Х.Нямбаатар АНУ-д, Б.Баатар Лондонд, А.Амундра Канадад “орогнож” байна

Улаан махны хэргээс болж, албан тушаалаасаа огцорсон нийслэлийн Засаг дарга асан Х.Нямбаатарыг Японы Токио хотод үнэтэй ресторанд үйлчлүүлээд явж байгаа гэх албан бус мэдээллийг иргэд олон нийтийн сүлжээнд цацсан.

Өнгөрсөн долоо хоногт УИХ-ын Төсвийн байнгын хороогоор нийслэлийн өнгөрсөн гурван жилийн төсвийн зарцуулалтад хяналтын ерөнхий сонсгол хийж, Х.Нямбаатарыг гэрчээр дуудсан боловч ирж оролцоогүй. Хяналтын сонсгол болохоос өмнө Ерөнхий сайд Н.Учрал, Засгийн газрын Хэрэг эрхлэх газрын дарга Б.Энхбаяр руу олон нийтийн сүлжээнд хэрүүлийн үг дайж суусан уг үйл явдлын дараа "усанд хаясан чулуу" мэт алга болсон.

Өөрөөр хэлбэл, өдөр шөнөгүй лайвддаг байсан хотын экс дарга нүүр номдоо ч“үзэгдэж, харагдах”-аа больсон нь учир шалтгаантай аж. Түүнийг Японоор дамжин Швейцарь руу гарсан гэсэн албан бус мэдээлэл сошиалаар гарч буй. Тэгвэл Х.Нямбаатар нь Швейцарьт биш АНУ-ыг зорьжээ. АНУ-д УИХ-ын гишүүн Л.Оюун-Эрдэнэ мөн адил амьдарч байгаа гэсэн хоёр ордны тамхины цэгийн хов ч сонсогдох болсон.

Мөн экс Ерөнхий сайд Л.Оюун-Эрдэнийн зөвлөх асан А.Амундра Канадад нуугдаж байгаа аж. А.Амундра нь "Бодь Интернэшнл" ХХК-ийн Гүйцэтгэх захирал байхдаа оффтейк гэрээ, төмөр замын бүтээн байгуулалтын санхүүжилтээс хувь хүртсэн болон хууль бус гүйлгээ хийсэн гэх авлига, албан тушаалын хэрэгт холбон АТГ-аас мөрдөн шалгалтыг эхлүүлэх үеэр гадагшаа зугатсан байдаг. Харин Херо.Баатар Лондод амьдарч байгаа гэсэн мэдээлэл ч байна.

АТГ-аас "Тамгагүй төр"-ийн санхүүжилт нүүрсний хулгайн мөнгө байж болзошгүй гэж мөрдөн шалгалт явуулж байсан бол ТЕГ-аас үндэсний эв нэгдлийг бусниулах зүйл ангиар, ЦЕГ-аас мөнгө угаасан, бусдын хөрөнгийг дээрэмдсэн гэх үндэслэлээр "Херо энтертаймент"-ийн ерөнхий захирал Б.Баатарыг шалгаж эхэлсний дараахан тэрбээр гадагшаа зугатсан байдаг.

Ямартай ч тэд авлига, албан тушаалын гэмт хэрэгт нэр холбогдонгуутаа сүүлээ хавчаад, шувуу болоод зугатсан. Хэрэвзээ гэм буруугүй байсан бол гутлаа тослоод, зангиагаа зүүгээд бардам очих байв. Үүгээрээ тэд авлига, хулгай, луйврын томоохон фактуудтай байна гэж харагдаж, уншигдаж байна.