Биеэ ч, гэрээ ч засаагүй хүнээр төр бариулах осолтой!

Биеэ засаад гэрээ зас, гэрээ засаад төрөө зас гэдэг. Биеэ ч, гэрээ ч засаагүй хүнээр төр бариулсны гашуун сургамжийг Ерөнхийлөгч асан Х.Баттулгаас, Ерөнхий сайд асан Л.Оюун-Эрдэнээс монголчууд авсан. Тэрхүү алдаагаа монголчууд ахин давтахгүй гэж найдъя.

2027 оны Ерөнхийлөгчийн сонгуульд парламентад суудалтай таван нам оролцох эрхтэй. Иймээс Монголын улс төр-бизнесийн том бүлэглэлүүд, том мөнгөний зодоонд их эртнээс бэлдэж эхэлсэн. Экс Ерөнхийлөгч Х.Баттулга гэхэд нэкстийн төлөө олон хүн "гардан" сойх болсны нэг нь Т.Ганболд юм.

Тордойн Ганболд гэнэт хэвлэлийн камераас салахаа больсон нь тохиолдол биш нь мэдээж. Тэрбээр 2027 оны Ерөнхийлөгчийн сонгуульд горилогчдын нэг болж, жилийн өмнөөс хувийн бэлтгэлдээ орсон нь энэ аж.

Африкт алтны бизнес эрхэлж, Эмиратад наймаа хийж байгаад Монголдоо ирсэн тэрбээр микрофоны өмнө суугаад “Би 55 нас хүрчлээ” хэмээн зарлах болсны цаана МАНЖ мафи бий гэдэг нь мэдээж хий хоосон хардлага биш. Монголын улс төрд санамсаргүй тохиол гэж огтоос байдаггүй, байгаагүй. Т.Ганболдыг гаргаж ирсэн нь тодорхой зорилготой, зохион байгуулалттай, гол найруулагчтай улс төрийн нэг сценари.

Гэвч хувь хүний намтар нь ч, бие хүний араншингаараа ч Т.Ганболд нь онцгүй гэх тодорхойлолттой. Гэр бүлийн хүчирхийлэгч, хууль бусаар гэрлэлтийн гэрчилгээгээ устгуулсан, авааль эхнэрийнхээ эзэмшлийн хөрөнгийг дээрэмдэж авсан гэх хар бараан дуулианы эзэн.

Ерөнхийлөгч асан Н.Энхбаяр 2006 онд Т.Ганболдыг Дарханы төмөрлөгийн үйлдвэрийн захирлаар томилсноор тэр улс төрийн хүрээлэлд орсон байдаг. Н.Энхбаярыг хуулийн байгууллагаас шалгах явцад Т.Ганболдыг ч ганбөмбөлгийн хэргээр баривчлан шалгаж байсан ч удаатай. "Корпорейт" буудлын сүлжээ бизнесчин Т.Ганболд 2011 онд $300 саяын өртэй “Алтан Дорнод Монгол” компанийг худалдаж авснаар асар хөлжсөн, Монголын тэрбумтан болсон. МАН-д 2006 онд элссэн ч, сонгуульд нэр дэвших боломжгүй явсаар 2015 оноос ХҮН намын гол санхүүжүүлэгч болсон ч таарч тохироогүйн улмаас зам, мөрөө хөөсөн.

Давуу тал нь мөнгөтэй Т.Ганболдод 2024 онд МАН-ын дарга Л.Оюун-Эрдэнэ, АН-ын дарга Л.Гантөмөр нар УИХ-ын сонгуульд нэр дэвших санал тавьсан байсан гэх. Сул тал нь тэр Монголын мянга, мянган луйварчдын нэг. ОХУ-ын иргэн С.Паушокоос гадна “Буян” компанийн захирал Б.Жаргалсайхан, иргэн Н.Цогтгэрэл нарын хүмүүс ч Т.Ганболдод залилуулсан тухай мэдээлэл байдаг.

