“Залуу үедээ 4 зүйл үлдээнэ”

УИХ-ын дарга Н.Учрал “Youth Council Summit 2026” арга хэмжээнд оролцлоо

Аймаг, нийслэл, сум, дүүргийн ИТХ-д Монгол Ардын намаас нэр дэвшин төлөөлөгчөөр сонгогдсон 750 гаруй залуу “Youth Council Summit 2026” арга хэмжээнд оролцож байна.

Монгол Ардын намын дэргэдэх Социал Демократ Монголын Залуучуудын Холбооноос анх удаа зохион байгуулж буй энэ арга хэмжээний “Чөлөөлье” хэсэгт Монгол Ардын намын дарга, УИХ-ын дарга Н.Учрал хүндэт зочноор оролцож илтгэл тавилаа.

Тэрбээр “Монгол Ардын намын даргаар сонгогдсон цаг үеэс эхлэн миний, бидний цагт намыг шинэчлэх үйл хэрэг хэрхэн өрнөхийг ард түмэн чих тавин хүлээж байна. Иймд бид хамтдаа илүү хичээж, ард түмнийхээ амьдралыг өөд нь татах, тэдний нуруун дээр байгаа ачааг хөнгөлөх, тэдний хөдөлмөрлөе, бүтээе, хийе гэсэн санал санаачилгыг нь дэмжиж, түүнд нь саад тотгор болж буй хүнд суртал, дүрэм журам, гох дэгээнээс чөлөөлөхийн төлөөх санаачилгыг хамтдаа хэрэгжүүлье” гэв.

Мөн Монгол Ардын намын дарга, УИХ-ын дарга Н.Учрал Монгол Улсын эдийн засгийн сүүлийн 10 жилийн голлох үзүүлэлтүүд, түүнд нөлөөлсөн хүчин зүйлүүд, ДНБ, эдийн засгийн 2025 оны өсөлтөд хөдөө аж ахуй, уул уурхай, барилгын салбар өсөлт гол нөлөө үзүүлсэн зэрэг тоо баримтыг дурдлаа.

Арга хэмжээнд Социал Демократ Монголын Залуучуудын Холбооны Ерөнхийлөгч Б.Пүрэвдагва, тус холбооны Ерөнхий нарийн бичгийн дарга Б.Галсан, холбооны Удирдах зөвлөлийн гишүүд, Фридрих-Эбертийн сангийн Монгол Улс дахь суурин төлөөлөгч Кристоф Хойзер нар оролцож байна.

Б.Пүрэвдагва: СДМЗХ-ны дараагийн үедээ дөрвөн зүйл үлдээхээр тэмүүлж байна

Монголын 21 аймаг, есөн дүүргээс цугласан нийт 750 гаруй залуу төлөөлөгчдийн  “Youth Council Summit 2026” арга хэмжээ анх удаа болж байна. 

“Төлөөлье, цэгцэлье, чөлөөлье” уриатай Тусгаар тогтнолын ордонд болж буй энэхүү арга хэмжээг Монгол Ардын намын дэргэдэх Социал Демократ Монголын Залуучуудын Холбооноос зохион байгуулж байгаа бөгөөд тус холбооны Ерөнхийлөгч, намын Нарийн бичгийн дарга Б.Пүрэвдагва нээж үг хэллээ.

Тэрбээр “Youth Council Summit 2026” арга хэмжээнд эх орныхоо өнцөг булан бүрээс хүрэлцэн ирсэн, ард түмний мандаттай төлөөлөгчдөд мэндчилгээ хүргэж, анх удаа болж буй ийм арга хэмжээг дэмжин ажиллаж буй Фридрих-Эбертийн сангийн хамт олонд талархал илэрхийллээ.

Социал Демократ Монголын Залуучуудын Холбооны долоо дахь Ерөнхийлөгч Б.Пүрэвдагва дараагийн үедээ дөрвөн зүйл үлдээхээр тэмүүлж байгаагаа онцоллоо. Нэгдүгээрт, ил тод, нээлттэй тогтолцоог бий болгох, хоёрдугаарт, цахим залуучуудын байгууллагыг бий болгох, гуравдугаарт, салбар холбоодыг хөгжүүлэх, дөрөвдүгээрт, залуучууд залуучуудынхаа буюу өөрсдийнхөө асуудлыг шийдвэрлэхэд оролцдог, төлөөлдөг болох зорилготой, эдгээрээ хэрэгжүүлэхийн төлөө ажиллаж байгаа юм.

Арга хэмжээнд тус холбооны Ерөнхий нарийн бичгийн дарга Б.Галсан, холбооны Удирдах зөвлөлийн гишүүд, Фридрих-Эбертийн сангийн Монгол Улс дахь суурин төлөөлөгч Кристоф Хойзер оролцож байна.

Ноён Кристоф Хойзер мэндчилгээ хүргэхдээ тус сан болон Социал Демократ Монголын Залуучуудын Холбооны цаашдын хамтын ажиллагаа илүү идэвхтэй болно гэдэгт итгэлтэй байгаагаа илэрхийлээд “Youth Council Summit 2026”-д оролцож буй төлөөлөгчдийн уулзалт, хэлэлцүүлэгт амжилт хүсэв.