Google компанийн зах зээлийн үнэлгээ нь $190 тэрбумаар буурлаа

Энэ сарын 6-ны өдөр Google-ийн хиймэл оюун ухааны (AI) судалгааг тэргүүлж байсан дөрвөн шилдэг эрдэмтэн нэг өдөр ажлаасаа гарснаар тус компанийн хувьцааны ханш 4.05%-аар уналаа. Энэ нь сүүлийн хагас жилийн хугацаанд тохиолдож буй түлхүүр мэргэжилтнүүдийн хоёр дахь томоохон шилжилт хөдөлгөөн болж байна. Өмнө нь буюу 6 дугаар сарын 22-нд 2017 оны "Transformer" өгүүллийн хамтран зохиогч Ноам Шазирт (Noam Shazeer) OpenAI руу, мөн 2024 оны Нобелийн Химийн шагналт Жон Жампер (John Jumper) Anthropic руу шилжих болсныг мэдээлсний дараа Alphabet компанийн хувьцаа 4.99%-аар буурч байсан юм.

Нью-Йорк таймс сонинд мэдээлснээр Google-ийн ерөнхий эрдэмтэн, 58 настай Жефф Дин тун удахгүй компаниасаа гарч, шинээр байгуулагдаж буй ‘Discovery Loop’ компанийн CEO-гоор ажиллахаар болжээ. Дин нь 1999 онд Google-ийн 30 дахь ажилтан болж орсноос хойш 27 жилийн турш ажилласан байна.

Тэрбээр хайлтын систем, дэд бүтцийн MapReduce, BigTable технологиудын хөгжүүлэлтийг тэргүүлж, улмаар 2011 онд хиймэл оюун ухааны судалгааны "Google Brain" байгууллагыг үүсгэн байгуулахад гол үүрэг гүйцэтгэсэн юм.

Түүнтэй хамт ажлаасаа гарч буй мэргэжилтнүүдийн дунд Динтэй 20 гаруй жил хамтран ажилласан Санжай Гемават (Sanjay Ghemawat), өнөөгийн AI чатботуудын судалгааны суурийг тавьсан Куок Ле (Quoc Le) болон 2023 оноос хойш Динтэй хамт Gemini моделийн дизайныг хариуцаж байсан Ориол Виньялс (Oriol Vinyals) нар багтаж байна. NYT-ийн мэдээлснээр, "Эдгээр дөрвөн судлаачийн гурав нь хиймэл оюун ухааны салбарт, хоёр нь тархмал системийн салбарт хамгийн олон эш татагдсан эрдэмтэд" юм. Дин "Бид машин сургалт, шинжлэх ухаан болон инженерчлэлийг автоматжуулах замаар нээлт, ахиц дэвшлийг хурдасгах зорилго бүхий 'Discovery Loop' нийгмийн тустай корпорацийг (PBC) байгуулж байна" гэж мэдэгджээ. Тус компани эхний ээлжинд машин сургалтын судалгааг автоматжуулахад анхаарлаа хандуулж, цаашлаад эмчилгээний шинэ эм гаргаж авах, цэвэр эрчим хүч болон кибер аюулгүй байдлын салбар руу үйл ажиллагаагаа тэлэхээр төлөвлөж байна.

Анхны хөрөнгө оруулалтыг Radical Ventures болон Khosla Ventures сангууд хамтран тэргүүлж, Alphabet компани мөн оролцсон байна. Google ядаж эхний жилдээ үүлэн тооцооллын партнераар ажиллаж, тооцоолон бодох нөөц бололцоогоор хангах аж. Хөрөнгө оруулалтын хэмжээ болон компанийн үнэлгээг хараахан нийтэд зарлаагүй байна.

Яг энэ өдөр Google хиймэл оюун ухааны удирдах бүрэлдэхүүндээ бүтцийн өөрчлөлт хийж байгаагаа зарласан. Гүйцэтгэх захирал Сундар Пичай "Google DeepMind-ийн гүйцэтгэх захирал Демис Хассабис (Demis Hassabis) ТУЗ-ийн дарга бөгөөд ерөнхий эрдэмтний албан тушаалд шилжиж, DeepMind-ийн технологийн дарга асан Корай Кавукчуоглу (Koray Kavukcuoglu) ахлах дэд ерөнхийлөгчөөр дэвшин, хиймэл оюун ухааны бүх моделийн хөгжүүлэлтийг хариуцна" гэж мэдэгдэв.

CNBC-ийн мэдээлснээр Кавукчуоглу нь Gemini 4-ийн хөгжүүлэлтийг ахлан ажиллах юм. Харин Хассабис AI-д суурилсан шинэ эм гаргах чиглэлээр ажилладаг 'Isomorphic Labs' охин компанийн тэргүүний албан тушаалаа хэвээр хадгалж үлдэнэ.

Пичай нэмж хэлэхдээ, "Жефф, Санжай нар анхны хайлтын дэд бүтцээс эхлээд орчин үеийн AI эрин үеийг эхлүүлсэн нейрон сүлжээ хүртэлх хамгийн чухал технологийн шинэчлэлтүүдийг 27 жилийн турш удирдан чиглүүлж ирсэн" хэмээн онцолж, шинэ гарааны компанитай цаашид хамтран ажиллах эрмэлзэлтэй байгаагаа цохон тэмдэглэв.

Энэхүү мэдээний дараа Google-ийн хувьцааны ханш 4.05% буурч хаагдсан ч үндсэн арилжааны дараах цагаар 0.79%-аар эргэн өссөн байна. Нийт 3.95%-ийн уналт нь тус компанийн $4.61 их наядын зах зээлийн үнэлгээнээс ганцхан өдрийн дотор ~$190 тэрбумыг арчин хаяжээ.

Блүмберг тус бүтцийн өөрчлөлтийг "газар хөдлөлттэй адил томоохон шилжилт" гэж тодорхойлоод, "өрсөлдөөн хурдацтай ширүүсч буй энэ салбарт тус компанийн манлайлах чадварт эргэлзээ төрүүлж байна" гэж дүгнэсэн байна.

Google-ийн санхүүгийн үзүүлэлт тийм ч муу байгаагүй юм. 6 дугаар сарын 30-наар дуусгавар болсон улиралд орлого нь 24%-аар өсөж, $119.8 тэрбумд хүрсэн бөгөөд Google Cloud-ийн орлого 82%-аар өсөж, $24.8 тэрбум болсон байна. Гэсэн хэдий ч түлхүүр AI мэргэжилтнүүдийн шилжилт дарааллан гарсан нь ирээдүйн тодорхойгүй байдлыг нэмэгдүүлжээ. Google одоог хүртэл өөрийн хамгийн сүүлийн үеийн Gemini 3.5 Pro загвараа зах зээлд гаргаагүй байна. Business Insider-ийн мэдээлснээр Gemini Pro-ийн нээлт код бичих гүйцэтгэлийн асуудлаас болон энэ онд хэд хэдэн удаа хойшлогдсон юм.