер хотын дарга Кен Сим багт хандан “Та нар зүрх сэтгэлээ зориулж, талбай дээр бүхнээ дайчлан, бидэнд хэзээ ч мартагдашгүй дурсамжийг бэлэглэлээ” гэжээ.

Олон нийтийн сүлжээ нь канадчуудын үзвэрийн үдэшлэг, хөгжөөн дэмжигчдийн наадмыг улаан өнгөөр ​​будсан бичлэгүүдээр дүүрсэн байв. Канадчууд Өмнөд Африктай тоглохоор Баруун эрэг рүү ирсэн Лос Анжелесийн цэнгэлдэх хүрээлэн хүртэл ДАШТ-ийг хамтран зохион байгуулагч орноо дэмжсэн хөгжөөн дэмжигчдээр хальж байлаа.

Хөлбөмбөг сонирхогчид болон шинжээчид олон нийтийн сүлжээнд энэхүү ялалт нь шайбтай хоккей, сагсан бөмбөг, бейсбол зэрэг спорт хөлбөмбөгөөс хамаагүй илүү түгээмэл хөгжсөн Канад улсын хувьд зүүд мэт санагдаж байгааг тэмдэглэжээ.

Канадын бусад тамирчид ч сошиал медиагийн баярт нэгдэв. Олимпын олон удаагийн аварга, усанд сэлэгч Саммер Макинтош, теннисний од Феликс Ожер-Алиассим, Олимпын аварга, гүйгч Андре де Грасс зэрэг Канадын шилдэг тамирчид ялалтын дараа эрэгтэйчүүдийн хөлбөмбөгийн багийг дэмжиж буйгаа илэрхийлжээ.

Канадын алдарт сансрын нисгэгч Крис Хэдфилд ням гаригийн өглөө багт амжилт хүссэнийхээ дараа мөн баяр хүргэсэн байна.

Мөн Мюнхений "Бавари" клуб тавдугаар сард УЕФА Аваргуудын лигийн хагас шигшээ тоглолтын үеэр гуяны арын булчингийн гэмтэл авсан Альфонсо Дэвисийг шигшээ багийнхаа бүрэлдэхүүнд эргэн ирсэнд баяр хүргэв. Тоглолтын 74 дэх минутад Дэвис сэлгээгээр талбайд гарч ирснээр тоглолтын хурд болон тактикт мэдэгдэхүйц өөрчлөлт орсон юм.

Өрсөлдөгч талын зүгээс Өмнөд Африкийн Ерөнхийлөгч Сирил Рамафоса Канад улсыг “Бафана Бафана (Өмнөд Африкийн шигшээ багийн хоч) та нарын араас ширүүн нэхэж байхад” ялалт байгуулсанд нь баяр хүргэсэн байна.

Гэсэн хэдий ч Кот-д'Ивуарын менежер Эмерс Фае-д Африкийн багийн талаар хийсэн мэдэгдэлдээ арьс өнгөөр ​​ялгаварлан гадуурхсан өнгө аяс гаргасан хэмээн шүүмжлүүлж байсан Германы хөлбөмбөгчин асан Бастиан Швайнштайгер Канадын түүхэн ялалтад төдийлөн сэтгэл нь хөдлөөгүй бололтой.

Тэрбээр олон нийтийн сүлжээндээ “Ерөнхийдөө тийм ч үнэмшилтэй тоглолт байсангүй, гэхдээ илүү тодорхой боломжуудынхаа ачаар дараагийн шатанд шалгарсан нь зүгээр хэрэг. Альфонсо Дэвис сэлгээгээр орж ирээд шинэ уур амьсгал авчирлаа. Гэвч Нидерланд эсвэл Мароккогийн эсрэг тоглоход баг тоглолтоо мэдэгдэхүйц сайжруулах шаардлагатай болно” гэж бичжээ.