Монгол Улс анхны нүүрс баяжуулах үйлдвэртэй болсноор 15 жил өнгөрчээ

Арван таван жилийн өмнөх энэ өдөр өмнийн говьд Монголын анхны нүүрс баяжуулах үйлдвэр ашиглалтад орсон нь уул уурхай, аж үйлдвэрийн салбарын түүхэн үйл явдал байлаа.

Ухаа худагийн нүүрс баяжуулах үйлдвэр ашиглалтад орсноор Монгол Улс олон улсын зах зээлд өрсөлдөхүйц чанартай коксжих нүүрс экспортолдог болсон юм. Өмнө нь энгийн түүхий эд байсан нүүрсийг угааж, боловсруулдаг болсноор ажлын байр нэмэгдэж, эдийн засаг, технологи, боловсролын салбарт реформ болж чадсан.

Энэ үйлдвэр Австралийн дэвшилтэт технологид тулгуурлан байгуулагдсан ч өнөөдөр түүнийг амжилттай ажиллуулж байгаа хүмүүс нь Монголын залуус юм. Тэд Австрали, Герман, Хятад, Энэтхэг зэрэг оронд суралцаж, туршлага хуримтлуулсны үр дүн өнөөдөр харагдаж байна. Энэ амжилтын ард зөвхөн техник биш, хүний мэдлэг боловсролд хийсэн хөрөнгө оруулалт бий.

Говьд ус маш үнэтэй. Тиймээс үйлдвэр хаягдал усныхаа 95 хувийг дахин ашиглах технологи нэвтрүүлсэн. Мөн нүүрсний бүх давхаргыг ашиглан баяжуулдаг нь байгалийн баялгаа илүү үр ашигтай ашиглах зорилготой.

“Ухаа худаг” нүүрс аж үйлдвэрийн цогцолборт 2900 гаруй монгол хүн ажиллаж байна. Тэд зөвхөн нүүрс баяжуулаад зогсохгүй Монгол Улсын эдийн засагт бодит хувь нэмэр оруулж байна.

Байгалийн баялаг олон оронд бий. Харин тэр баялагтаа мэдлэг, хөдөлмөр шингээж үнэ цэн бүтээдэг улс орон л хөгжилд хүрдэг. Ухаа худагийн нүүрс баяжуулах үйлдвэр бол баялаг бүтээдэг уул уурхайн бүтээн байгуулалт юм.