“МИАТ” ТӨХК-аас 178 тэрбум төгрөгийн зөрчил илэрчээ

“МИАТ” ТӨХК-аас 2025 оны санхүүгийн аудитаар 178 тэрбум 435 сая төгрөгийн зөрчил илэрсэн байна. Тус компанийн орлогын төлөвлөгөө 98 тэрбум төгрөгөөр тасарч, 32 тэрбум төгрөгийн алдагдалтай ажиллажээ.

Бараа материалын дансанд нь 10-аас дээш жилийн насжилттай 17 нэр төрлийн 114.5 сая төгрөгийн, 5-10 жилийн насжилттай 18 нэр төрлийн 42.5 сая төгрөгийн нийт 156 сая төгрөгийн бараа ашиглалтгүй байсныг илрүүлсэн байна.

Тухайлбал, 2021 оны 7 дугаар сард хугацаа нь дууссан 6665 ширхэг нийт 27.9 сая төгрөгийн ликёр байсан гэнэ. Мөн 2025 оны 1-9 дүгээр сард нийт 452 иргэний билетийн үнийг 50-100 хувиар хөнгөлж, нийт 531 сая төгрөгийн хөнгөлөлт олгохдоо хамтран ажиллах гэрээ байгуулаагүй, үр дүнг тооцоогүй, тайлагнаагүй байжээ.

“МИАТ” ТӨХК-ийн 16 автомашинд GPS суулгаагүй учраас 7 нь автомашин унах эрхгүй газрын захирлууд унаж, жолоочийн замын хуудсыг өдөрт 100-140 км явснаар тогтмол бүртгэсэн, нийт 71.8 саяы төгрөгийн шатахууны зардал гарчээ. Мөн зарим албан тушаалтны хувийн машинд 111.4 сая төгрөгийн шатахуун олгосон гэжээ.

Аудитын дүгнэлтэд 2025 онд МИАТ-ийн цалингийн санг 87 тэрбум 712 сая төгрөгөөр баталсан байтал нислэг үйлдвэрлэлийн үйл ажиллагааны ажилчдын цалинг 1.8 тэрбумаар, ерөнхий удирдлагын цалинг 1 тэрбум төгрөгөөр тус тус хэтрүүлсэн байна.

Үүнээс гадна зуны нислэгээр үйлдвэрлэлийн нэгжид 283 түр орон тоо баталсан атлаа тус хэлтэст хамаарахгүй 39 ажилтан томилж, 832 сая төгрөгийн цалин олгожээ.

“МИАТ”  ТӨХК  нь Бээжингийн төлөөлөгчийн газарт 2 ажилтантай мөртлөө 3 машинтай, Сөүлд 6 ажилтанд 4 машин, Токиод 3 ажилтанд 3 автомашин тус тус ашигладаг гэнэ. Нийт 32 тэрбум 133 сая төгрөгийн 5 саяас дээш үнийн дүн бүхий худалдан авалтыг шилэн дансандаа байршуулаагүй гэх зэргээр аудитаас 11 албан шаардлага хүргүүлээд байгаа аж.

 Б.ГЭРЭЛЭЭ