Бүдүүн гэдэсний хорт хавдрын талаарх шинэ судалгаа

Зарим хүмүүс хеликобактер пилори (H. pylori) бактерийн халдвартай байсан ч тэдэнд ямар нэгэн шинж тэмдэг илэрдэггүй.

48 сая хүний өгөгдөлд хийсэн судалгаа энэхүү өвчний талаарх шинэ ойлголтыг өглөө.

Express Newspapers

Дэлхий даяар бүдүүн, шулуун гэдэсний хорт хавдрын таван тохиолдол тутмын нэг нь ходоодны түгээмэл бактеритай холбоотой байж магадгүйг судалгаа харуулж байна. Олон улсын хэмжээнд 48 сая хүний өгөгдлийг ашиглан хийсэн уг судалгаагаар хеликобактер пилори (H. pylori) бактерийн халдвартай байх нь уг өвчнөөр өвчлөх эрсдэлийг 1.59 дахин нэмэгдүүлдэг болохыг тогтоожээ.

Энэхүү халдварын шинж тэмдэг ихэнх тохиолдолд илэрдэггүй боловч зарим хүмүүст ходоодны шархлаа эсвэл ходоодны салст бүрхэвчийн үрэвсэл үүсдэг. Их Британийн хүн амын 40 хүртэлх хувь нь ходоодондоо хеликобактертай гэж үздэг. Энэхүү бактери нь халдвартай хүний бөөлжис, өтгөн эсвэл шүлсээр дамжин халдварладаг байна.

Хеликобактер пилори нь ходоодны хорт хавдар үүсгэдэг гол шалтгаан гэдэг нь хэдийнэ тогтоогдсон боловч хеликобактер болон бүдүүн гэдэсний хорт хавдрын хоорондын хамаарал нь "маш их маргаантай" хэвээр байсан бөгөөд шинжээчид энэхүү боломжит холбоосыг нарийвчлан судлахаар зорьжээ.

Хонконгийн Их сургууль болон Калифорнийн Их сургуулийн Сан Диего дахь салбарын судлаачдаар ахлуулсан баг өмнөх 43 судалгааны өгөгдөлд дүн шинжилгээ хийсэн байна.

Судалгааны үр дүнгээс "eGastroenterology" сэтгүүлд бичихдээ "Хэрэв үүнийг шууд шалтгаант холбоо гэж үзвэл дэлхийн хэмжээнд бүдүүн, шулуун гэдэсний хорт хавдрын (CRC) нийт тохиолдлын ойролцоогоор 22% нь хеликобактерийн халдвартай холбоотой байж магадгүй юм" гэжээ.

Энэхүү дүн шинжилгээнд багтсан дөрвөн судалгаа нь антибиотикоор хеликобактерийг "устгах" эмчилгээ хийсний дараах хорт хавдрын эрсдэлийг үргэлжлүүлэн судалсан байна.

Эдгээр судалгаанаас үзэхэд халдварыг бүрэн эмчилж, устгах нь бүдүүн гэдэсний хорт хавдрын эрсдэлийг бууруулж болох бөгөөд энэ үр нөлөө нь зөвхөн 10 жилийн дараа л илэрдэг болохыг харуулжээ.

Мөн судалгааны үр дүнгээс харахад сүүлийн хэдэн арван жилд (1960 болон 1970-аад оны үетэй харьцуулахад) хеликобактерийн халдвартай холбоотой бүдүүн гэдэсний хорт хавдрын эзлэх хувь өссөн байна.

Судлаачид бүдүүн гэдэсний хорт хавдар тусах эрсдэлд удамшил, нас, амьдралын хэв маяг, хоолны дэглэм зэрэг бусад олон хүчин зүйл чухал үүрэг гүйцэтгэдэг болохыг тэмдэглэжээ.