НАТО-гийн хилийн дагуух Путины ЗЭВСЭГЛЭЛ ба ЗАНАЛХИЙЛЭЛ

Кремль цэргийн хүчин чадлаа асар хурдацтайгаар нэмэгдүүлж байна.

Die Tageszeitung

Төсвийнхөө 40 хувийг дайны ажиллагаа, НАТО-гийн хилийн дагуух шинэ цэргийн баазуудыг барих болон барууны орнуудыг заналхийлэхэд зарцуулж эхэлжээ.

"Би хэнийг ч сандаргахыг хүсэхгүй байна, гэхдээ ирэх саруудын үйл явдал үнэхээр шийдвэрлэх ач холбогдолтой байж магадгүй юм" гэж Польшийн ерөнхий сайд Дональд Туск хэдхэн хоногийн өмнө хэвлэлийнхний асуултад хариулахдаа мэдэгдэв. "Холбоотон орнуудынхаа мэдээллийн ачаар бид ирж буй аюул заналыг бүрэн ухамсарлаж байна." "Onet" цахим хуудас Польшийн Ерөнхийлөгч Кароль Навроцкийн хүрээлэлийн эх сурвалжийг иш татан мэдээлснээр, АНУ-ын зүгээс Орос улс Польш руу халдлага үйлдэхээр бэлтгэж байж магадгүй гэдгийг Варшавт хэд хэдэн удаа анхааруулсан байна.

Яг үнэндээ Оросын арми одоогоор Украинд бараг л урагшлахгүй байгаа юм. Түүнчлэн Украины амжилттай довтолгоонуудын улмаас эзлэгдсэн нутаг дэвсгэр болон Крымийн хойгт онц байдал зарлаад байна. Орос улсад бараг шөнө бүр нэг газрын тос боловсруулах үйлдвэр Украины дроны дайралтад өртөн шатаж буй. Гэсэн хэдий ч барууны орнуудад айдас улам бүр нэмэгдсээр байна.

Латвийн тагнуулын албанаас Кремлийн зүгээс тус бүс нутаг эсвэл Польшид цэргийн өдөөн хатгалга хийхээр төлөвлөж байгааг анхаарууллаа. Үүнтэй зэрэгцэн Оросын Гадаад хэргийн дэд сайд Михаил Галузин өнгөрсөн бямба гаригт "Латви болон Балтийн орнууд манай улсын иргэний дэд бүтэц рүү халдсан Украины дронуудад өөрсдийн агаарын коридорыг ашиглах боломж олгосон" гэж буруутгав. Түүний хэлснээр Москвад үүнийг батлах "үнэн зөв баримт" байгаа аж. Харин Балтийн гурван улс үүнийг эрс үгүйсгэж байна.

ОХУ-ын хувьд Украиныг зэвсгээр хангадаг барууны орнуудын зэвсгийн үйлдвэр рүү халдах бэлтгэлээ хангаж байгаа байж магадгүй гэх хувилбарыг Оросын төрийн хэвлэлүүд сүүлийн өдрүүдэд идэвхтэй тарааж байна. Үүний зэрэгцээ Балтийн болон Скандинавын орнуудын тагнуулын албад Хойд мөсөн далайгаас Польш хүртэлх НАТО-гийн хилийн дагуу Оросын цэргийн баазууд шинээр баригдаж, эсвэл маш том хэмжээгээр өргөжиж байгааг саяхан мэдээлсэн юм.

Норвеги улсаас 11 км-ийн зайд орших Печенга, Финландаас 110 км-ийн зайд орших Кандалакша, Колагийн хойг, Финландаас 200 км-ээс бага зайд орших Петрозаводск, Эстониос 145 км-ийн зайд орших Луга, түүнчлэн Польш, Литвийн дунд орших Оросын эксклав анклав болох Калининград дахь цэргийн баазуудыг шинээр барьж эсвэл өргөтгөн шинэчилж байна. Скандинавын хэвлэлүүдийн нийтэлсэн хиймэл дагуулын зургаас үзэхэд өмнө нь хаагдаад байсан цэргийн байгууламжуудыг дахин сэргээж, цэргийн бааз, хуарангуудыг өргөтгөх зорилгоор ой модыг устгаж байгаа нь тодорхой харагджээ.

Лондонгийн "IISS" тинк-танкийн "Military Balance 2026" цэргийн дүн шинжилгээний тайланд "Орос улс зэвсэгт хүчнээ өргөтгөх, тэр дундаа бригадуудын оронд дивизүүд шинээр байгуулах төлөвлөгөөгөө эрчимтэй хэрэгжүүлж байгаа бөгөөд тэдгээрийн заримыг Балтийн орнуудын ойролцоо байршуулах гэж байна. Үүний хамгийн тодорхой ахиц дэвшил нь Финландын хилийн ойролцоо Карелид Армийн 44-р корпусыг байгуулсан явдал юм" гэж тэмдэглэжээ.

