АНУ-ын виз олгохдоо олон нийтийн сүлжээн дэх мэдээллийг нь шалгах болжээ!

2026 оны 1-р сарын 21-нээс эхлэн АНУ-ын Төрийн департамент АНУ-ын татвар төлөгчдийн зардлаар нийгмийн халамж ихээр хүртдэг гэж тогтоогдсон улс орнуудын (үүнд Монгол Улс багтана) иргэдэд цагаачлалын виз олголтыг түр хугацаагаар зогсоолоо. Тэгвэл 2026 оны 4 дүгээр сарын 2-ны өдрөөс эхлэн АНУ-ын B1/B2 ангиллын визийн бүх шаардлагыг хангаж буй Монгол Улсын иргэд виз олгогдохоос өмнө $10 мянгыг төлөх, ингэхдээ визэнд орохоосоо өмнө урьдчилж хийсэн тохиолдолд буцаан олгохгүйгээ зарлалаа. $10 мянга нь монгол төгрөгөөр 36 орчим сая төгрөг болно.

АНУ-ын Төрийн департаментаас гаргасан анхаарал татахуйц өөр нэг шийдвэр нь H1-B, H-4, F, M, J ангиллын виз мэдүүлэгчдийн олон нийтийн сүлжээн дэх мэдээллийг шалгаж эхэлжээ. Өөрөөр хэлбэл, олон нийтийн сүлжээнд бичсэн мэдээллийг үндэслээд виз олгох эсэхээ шийднэ гэсэн үг.

Энэ шийдвэр өнгөрсөн оны 12-р сарын 15-наас хэрэгжиж эхэлжээ. Тодруулбал АНУ-аас H1-B, H-4, F, M, J ангиллын цагаачлалын бус виз мэдүүлэгч бүр өөрийн олон нийтийн сүлжээн дэх бүх профайлын нууцлалын тохиргоог “public” буюу нээлттэй горимд шилжүүлэх шаардлагатай. Улмаар АНУ-ын хуулийн дагуу таны хэн болохыг тогтоох, АНУ-д нэвтрэх эрхтэй эсэхийг тодруулах шалгалт хийх боломжийг бүрдүүлнэ.

АНУ-ын цагаачлалын бус визний эдгээр ангиллууд нь тухайн хүний зорчих зорилгоос хамааран өөр өөр эрх, үүргийг олгодог.

1. H-1B виз. Энэ нь нарийн мэргэжил эзэмшсэн, бакалавр болон түүнээс дээш зэрэгтэй гадаадын иргэдийг АНУ-д түр хугацаагаар ажиллуулах зориулалттай виз юм. Өөрөөр хэлбэл, мэдээллийн технологи, инженерчлэл, шинжлэх ухаан, санхүү зэрэг нарийн мэргэжлийн салбарт ажиллах хүмүүст олгодог виз аж.  Ингэхдээ АНУ-ын ажил олгогч нь тухайн ажилтныг ивээн тэтгэж (Sponsorship), Хөдөлмөрийн яамнаас зөвшөөрөл авсан байх шаардлагатай.

2. H-4 виз. Тодруулбал, H-1B, H-2B, H-3 зэрэг "H" ангиллын виз нь гэр бүлийн гишүүдэд олгодог виз юм байна. Энгийнээр тайлбарлавал виз эзэмшигчийн хууль ёсны эхнэр/нөхөр болон 21-ээс доош насны гэрлээгүй хүүхдүүдэд олгодог виз аж. Гэхдээ АНУ-д амьдрах, сургуульд сурах эрхтэй боловч тодорхой тусгай зөвшөөрөл (EAD) авалгүйгээр ажил эрхлэх боломжгүй виз юм.

3. F виз. АНУ-ын магадлан итгэмжлэгдсэн их дээд сургууль, коллеж, дунд сургууль эсвэл хэлний бэлтгэлд суралцах оюутнуудад олгодог виз аж. F-1 визийг үндсэн суралцагч оюутанд олгодог аж. F-2 нь F-1 виз эзэмшигчийн эхнэр/нөхөр, хүүхдэд олгодог виз юм байна. Гол нөхцөл нь сурах сургуулиасаа I-20 маягт авсан байх шаардлагатай.

4. M виз. Эрдэм шинжилгээний бус буюу техникийн, мэргэжил олгох сургалтад (жишээ нь: нисгэгчийн дамжаа, гоо сайхны сургууль, техникийн сургалт) суралцах оюутнуудад олгодог виз аж.

M-1 визийг үндсэн суралцагч оюутанд олгодог бол M-2 визийг үүний гэр бүлийн гишүүдэд олгоно. F визтэй харьцуулахад сургалтын явцад болон дараа ажиллах эрх (OPT) илүү хязгаарлагдмал байдаг.

5. J виз. Солилцооны хөтөлбөрийн хүрээнд олгодог виз. Соёл, боловсролын салбарт туршлага солилцох зорилгоор уг визийг олгодог. Үүнд оюутан, багш, судлаач, зуны ажил-аялал (Work and Travel), Au Pair зэрэг хөтөлбөр багтана. Гол нөхцөл нь хөтөлбөр хэрэгжүүлэгч байгууллагаас DS-2019 маягт авсан байх ёстой.

Монгол Улсын иргэдийн B1/B2 (жуулчин, бизнес) болон F, M, J (оюутан, солилцоо) ангиллын визний хугацаа хэтрүүлэлтийн хувь хэмжээ АНУ-ын дундаж үзүүлэлтээс дээгүүр байгаа нь "эрсдэлтэй" орнуудын тоонд багтахад хүргэсэн байна.

Х.ХАНДАА