Тайландын тэрбумтан $138 саяар газар худалдан авлаа

Тайландын тэрбумтан Чароен Сиривадханабхакдигийн эзэмшдэг “Frasers Property” компани Орчард Роуд (Orchard Road) худалдааны гудамжинд байрлах хоол, ундааны чиглэлийн чухал байршил бүхий объектыг хувийн хэвшлийн “Royal Holdings” компаниас 175 сая сингапур доллар буюу 138 сая ам.доллароор худалдан авлаа.

“Cuppage Terrace” объектыг худалдан авсан нь “The Centrepoint” худалдааны цогцолборын арын газрыг 392 сая сингапур доллароор авснаас нь хойш зургаан сарын дараа болж байна. “Frasers Property” нь уг худалдааны төв болон зэргэлдээх үл хөдлөх хөрөнгүүдийг хамтад нь эзэмших болсноор хөрөнгийн үнэ цэнийг өсгөх, урт хугацааны үр өгөөж бий болгох чиглэлээр илүү уялдаа холбоотой бодлого явуулах боломжтой болж байгаа юм.

“Frasers Property Singapore”-ийн гүйцэтгэх захирал Сун Су Лин: “Cuppage Terrace-ийг худалдан авснаар Орчард Роуд дагуух бидний оролцоо бэхжиж, илүү уялдаатай, амьд цогцолбор бүсийг бий болгох боломжтой болж байна. “The Centrepoint”-ийн эзэмшлийг нэмэгдүүлсэнтэй хамт энэхүү хэлцэл нь зэргэлдээ байршлуудын харилцан ашигтай байдлыг нээж, Орчард Роудыг шинэчлэх ажлуудад хөрөнгө оруулалтаа илүү сайн хуваарилах боломжийг олгож байна” гэж мэдэгдэлдээ дурджээ.

“Cuppage Terrace” нь баар, зоогийн газраас бүрдсэн Перанакан хэв маягийн 17 түүхэн дэлгүүр-байшингаас бүрддэг. Энэ нь аав, хүү хоёр болох Раж Кумар, Кишин нарын удирддаг “Royal Holdings”-ийн эзэмшлийн хэд хэдэн үнэ цэнтэй хөрөнгийн нэг байв. Нийт 3.2 тэрбум ам.долларын хөрөнгөтэй тэд Сингапурын хамгийн баян хүмүүсийн тоонд ордог. Тэдний гол хөрөнгүүдэд Кларк Ки (Clarke Quay) дэх 442 өрөөтэй “Holiday Inn Express”, “Holiday Inn Little India” болон “Intercontinental Singapore Robertson Quay” зочид буудлууд багтдаг.

“The Centrepoint” нь 1980-аад оны эхээр анх баригдсан бөгөөд “Frasers Property”-ийн Орчард Роуд дагуух хамгийн чухал гол хөрөнгө юм. Мөн тус компани худалдааны цогцолборын ард байрлах оффисын 10 давхар “51 Cuppage Road” барилгыг эзэмшдэг.

“Frasers Property” нь Чароен болон түүний гэр бүлийн эзэмшлийн компаниудын нэг бөгөөд Forbes сэтгүүлийн мэдээллээр тэдний хөрөнгө 12.2 тэрбум ам.доллароор үнэлэгдэж, Тайландын хамгийн баян гэр бүлүүдийн тоонд орж байна. Тэд мөн “Chang” шар айраг үйлдвэрлэгч “Thai Beverages”, сав баглаа боодлын “Berli Jucker”, Тайландын үл хөдлөх хөрөнгийн хөгжүүлэгч “Asset World” болон Тайландын “Big C Supercenter” гипермаркет сүлжээнд хувь эзэмшдэг юм.