Т.Ганболд “Алтан Дорнод Монгол” компанийг ОХУ-ын иргэн С.Паушокоос худалдаж авах үедээ буюу 2011 онд Ерөнхий прокурор байсан Д.Дорлигжавт төрсөн дүү Д.Баатарынх нь дансаар дамжуулан $ 4 сая өгсөн гэж 2018 онд хэлсэн. Өөрөө дээрэмдүүлсэн, хохирогч гэдэг ч үнэн хэрэгтээ авлига өгсөн гэдгээ л хүлээн зөвшөөрсөн. Харин шүүхээс хэргийг хэрэгсэхгүй болгож шийдвэрлэсэн байдаг.

С.Паушок ба Алтан Дорнод Монгол

Монголын орд Монгол бизнесмэнд ирсэнд талархаж байсан ч үнэхээр бизнесийн зарчмаар авсан уу эсвэл... гэх асуулт өнөөдөр ч эргэлзээтэй хэвээр байна. ОХУ-ын иргэн С.Паушок “ Т.Ганболд төрийн өндөр албан тушаалтнуудын дэмжлэгтэйгээр компанийг минь үнэгүйдүүлж авсан” гэж гомдол мэдүүлдэг. Энэ асуудалтай “Д.Дорлигжавт $ 4 сая өгсөн” гэх баримт огт холбоогүй гэж хэлэх аргагүй. Хэдийгээр шүүхийн маргаан Т.Ганболдын талд гарсан ч С.Паушок Монголын хэвлэлд өгсөн ярилцлагадаа “ Т.Ганболд Монголын хууль сахиулах байгууллагууд миний нөлөөнд байдаг. Эрүүгийн хэрэг үүсгэх, хаах эсэхийг би мэднэ” гэж хэлснийг баримтжуулсан гэжээ.

Гэр бүлийн маргаан ба ХОМ-ээ худлаа мэдүүлсэн үү?

Эхнэр Х.Янжингаажид нь 2022 онд гэр бүлийн хүчирхийлэл үйлддэг, хөрөнгөө нуун дарагдуулсан, 2020 оны сонгуулиар ХОМ-ээ хуурамчаар мэдүүлсэн гэх асуудалд буруутган олон нийтийн сүлжээнд багагүй шуугиан тарьж байв. Тэрбээр 30 гаруй тэрбум төгрөгийн хөрөнгөтэй гэж мэдүүлсэн ч эхнэр Х.Янжингаажид нь 200 тэрбум давна гэдгийг баталсан байдаг.

Бусдын $ 650 мянгын хувьцааг дээрэмдсэн үү?

Иргэн Н.Цогтгэрэл 2020 онд АТГ болон ЦЕГ-т хандан “ Алтандорнод Монгол” ХХК-ийн 100 хувийн хувьцаа эзэмшигч Британийн Виржиний арлуудын нутаг дэвсгэрт бүртгэлтэй “Голдстрим Монголиа Инк” компанийн нийт хувьцааны таван хувь болох $ 650 мянгын үнэтэй 2500 ширхэг хувьцааг иргэн Т.Ганболд, М.Идэр, Б.Батзориг нар нь хуурамч бичиг баримт бүрдүүлэх замаар хууль бусаар авсан. Мөн “Алтандорнод Монгол” ХХК-ийн болон лицензийг нь шилжүүлэн авсан “Бат бродерс” ХХК-ийн ашигт малтмалын тусгай зөвшөөрлийн бүх хэлцэл наймаануудыг шалган тодруулж, хууль ёсны дагуу худалдагч тал нь зохих татвараа төлсөн эсэх, худалдан авагч тал лицензийн төлбөрт бодитойгоор хэдэн төгрөг төлсөнийг шалган тодруулахыг хүссэн байдаг.

Энэ мэт хар бараан намтартай, гэрээ бүү хэл биеэ засаж чадаагүй хүн төрөө засна гэхэд тун хэцүүхэн сонголт болно. Тэгээд ч Х.Баттулга юу хийлээ, Л.Оюун-Эрдэнэ яалаа!

Н.БАТ