Украины дронууд Оросыг сульдааж байна!

Краснодарын хязгаар. Украины дронууд Оросын Таман хотод байрлах далайн боомтод халдсан байна. Камикадзе дронуудын дайралтын улмаас нефтийн терминалууд, нөөцийн агуулахууд шатаж, дамжуулах хоолойнууд эвдэрсэн байна.

Краснодарын хязгаарын Шуурхай штабын мэдээлснээр, Темрюкийн дүүргийн Волна тосгонд дроны халдлагын улмаас хоёр тавцан, хоёр усан онгоц гэмтэж, үүний улмаас 1000-1500 м.кв талбайг хамарсан гал түймэр гарсан байна.

Волна тосгоны ойролцоо экспортын зориулалттай ачаа дамжуулан ачих Таман далайн боомт байрладаг.

Волна дахь терминал нь түүхий нефть болон нефтийн бүтээгдэхүүн, тэр дундаа шингэрүүлсэн шатдаг хий (LPG)8 аммиак, нүүрс, бордоо зэргийг дамжуулан ачиж боловсруулдаг.

Кубанийн Шуурхай штабаас “Темрюкийн дүүргийн Волна тосгонд байрлах нэг терминалын дамжуулах хоолойг дроны хэлтэрхий гэмтээсэн. Гал 100 м.кв талбайг хамарсан. Онцгой байдал болон тусгай албаныхан газар дээр нь ажиллаж, гал сөнөөгчид галыг унтрааж байна” гэж мэдээлсэн байна.

Орон нутгийн оршин суугчдын хэлснээр дор хаяж 10 дэлбэрэлт болсон, дараа нь их хэмжээний гал дэгдсэн, хар тэнгисийн зүгээс тод гэрэл нүүгэлтэж байсан гэжээ.

Арванхоёрдугаар сарын 22-нд шилжих шөнө Оросын агаарын довтолгооноос хамгаалах системүүд нисэх онгоц хэлбэртэй 35 дроныг устгасан бөгөөд тэдгээрийн 23 нь Хар тэнгисийн дээгүүр эргэлдэж байсан гэжээ.

Ням гаригийн оройн мэдэгдэлд ОХУ-ын Батлан хамгаалах яам Хар тэнгисийн дээгүүр нисэж байсан Украины 23 дроныг устгасан гэж мэдээлсэн байна. Украины тал боомтын дэд бүтцэд хийсэн цохилтын талаар албан тайлбар өгөөгүй байна.

Самара муж. ТольяттиАзот химийн үйлдвэрт Украины дронууд цохилт өгсний улмаас их хэмжээний дэлбэрэлт болж гал түймэр дэгджээ. ТольяттиАзот нь Оросын хамгийн том химийн үйлдвэрүүдийн нэг бөгөөд дэлхийн хамгийн том аммиак үйлдвэрлэгчдийн тоонд ордог.
Тус үйлдвэрийн гол бүтээгдэхүүнд аммиак, мочевин (карбамид), метанол болон бусад азотын суурьтай химийн бодисууд багтдаг байна.