“Сила Сибири-2”-ыг хугацаанаас нь өмнө ашиглалтад оруулна гэж “Газпром” мэдэгдлээ

“Сила Сибири-2” хоолойг хугацаанаас нь өмнө ашиглалтад оруулна хэмээн “Газпром”-ын тэргүүн Алексей Миллер 2025 оны жилийн эцсийн тайландаа дурджээ. Оросоос Хятад руу хий нийлүүлэх 2600 км урттай хоолойг төлөвлөгөөний дагуу 2031 он гэхэд ашиглалтад өгөх юм.

Энэхүү хоолойн 960 км нь Монголын нутгаар тавигдана.

Жилдээ 50 хүртэл тэрбум куб  метр хий дамжуулах хүчин чадалтай энэхүү хоолойг төлөвлөсөн хугацаанаас өмнө ашиглалтад оруулна хэмээн “Газпром”-ын тэргүүн мэдэгдсэн нь гэнэтийн байсан бөгөөд Кремлийн эрчим хүчний стратег өөрчлөгдсөнтэй холбоотой хэмээн зарим шинжээч үзжээ.

Оросын баталсан Эрчим хүчний стратегийн баримт бичгээр 2050 он гэхэд байгалийн хий олборлолтыг 38-60 хүртэл хувиар нэмэгдүүлэхээр тусгасан. “Байгалийн хийн эрэлт улам нэмэгдэх төлөвтэй байгаа, нөгөө талаар энэ салбарт Оросын өрсөлдөгчид болох Туркменистан, Узбекистаны нөөц дуусах тийшээгээ хандана гэсэн төсөөлөлд үндэслэсэн. “Газпром”-ын хувьд Хятад руу нийлүүлэх хийгээ ойрын хугацаанд нэмэгдүүлэх тал дээр гол бооцоогоо тавьж байгаа учраас ийнхүү “Сила Сибири-2”-ын бүтээн байгуулалтын хугацааг урагшлуулж байгаа байх” хэмээн Freedom Finance Global-ийн шижээч Наталья Мильчакова хэлжээ.

Хэд хоногийн өмнө ОХУ-ын Ерөнхий сайдын орлогч Александр Новак шингэрүүлсэн хийн үйлдвэрлэлийг 2030 он гэхэд жилдээ 100 сая тонн хүргэнэ хэмээн мэдэгдсэн.

Хятад руу хий нийлүүлэх асуудлаар хууль эрх зүйн зарим тохиролцоонд энэ 2025 онд хүрсэнийг Алексей Миллер онцолсон байна. “Газпром”-ын хувьд энэ төсөл нь дэлхийд томд тооцогдох төсөл гэдгийг бас онцолжээ.

“Сила Сибири-2” төсөл нь Оросын эрчим хүчний экспортыг нэмэгдүүлэхээс гадна одоогоор хийн дэд бүтэц хөгжөөгүй байгаа Сибирь, Алс Дорнодын бүс нутгийн иргэдийг хийгээр хангах давхар ач холбогдолтой юм.