“DIOR”-ын шинэ чиглүүлэгч

Загварын ертөнцийн хамгийн нөлөө бүхий өвөрмөц сэтгэлгээтэй дизайнераар “DIOR”-ын бүтээлч захирлаар 2025 онд томилогдсон Жонатан Андерсоныг нэрлэдэг. Уламжлалт ойлголтыг эвдэж, орчин үеийн урлаг, гар урлал, хүйсгүй загвар, этгээд шийдлийн төгс хослолыг хэрэглэгчдэдээ санал болгож чаддаг учраас тэр үргэлж өндөр зэрэглэлийн брэндийн эздийн анхаарлыг татдаг.

ОРГИЛУУН ЭРЧ, ХҮЧ

“Би амьдралынхаа турш үргэлж боломж багатай тэмцэгч байлаа” гэж Андерсон хэлэв. Парис дахь “Dior”-ын ордонд гэрэл зурагчин Анни Лейбовиц “Vogue” сэтгүүлийн 2026 оны хаврын дугаарт зориулж Жонатан Андерсоны зургийг авах гэж хичээж байлаа. Зэрэгцээд Далла Коллетта /дизайн хариуцсан захирал/ бэлэн хувцасны загварын онцлох деталь, оёдлын талаар Андерсонд нэгбүрчлэн танилцуулна.

Өдгөө 41 настай ирланд залуу “Dior” брэндийн түүхэнд эрэгтэй, эмэгтэй бэлэн хувцас, гоёл чимэглэл, үнэртэн, гэр ахуй гээд бүх салбарыг нь зэрэг удирдаж байгаа анхны хүн. “Loewe” брэндэд ажилласан 11 жилийн хугацаанд тэрээр брэндийн уламжлалт сонгодог эсгүүр, тусгай техник, хээ угалз, логог өөр өөр цаг үе, соёл, урлагийн чиглэлүүдтэй гайхалтай хослуулж, олныг алмайруулж чадсан юм.

РАДИКАЛ: ЭРЖ ХАЙ

Андерсон “Радикал”-ыг юу шинэ байж болох вэ гэдгийг цуцашгүй эрж хайх гэж тайлбарладаг. “Dior”-т ирээд Туйлригийн цэцэрлэгт хүрээлэнд хийсэн эмэгтэй загварын анхны шоу нь тус брэндийн 78 жилийн түүхийг аймшгийн кино мэт эвлүүлсэн бичлэгээр эхэлсэн байдаг. Тэр Dior-ыг залуурдахад надад төрж байгаа “айдас” гэж үүнийгээ тайлбарласан.

Андерсон “Би өмнө нь хэзээ ч ийм их дарамт мэдэрч байгаагүй. Гэхдээ брэндээс эмээсэн юм биш. Загварын ертөнцийг “аврах” хүн байна гэх хүн бүрийн харц, надаас хүлээж байгаа итгэлээс үүдэлтэй” гэж “Dior”-ын ордон дахь мэдрэмжээ хуваалцжээ.

ХҮЙСГҮЙ ГОО ҮЗЭМЖ

Жонатан 2013 онд өөрийн нэрийн брэндийн эрэгтэй загварт анх банзал оруулж ирснээр шуугиан тарьсан юм. Тэр Dior-т ирээд эрэгтэй, эмэгтэй загварт ч харилцан солигдох шинж чанарыг нэвтрүүлж, загварыг хүйсийн хатуу заагт оруулах бус гоо зүйн нэгдмэл ертөнцөд бүтээхийг зорьжээ. Өнөөдрийн дижитал эрин үеийн “хурдтай” хэрэглээг шүүмжилж, “Биднийг бухимдуулдаг зүйл бол хүний тэвчээргүй зан. Бүх зүйлийг маш хурдан ашиглаж, үгүйсгэж, шинийг хүсч байна.  Энэ нь бүтээлч байдлыг устгадаг. Тиймээс дээд зэрэглэлийн, дахин давтагдашгүй гар урлал бол энэ галзуурлын эсрэг зогсох урлагийн бүтээл. Хэдийгээр ийм өндөр зэрэглэлийн даашинзыг хүн бүр худалдаж авч чадахгүй ч загварын ертөнцийн мэдлэг, ур чадвар, өв уламжлалыг тээж байдаг юм” гэдэг.

Жонатан Андерсон бол “Dior”-ыг зөвхөн хувцасны брэнд бус урлаг, архитектур, гэр ахуй, амьдралын хэв маягт нэгтгэн “бүхэл ертөнц” болгож байна. Тиймээс “DIOR” түүний алсын хараанд итгэн Беверли Хиллзээс Бээжин хүртэл шинэ дэлгүүрүүд нээж байна.