Ц.Баатархүү, Г.Хосбаяр нар О.Цогтгэрэлийн эсрэг талд гарчээ

Эрхбаригч МАН-ын бүлэг хоёр хагарсан бол сөрөг хүчний бүлэг ч мөн адил хоёр хуваагдсан бололтой. Ардчилсан намын дарга О.Цогтгэрэлийг бүлгийн даргаас нь огцруулахаар О.Амгаланбаатар, Ө.Шижир нарын гишүүд гарын үсэг зурсан гэх албан бус мэдээлэл гарах болсон. Хэдийгээр тэд эл мэдээллийг үгүйсгэж буй ч овоо босгоогүй бол шаазгай хаанаас шагшрах вэ гэсэн үг байдаг.

Тэгвэл О.Цогтгэрэлийг бүлгийн даргаас огцруулахыг Ц.Баатархүү, Г.Хосбаяр нар дэмжих болсон байна. Тэд АН-ын бүлгийн даргыг болон Ерөнхий нарийн бичгийн даргыг авахаар тохироо хийж эхэлсэн гэнэ. Ерөнхий нарийн бичгийн даргад П.Гантулгыг зүтгүүлж эхэлсэн гэх мэдээлэл ч байна.

Намын дотоод сонгуулиас болж, АН-ын хуучин фракцууд нэг мөр хагарч, тус тусынхаа зам мөрийг хөөх болжээ. "Нэг Монгол" гэхэд О.Цогтгэрэл дээрээ төвлөрч, Ц.Туваан, Э.Одбаяр нар тусдаа гарч байгаа гэнэ. "Морьтон", "МонДе", "Гранд", "Од" фракцууд ч мөн бутрах тал руугаа оржээ. МоАХ-ны залуус Х.Баттулгаа жийхээр хөдлөж эхэлсэн байна. Х.Баттулгын улс төрийн карьер ерөнхийдөө дууссан гэж МоАХ залуус үзсэн бололтой, түүнээс салахаар санал нэгдсэн сурагтай. С.Ганбаатар, Ж.Батзандан нар АН-ын дотоод сунгаанд оролцоогүй. Өөрсдийг нь АН-ын гишүүд дэмжихгүй гэж бодсон ч байх талтай. Гэх мэтчилэн МАН-ын хэрүүл ч АН-д халдварлаад эхэлсэн гэлтэй байна.

Х.ХАНДМАА