Жилийн дотор 3.5 тэрбум төгрөгийн өрөнд орсон “Эрчист Монгол”-ыг татан буулгав

Эрчим хүч, дэд бүтэц, тээвэр ложистикийн 44 төрийн өмчит компанийн орлогын 1%-иар санхүүжих схем нь ажилласангүй.

Нэг жилийн өмнө байгуулсан төрийн өмчит “Эрчист Монгол” компанийг татан буулгах шийдвэрийг Засгийн газар өчигдрийн (2026.03.18) хуралдаанаараа гаргалаа. Анх байгуулагдахад нь ямар учир жанцантайг нь олон хүн ойлгоогүй. Захирлаар нь томилогдсон УИХ-ын гишүүн асан Г.Амартүвшин сарын өмнө “ажлаа явуулах нөхцөл боломж олгохгүй байгаа учраас ажлаа өгнө” хэмээн гэнэт мэдэгдсэн.

Монголд төрийн өмчит компаниудаа нэгтгэн удирдах бүүр том төрийн өмчит компани байгуулдаг уламжлалтай. Хамгийн тод жишээ нь стратегийн ордуудыг эзэмшдэг төрийн өмчитүүдээ нэгтгэн захирдаг “Эрдэнэс Монгол”. Сингапурын “Темасек”-ийн загварын дууриан 2007 онд байгуулагдсан “Эрдэнэс Монгол” өнгөрсөн 19 жилийн хугацаанд хэр үр ашигтай ажиллаж, эдийн засагт сайн загвар болж чадаагүй. “Эрдэнэс Монгол” бүтцэндээ 31 охин компанийг багтаадаг.

Харин өнгөрсөн жил байгуулагдаа, өчигдрөөс татан буугдаж байгаа “Эрчист Монгол” нь эрчим хүч, дэд бүтэц, тээврийн салбарын 44 төрийн өмчит компанийг нэгтгэсэн бүтэцтэй байсан. Энэ 44 компанийнхаа орлоыгн 1%-иар санхүүжих схемийг анх байгуулагдахад нь гаргаж байсан.

“Эрчист Монгол”-ыг татан буулгасан үндэслэлийг харвал тус компани анх зурсан санхүүгийн схемээрээ ажиллаж чадалгүй, урсгал зардлаа зээлээр санхүүжүүлж, 3.5 тэрбум төгрөгийн өрөнд баригджээ.