Европын халууны хямрал

Аагим халууны үеэр Лондон хотын төвийн зорчигчид. 6 сарын 24

Агааржуулагчгүй орчинд ажиллагсад халууны стресст орсноор хөдөлмөрийн бүтээмж эрс буурдаг.

The Wall Street Journal (2026-08-18)

Европ тив энэ зун дараалсан аагим халуун өдрүүдийг туулж байгаа бөгөөд агааржуулагчаас татгалзах тэдний "ногоон" үзэл бодол нь эдийн засагт нь сөрөг үр дагавар авчирч байна. Цаг агаар халахын хэрээр ажиллах хүчний байдал доройтож, бизнесийн бүтээмж буурч байна.

"Allianz Research"-ийн судалгаагаар Европын олонх оффис, орон сууц дулаан хадгалах зориулалттай бөгөөд агааржуулагчийн хэрэглээ ердөө 19% байна. Энэ нь Америкийн 90%-тай харьцуулахад маш бага үзүүлэлт юм. Үүний уршгаар дотор орчинд ажилладаг хүмүүс бөгчим халууны зовлонг амсч байна.

Энэхүү сөрөг нөлөө нь зөвхөн тухгүй байдлаар хязгаарлагдахгүй. Халууны стресс нь ажилтнуудын унтаж амрах, сэтгэн бодох, шийдвэр гаргах чадвар болон ажлын гүйцэтгэлд муугаар нөлөөлдөг. Цаг агаар Цельсийн 30-аас 35 хэм хүрэхэд хэм тутамд ажилтны цагийн бүтээмж $1.30-аар буурдаг болохыг уг тайланд дурджээ. Энэ нь Европын бизнесийн ашиг ба өрсөлдөх чадварыг бууруулж байна.

Аагим халуун жилүүдийн бүтээмжийг судлахад халуун агаар Европын ДНБ-ийг 0.3%-аас 0.5%-иар, өмнөд бүс нутгуудад 1%-иас дээш хувиар бууруулдаг гэсэн дүгнэлт гарчээ. Энэ нь татварын орлогыг багасгаж байгаа бөгөөд ялангуяа төсвийн алдагдал өндөртэй Франц зэрэг оронд томоохон цохилт болж байна.

Уур амьсгалын өөрчлөлтийг сааруулах зорилт биелсэн ч Европ дахинд дулаарлаас үүдэлтэй эдийн засгийн хохирол учирсаар байх болно. Гэхдээ цаг агаарт дасан зохицох замаар хохирлыг бууруулах боломжтой. 2050 он гэхэд агааржуулагчийг өргөн хэрэглэснээр жилд 40-өөс 60 тэрбум еврогийн эдийн засгийн ашиг олох бөгөөд халуунаас үүдэлтэй нас баралтыг бууруулах чухал ач холбогдолтой юм. Сэрүүцүүлэгчээ асаагаарай.