АНУ-ын өр $40 их наядыг давлаа

 АНУ, Вашингтон хот дахь АНУ-ын Сангийн яамны байр. 2026 оны 7 сарын 30

Xinhua News Agency (2026-08-20)

Америкийн олон нийтийн эзэмшиж буй өр $32.266 их наяд, харин засгийн газрын өр $7.782 их наядад хүрснээр АНУ-ын нийт өрийн хэмжээ $40.047 их наяд болжээ.

Тооцоолж байснаас хэдэн сарын өмнө тохиож буй энэхүү таагүй үзүүлэлт нь АНУ-ын холбооны засгийн газрын төсвийн асар том алдагдал болон зарлага нь орлогоосоо байнга давж, улсын өрийг тасралтгүй нэмэгдүүлсээр байгаагийн илрэл юм.

Холбооны засгийн газар КОВИД-19 цар тахлын эсрэг хариу арга хэмжээ авахад зориулж хэдэн их наяд доллар зарцуулснаас гадна сүүлийн жилүүдэд татварыг бууруулж, цэргийн зардлаа эрс нэмэгдүүлсэн билээ. Үүний үр дүнд улсын өр хурдацтай өсөн нэмэгдэж, бондын зах зээлд сөрөг дохио өгөн, Эрдэнэсийн сангийн бондын өгөөжийг дээшлүүлэхэд хүргэв. Мөн өрийн хүүгийн төлбөр өссөн нь нийт өрийн хэмжээг улам бүр томруулах гол шалтгаан болжээ.

Сангийн яамны сарын тайланд дурдснаар 2025 оны 10 сарын 1-нээс эхэлсэн 2026 оны санхүүгийн жилийн эхний есөн сарын байдлаар Холбооны засгийн газар $1.367 их наядын төсвийн алдагдалтай ажилласан байна. Энэ хугацаанд цэвэр хүүгийн төлбөр $827 тэрбумд хүрсэн нь батлан хамгаалах салбарын $713 тэрбумын зардлаас давж, одоо $1.244 их наядад хүрээд буй нийгмийн хамгааллын зардлын дараагаар хоёрдугаарт эрэмбэлэгдэх болоод байна.

Дашрамд сануулахад АНУ-ын холбооны засгийн газрын өр 2022 оны 1 сард $30 их наяд, 2026 оны 3 сард $39 их наяд, улмаар 2026 оны 7 сард $39.7 их наядад хүрч байв. Орон нутгийн хэвлэл мэдээллийн хэрэгслүүд улсын өр $40 их наяд давсныг эдийн засгийн байдал тун муудсаныг сануулсан аюултай бөгөөд түгшүүртэй үйл явдал гэж тодорхойлж байна.

Холбооны төсвийн хорооны ерөнхийлөгч Майя МакГинеас лхагва гаригт хийсэн мэдэгдэлдээ "Олон нийтийн эзэмшиж буй өр манай эдийн засгийн нийт хэмжээнээс давж ДНБ-д эзлэх төсвийн алдагдлын хувь хоёр дахин өссөн бөгөөд хүүгийн зардал батлан хамгаалах салбарын төсвийг давсан нь аюулын харанга дэлдэж буй хэрэг мөн" гэлээ.

Тэрбээр цааш нь "$40 их наядын өр зөвхөн засгийн газрын санхүүгийн данс дээр байдаг “тоо” биш бөгөөд энэ нь эдийн засаг даяар мэдрэгдэж, ямар нэгэн байдлаар иргэдийн хэтэвчинд шууд нөлөөлдөг. Бид хэдий чинээ их зээл авна, төдий чинээ инфляцийг хөөрөгдөж, төсвийн бусад шаардлагатай асуудлуудыг хойш шахаж, хямралд өртөмтгий эмзэг байдалд орно" гэв.

Бүх намын бодлогын төвийн ерөнхийлөгч бөгөөд гүйцэтгэх захирал Маргарет Спеллингс "Манай санхүүгийн одоогийн чиглэл, траектори нь огт тогтвортой биш гэдэг нь тодорхой байна. Хамгийн өвөрмөц, сайн хувилбараар бодож үзсэн ч бид хавцлын ирмэг рүү өндөр хурдаар давхиж байгаа мөртлөө хүрдээ эргүүлж чиглэлээ өөрчлөхөөс татгалзсаар байна. Холбооны өр нь амьжиргааны өртгийг аль хэдийн нэмэгдүүлж, бусад хөрөнгө оруулалт болон зардлыг боомилон, манай эдийн засаг болон америкчуудын ирээдүйн хөгжилд аюул заналхийлж байна" гэж мэдэгдсэн юм.

Конкорд эвсэл ба Конкорд акшн сангийн гүйцэтгэх захирал Кэролин Бурдо "$40 их наяд бол сэрүүлэг байх ёстой. Гэвч Конгресс ч, Ерөнхийлөгч ч энэ өсөлтийг зогсоох итгэл үнэмшилтэй төлөвлөгөөгүй байна. Бид дараагийн үедээ ийм дарамттай өр, мөн “хэн нэгэн сүүлд нь учрыг нь олно” гэсэн хоосон амлалтаас илүү дээр зүйлийг өгөх үүрэгтэй" гэжээ.

Энэхүү сэтгэл зовоосон үйл явдлын хариуд Цагаан ордны хэвлэлийн төлөөлөгч Куш Десай хэлэхдээ АНУ-ын Ерөнхийлөгч Дональд Трамп өмнөх ерөнхийлөгч Жо Байдены санхүүгийн буруу удирдлагыг цэгцэлнэ гэж амласан болохыг санууллаа. "Трампын засаг захиргаа АНУ-ын өрийн ДНБ-д эзлэх харьцааг дахин зөв голдирдолд нь оруулахын тулд холбооны зардлын үр ашиггүй байдал, залилан болон урвуулан ашиглалтыг бууруулж, эдийн засгийн өсөлтийг түргэсгэхэд анхаарлаа хандуулж байна" гэж тэрбээр нэмж цохон тэмдэглэсэн юм.