Хятадын Jiangxi Copper Эквадорын зэсийн том төслийг эзэмшинэ

Зэсийн үнэ цойлж байгаа энэ үед Хятадын төрийн өмчийн Jiangxi Copper компани Австралийн зэс олборлогч SolGold-ийг 1,2 тэрбум ам.доллароор худалдан авах гэрээ байгууллаа.

SolGold нь Jiangxi Copper-ийн саналаас хоёр удаа татгалзсаны эцэст ийнхүү саналыг хүлээн авлаа. Ингэхдээ өмнө санал болгож байсан нэгж хувьцааны үнийг 43%-иар өсгөж, нэгж хувьцааг 0.28 фунт стерлингээр худалдан авах саналыг зөвшөөрчээ.

Хувьцаа худалдан авах гэрээ, хэлцэл ирэх 2026 оны эхний улиралд багтан дуусах бөгөөд ингэснээр Jiangxi Copper нь Латин Америкийн Эквадорын хойд хэсэгт орших зэс, алтны Cascabel төслийг эзэмшихээр болж байна.

Cascabel төсөл нь хоёр ордыг олборлох төсөл бөгөөд 2028 оноос төслийг хэрэгжүүлж эхлэхээр төлөвлөж байгаа юм. Төсөлд багтсан Альпала болон Тандаяма-Америка гэсэн хоёр орд газар нь Чилийн өмнөд хэсгээс Панам хүртэл сунасан Андын нурууны зэсийн бүсчлэлд хамаардаг.

ТЭЗҮ-ээр ордуудыг 28 жил ашиглах бөгөөд эндээс 123 мянган тонн зэс, 277 мянган унц алт, 794 мянган унц мөнгө олборлоно.