ОХУ-ын Сибир дэх лабораторид тахал өвчний улмаас хүн нас барсан байж магадгүй байгаа тул АНУ-ын тал нөхцөл байдлыг ажиглаж эхэллээ

ОХУ тус лабораторийн ажилтны нас барсан шалтгааныг “тодорхойгүй уушгины үрэвсэл”-тэй холбон тайлбарлаж байна.

Al Jazeera (2026-10-05)

Сибирийн Эрхүү мужийн тахал судлалын хүрээлэнгийн нэгэн ажилтан уушгины тахлын халдварын улмаас нас барсан байж магадгүй талаар тус бүс нутгийн албаны хүмүүс мэдээлэв. Үүнтэй холбогдуулан хэдэн арван хүнийг тусгаарлаад байгаа юм.

Буриад улсын тэргүүн Алексей Цыденов Бямба гаригт өөрийн Telegram сувагтаа хөрш Эрхүү мужид нэгэн эмэгтэй “тахлын улмаас нас барсан байж магадгүй” гэж мэдэгдсэн байна. Гэсэн хэдий ч Цыденов орон нутгийн иргэдийг тайван байхыг уриалж, тус эмэгтэй Буриад руу зорчоогүй болохыг Оросын эрх баригчид баталсан гэдгийг онцолжээ.

Оросын албан ёсны ТАСС агентлагийн Ням гаригт мэдээлснээр, тус улсын хэрэглэгчдийн эрх ашгийг хамгаалах "Роспотребнадзор" байгууллага Сибирь ба Алс Дорнодын тахал эсэргүүцэх эрдэм шинжилгээний Эрхүүгийн хүрээлэнгийн нэгэн ажилтан "шалтгаан нь тодорхойгүй уушгины үрэвсэл" гэж оношлогдсон тухай мэдэгдсэн байна.

Мөн тус байгууллагаас өвчтөнөөс авсан сорьцоос түүний мэргэжлийн үйл ажиллагаатай холбоотой бичил биетэн илрээгүй гэж мэдэгдэв. Орон нутгийн хэвлэлүүдийн мэдээлснээр Эрхүүгийн эрх баригчид 200 орчим хүнийг эмнэлгийн хяналтад аваад байна.

Америкийн Нэгдсэн Улсын Төрийн департамент "Аль-Жазира" агентлагт өгсөн мэдэгдэлдээ "Вашингтон уг нөхцөл байдлыг Өвчний хяналт, урьдчилан сэргийлэх төв (CDC) болон бусад салбар хоорондын түншүүдийн хамт анхааралтай ажиглаж байна" гэжээ. Мөн "Бид Оросын эрх баригчдыг үнэн зөв мэдээллийг түргэн шуурхай, нээлттэй хуваалцахыг уриалж байна" гэж Төрийн департаментын төлөөлөгч онцолсон байна.

Уушгины тахал нь ихэвчлэн жижиг хөхтөн амьтад болон тэдний бөөсөнд агуулагддаг Yersinia pestis бактериар үүсгэгддэг. Дэлхийн Эрүүл Мэндийн Байгууллага (ДЭМБ)-ын мэдээлснээр тахал нь маш өндөр халдвартай бөгөөд эрт үед нь эмчлэхгүй бол амь насанд аюултай байдаг.

Орон нутгийн хэвлэлүүдийн мэдээлж байгаагаар нас барсан эмэгтэй нь лабораторийн техникчээр ажиллаж байсан 28 настай Дарья Шипилова болох нь тогтоогджээ.