АНУ-ын зэвсэгт хүчин Иранаас хоёр дахь нисгэгчээ аварч чадсан байна

Аврах ажиллагаанд оролцсон бүх бие бүрэлдэхүүн Ираны агаарын орон зайг аюулгүй орхин гарсан талаар албаны эх сурвалжууд мэдээлэв.

АНУ-ын албаны хүмүүсийн мэдээлснээр, Ираны нутаг дэвсгэрт гацаад байсан Америкийн нисгэгчийг зэвсэгт хүчнийхэн маш эрсдэлтэй, зоригтой ажиллагаа явуулж аварчээ. Нисгэгч Иранд 24 гаруй цаг нуугдсан бөгөөд Ерөнхийлөгч Трамп Ням гарагийн өглөө эрт нийгмийн сүлжээгээр дамжуулан уг ажиллагаа амжилттай болсныг албан ёсоор батлав.

Аврах ажиллагаанд оролцсон бүх хүчин, техник хэрэгсэл Ираны агаарын хилээс бүрэн гарсан байна. Одоогоор нэр нь нууцлагдсан байгаа тус нисгэгч нь өнгөрсөн Баасан гаригт Иранд сөнөөгдсөн F-15E Strike Eagle сөнөөгч онгоцны багийн хоёр гишүүний нэг юм. Ажиллагааны эхний шатанд буюу Баасан гаригт эхний нисгэгчийг нь аварсан бөгөөд тэрбээр одоо аюулгүй газар байгаа аж.

Уг аврах ажиллагаа нь Ерөнхийлөгч Трампаас Иранд өгсөн хэлэлцээрийн ширээнд суух, эсвэл Ормузын хоолойг нээх тухай эцсийн хугацаа дуусахаас хоёр хүрэхгүй хоногийн өмнө болж буйгаараа онцлог юм.

Тагнуулын төв газар (CIA) нисгэгчийг хамгаалахын тулд "төөрөгдүүлэх" ажиллагаа явуулжээ

АНУ-ын засаг захиргааны өндөр албан тушаалтны мэдээлснээр, Тагнуулын төв газар (ТТГ) нисгэгчийг аврахаас өмнө түүнийг хамгаалах зорилгоор хууран мэхлэх ажиллагаа явуулсан байна. Нисгэгч олзлогдохоос зайлсхийж, нуугдаж байх хооронд ТТГ-аас Иран даяар "Америкийн цэргүүд нисгэгчээ хэдийнэ олсон, одоо Иранаас авч гарахаар бэлтгэж байна" гэх хуурамч мэдээллийг тараажээ. Үүний зэрэгцээ ТТГ нисгэгчийн байгаа байршлыг нарийн тогтоож, мэдээллийг Пентагон болон Цагаан ордонд шуурхай дамжуулсан байна.

"Reaper" дронууд аврах ажиллагаанд дэмжлэг үзүүлжээ. Нисгэгчийг аврахын өмнө түүний байршилд ойртсон Ираны зэвсэгт хүчнийхэнд АНУ-ын MQ-9 Reaper загварын дронууд цохилт өгсөн болохыг эх сурвалж мэдээллээ. АНУ Ирантай хийж буй зэвсэгт мөргөлдөөний явцад MQ-9 дронуудыг өргөнөөр ашиглаж байгаа бөгөөд одоогийн байдлаар 16 орчим дроноо алдаад байгаа юм. Мөн сөнөөгч онгоцууд дайсны талын саадыг арилгах, агаараас хамгаалахад чухал үүрэг гүйцэтгэжээ.

Баасан гаригт онгоц нь сөнөсөн нисгэгч бэртэл авсан байсан ч 36 гаруй цагийн турш Ираны талд баригдалгүй нуугдаж чадсан байна. Тэрбээр аврах багийнхантайгаа уулзахын тулд маш зоригтой, эрсдэлтэй алхам хийсэн гэж албаны хүмүүс онцолжээ.

Ерөнхийлөгч Трамп нисгэгчийн эр зоригийг бишрэн сайшааж, түүнийг Иранд байх хугацаанд Цагаан ордон болон Пентагон байршлыг нь тасралтгүй хянаж байсныг мэдэгдлээ.

Ерөнхийлөгч Трамп сураггүй болоод байсан F-15E онгоцны нисгэгчийг аварсныг баталж, энэхүү ажиллагааг "АНУ-ын түүхэн дэх хамгийн зоригтой эрэн хайх, аврах ажиллагааны нэг" гэж тодорхойлов. Тэрбээр Ням гарагийн өглөө "БИД ТҮҮНИЙГ АВЛАА!" хэмээн нийтэлжээ. Мөн нисгэгчийг хурандаа цолтой болохыг илчилж, "Тэр бэртсэн ч биеийн байдал нь сайн, аюулгүй байна" гэв.

Трамп нийгмийн сүлжээндээ:

"Сүүлийн хэдэн цагийн хугацаанд АНУ-ын Зэвсэгт хүчин манай гайхалтай офицеруудын нэг, өндөр нэр хүндтэй хурандааг аврахын тулд түүхэн дэх хамгийн зоригтой ажиллагааг явууллаа. Тэр одоо ЭНХ ТУНХ, АЮУЛГҮЙ байгааг дуулгахад таатай байна!" гэжээ.

Ерөнхийлөгч уг ажиллагааг Батлан хамгаалахын сайд Пит Хегсет, Штабын дарга нарын нэгдсэн хорооны дарга Дэн Кэйн нарын хамт Цагаан ордноос 24 цагийн турш хянаж ажилласан байна. Цагаан ордны хэвлэлийн төлөөлөгч Каролин Ливитийн мэдээлснээр, Трамп бүтэн өдөржин Зууван танхимд ажиллаж, Пит Хегсетээс цаг үеийн мэдээллийг шуурхай авч байжээ.

"Миний тушаалаар АНУ-ын Зэвсэгт хүчин түүнийг авчрахаар дэлхийн хамгийн хүчирхэг зэвсгээр тоноглогдсон олон арван нисэх онгоцыг илгээсэн. Энэхүү гайхамшигт ажиллагаа нь өчигдөр өөр нэг зоригтой нисгэгчээ аварсан амжилтын үргэлжлэл юм. Хоёр дахь ажиллагааг эрсдэлд оруулахгүйн тулд бид эхний нисгэгчийг аварснаа нууцалж байсан. Дайсны нутаг дэвсгэрийн гүнээс Америкийн хоёр нисгэгчийг тус тусад нь аварсан тохиолдол цэргийн түүхэнд бараг байгаагүй байх. БИД АМЕРИКИЙН ДАЙЧДАА ХЭЗЭЭ Ч ОРХИХГҮЙ!" хэмээн Трамп мэдэгдсэн байна.