Оросын баруун хил дээр баригдаж буй шинэ хуарангууд нь 115 мянга хүртэлх цэрэг хүлээн авах хүчин чадалтай бөгөөд үүнээс 80 мянга нь Финландын хилийн дагуу байрлах аж. Энэ нь өмнө нь байсан 20 мянган цэргийн тоог үлэмж нэмэгдүүлсэн хэрэг юм. Оросын Ерөнхийлөгч Владимир Путин армийн нийт бие бүрэлдэхүүнийг 2.4 сая орчим хүн байхаар тогтоосноос 1.51 сая нь идэвхтэй цэргийн албан хаагчид байна. Харин 2017 онд Оросын зэвсэгт хүчний нийт бүрэлдэхүүн 1.9 сая орчим байсны 1 сая нь цэргүүд байсан юм.

Үүний үр дүнд цэргийн зардал улсын нийт төсөвт эзлэх хувь 46 хувьд хүрсэн гэж "Шинжлэх ухаан, улс төрийн сан"-гийн шинжээч Янис Клюге тооцоолжээ. Энэ нь өмнөх оныхоос дахин 29.9 хувиар өссөн бөгөөд Орос Украинд бүрэн хэмжээгээр довтолж эхэлсэн 2022 оныхоос дөрөв дахин их үзүүлэлт юм. Москва ганцхан сарын дотор арми болон зэвсэглэлд зарцуулж буй мөнгө нь тус улсын бүтэн жилийн боловсролын системийн төсвөөс ч давж байна.

НАТО-гийн орнууд ДНБ-ийхээ 3.5 хувийг арми, зэвсэглэлд, 1.5 хувийг нь боомт, төмөр зам зэрэг цэргийн зориулалттай дэд бүтцийг сайжруулахад зориулахаар төлөвлөдөг. Харин Оросын батлан хамгаалахын төсөв эхний улиралд ДНБ-ийх нь 12 хувьд хүрсэн гэж Клюге мэдээлэв. ХБНГУ-ын Холбооны тагнуулын алба "Эдгээр хөрөнгийг зөвхөн Украины эсрэг дайнд зориулаад зогсохгүй, цэргийн хүчин чадлыг нэмэлтээр нэмэгдүүлэх, ялангуяа НАТО-гийн зүүн жигүүрийн ойролцоо шинэ бааз байгуулахад ашиглаж байна. Эдгээр тоон үзүүлэлтүүд нь Оросоос Европт учруулж буй аюул занал бодитоор нэмэгдэж байгаа"-г онцолсон байна.

Үүний нотолгоо нь зөвхөн НАТО-гийн зүүн хил дээрх шинэ баазууд биш, ялангуяа Оросын Балтийн тэнгис дэх эксклав нутаг болох Калининградад илүү тод харагдаж байна. Хиймэл дагуулын зургаас үзэхэд тэнд ердийн болон цөмийн зэвсэг хадгалах зориулалттай 38 шинэ том бункер баригджээ. Мөн цэргийн 26 нисэх онгоцны буудлыг шинэчилж, шинэ радарын систем болон GPS-ийн дохиог сарниулах зориулалттай томоохон саатлын системүүдийг суурилуулсан байна. Калининградад цөмийн цэнэг тээвэрлэх чадвартай "Искандер" пуужингуудыг байрлуулсан бөгөөд тэдгээр нь хэдхэн минутын дотор Варшав, Берлин зэрэг НАТО-гийн гишүүн орнуудын хотуудад хүрэх чадалтай.

Нислэгийн хугацаа нь үүнээс ч богино, олон тооны цэнэгт хошуу тээвэрлэх чадвартай, дуунаас хурдан "Орешник" (Haselstrauch) пуужин ч бий. Оросын ярианд Хитлерийн "Гайхамшигт зэвсэг"-тэй зүйрлүүлэн "Путины зэвсэг" гэж нэрлэгддэг эдгээр зэвсэглэлүүд нь Украины дайнд одоогоор ашиг тусаа өгөөгүй байгаа юм. Учир нь тэдгээрийг анхнаасаа Украины эсрэг ашиглахаар төлөвлөөгүй байжээ. Эдгээр "Орешник" пуужингуудыг НАТО-гийн хилд маш ойрхон орших Беларусь улсад хэдийнэ байршуулаад байна.