Зеленьский: “Одоо хянаж байгаа газар нутгаа Орост өгөхгүй”

Даваа гаригийн уулзалтаар талууд тохиролцож эс чадвал Украинд энхийг тогтоох дипломат процесс бүтэлгүйтэх магадлалтай.

Украины энхийг тогтоох яриа, хэлцэл үргэлжилсээр байна. Өнгөрсөн Ням гаригт (2025.12.14) Берлин хотноо Украины Ерөнхийлөгч Зеленьский Ерөнхийлөгч Трампын Украины асуудлаар хэлэлцээ хийгч тусгай элч Стив Уитсон, Трампын хүргэн Жаред Кушнер нартай уулзлаа. Ерөнхийлөгч  Трампын санал болгосон Энхийн төлөвлөгөөний дагуу сүүлийн нэг сарын хугацаанд Украин-Оросын дайныг дуусгаж, гал зогсоох хэлэлцээ явагдсаар байгаа. Берлиний уулзалтыг Трамп яриа, хэлдцлийн онцгой үе шат хэмээн үзэж байгаа.

Трампын зүгээс Зеленьскийг хэлэлцээг сунжруулах тусам Украинд ашиггүй учраас яаралтай дуусгаж, энхийн гэрээ байгуулахаар шахаж байгаа. Нөгөө талаас Зеленьский ч зарим нэг асуудлаар буулт хийхэд бэлэн байгаагаа мэдэгдсэн.

Берлиний уулзалтын өмнө Зеленьский “хэрвээ АНУ Орос Украин руу дахин довтлохгүй байх  аюулгүйн байдлын найдвартай баталгааг өгч чадвал НАТО-д элсэх хүсэлтээсээ татгалзахад бэлэн” хэмээн мэдэгдсэн. Харин Трампын шахаж байгаа шиг одоо хянаж байгаа газар нутгийг Орост өгөхгүй хэмээн гол байр сууриа илэрхийлжээ.

Уулзалт Ням гаригт таван цаг үргэлжлээд өндөрлөсөн бөгөөд Даваа гаригт энхийн төлөвлөгөөний асуудлаарх уулзалт үргэлжлэх юм. Даваа гаригийн уулзалтаар талууд тохиролцож эс чадвал Украинд энхийг тогтоох дипломат процесс бүтэлгүйтэх магадлалтай хэмээн ажиглагчид үзэж байна.