Х.Баттулгын МоАХ фракц үндсэндээ ялагджээ

Ардчилсан намын дотоод сунгаа нэлээд дуулиан, шуугиантайхан болж дуусав. Дотоод сунгааны үеэр МАН-аас царцаа зөөсөн, мөнгө тараасан гэх хэрүүл, зарга ч өдгөө үргэлжилж байна.

Монголд дотоод сунгаа явуулдаг ганцхан нам бий. Тэр нь Ардчилсан нам. Ямартай ч энэ удаагийн Ардчилсан намын дотоод сунгаа нэлээд онцлогтой болов.

Нэгдүгээрт, Ардчилсан намд МоАХ буюу Женко.Баттулгын фракцын нөлөө байхгүй болжээ. Шинээр бүрдсэн ҮБХ-ны 2 хүрэхгүй хувийг л Женко фракц авчээ.

Аймгуудаар нь хөөвөл Баянхонгороос бусад аймагт МоАХ шахагдсан байна. Дорнодоос цөөн хүн, Дорноговь дээр УИХ-ын гишүүн Л.Мөнхбаясгалан, шинээр сонгогдсон намын дарга Д.Алтангэрэл нар мөнгө тараасны хүчинд гарч ирсэн бол Хөвсгөлд Женкогийн төлөвлөгөө нурсан гэнэ. Сэлэнгэд МоАХ фракциас ганцхан УИХ-ын гишүүн Ө.Шижир гарч ирсэн. Гэхдээ Ө.Шижирийн хувьд сүүлийн үед Х.Баттулгаас багагүй зай барих болсон байна. Дархан-Уул дээр МоАХ буюу "Дашууд" бүр мөсөн шахагджээ.

Нийслэлд МоАХ-ны гол түшиц газар нь ХУД байсан. Энэ удаад ХУД дээр Х.Баттулгын фракц бүхэлдээ үсгүй арчуулсан байна. ХУД дээр Д.Сүндийтэй гар барьсан УИХ-ын гишүүн Ч.Лодойсамбууд намынхан нь итгэл үзүүлсэнгүй. СХД ч мөн Х.Баттулгын "мояа" нарыг нэлээд цөөлжээ.

БЗД-т дотоод сонгуулийг зөрчсөн хөдлөшгүй баримтууд ил болсон. Иймээс тус дүүрэг дээр дахин сонгууль явагдаж магадгүй байна.

Сүхбаатар дүүрэгт УИХ-ын гишүүн Л.Гантөмөрийн фракцыг УИХ-ын гишүүн Х.Болормаа нэлээд шахсан аж. Төв аймагт УИХ-ын гишүүн Ц.Тувааны хүч нөлөө багагүй суларсан байна. УИХ-ын гишүүн С.Одонтуяа БГД-ээсээ ҮБХ-ндоо гарч ирж чадаагүй бол  УИХ-ын Ц.Мөнхтуяагийн улс төрийн карьер ерөнхийдөө дуусч байна.

УИХ-ын дарга асан Д.Амарбаясгалангийн улс төрийг балиашиглаж явсан УИХ-ын гишүүн Ж.Баясгалан мөн ялагдал амсчээ. УИХ-ын гишүүн Д.Ганбат, Д.Цогтбаатар нарыг Женко Баянхонгороос бодлогоор шахсан бол УИХ-ын гишүүн Д.Жаргалсайханыг ахин “ашиглах” шаардлагагүй гэж үзсэн бололтой.

УИХ-ын гишүүн Р.Эрдэнэбүрэн ҮБХ-ндоо орж чадаагүй. Дорнодод УИХ-ын гишүүн Ш.Бямбасүрэн унажээ. УИХ-ын гишүүн Э.Одбаяр ҮХБ-ндоо арай гэж багтсан бол Ж.Батсуурь Сүхбаатарт ялалт байгуулжээ.

УИХ-ын гишүүн Л.Гантөмөр СБД-ийн намын хороон дээр унасан. Тиймээс БЗД рүү шилжиж, тэндээс ҮБХ-нд орж ирсэн байна.

Ардчилсан нам дотоод сунгаагаараа нэлээд шинэчлэгдэж, хуучны фракцууд ч хүч нөлөөгөө алдаж. “Нэг Монгол”, “Нэг ардчилал”, “МоАХ”, “Морьтон”, "Монде", "Гранд" гэх бүх фракц задарч, шинэ фракцууд гарч ирэх нөхцөл бүрджээ.

Нам дахь нэр нөлөөгөө Х.Баттулга бүрэн алдсанаар тэр ердөө л нэг “домог” төдий л үлдэж байна.

Б.БАТ