Мураками анх удаа эмэгтэй гол дүрийг бүтээлээ

Гурван жил гаруй завсарласны эцэст Харуки Мураками шинэ зохиолоо гаргах гэж байна. “Кахогийн түүх” нэртэй шинэ зохиол ирэх 7-р сарын 3-нд нээлтээ хийх юм. 352 хуудастай шинэ зохиолын гол дүр нь эмэгтэй бөгөөд Мураками анх удаа эмэгтэй хүнийг гол дүр болгосноороо онцлог.

Зохиол хэвлэмэл болон цахим хэлбэрээр зэрэг гарах ажээ.

Зохиолын гол дүр нь 26 настай, хүүхдийн зохиолч Кахо бүсгүй юм. 2024 оны 6-р сараас 206 оны 3-р сар хүртэл Shincho сэтгүүлд цуврал өгүүлүүдийг нэгтгэн зохиол болгожээ. Кахо бүсгүй сохор залуутай болзоно, харин сохор залуу “Би олон эмэгтэйтэй уулзаж явсан, гэхдээ тан шиг царай муутай эмэгтэйг хараагүй” хэмээн хэлдэг. Залуугийн хэлсэн үгэнд ямар далд утга нуугдаж байгааг Кахо бүсгүй таахаар оролдох хооронд амьдралд хачин зүйлс дараалан тохиолдож эхэлдэг байна. Эдүгээ 77 настай Харуки “анх удаа эмэгтэй гол дүрийг бүтээх нь амар байгаагүй, гэхдээ мэдээж би тэр бүсгүйн дүрд хувилсан” хэмээн The New York Times-д өгсөн ярилцлагадаа хэлжээ. Мөн шинэ бүтээл өмнөх зохиолуудаас илүү өөдрөг өнгө аястай хэмээн тодорхойлжээ.

Эмэгтэй хүнийг эергээр харуулдаггүй гэсэн олон жилийн шүүмжлэлийн хариу нь шинэ зохиол болж байна хэмээн утга зохиол шүүмжлэгчид бичиж байна.

Харуки Мураками нь 47 жилийн зохиолчийн карьерынхаа туршид 15 роман бичсэн бөгөөд романууд нь дэлхийн 50 гаруй хэл рүү орчуулагдсан юм. Түүний романы ихэнх нь монгол хэл дээр орчуулагдан хэвлэгдсэн.