Б.Чагнаадоржийг “Эрдэнэс ТТ”-н гүйцэтгэх захирлаар томиллоо

“Эрдэнэс Тавантолгой” ХК-ийн ТУЗ өнөөдөр хуралдаж, Б.Чагнаадоржийг гүйцэтгэх захирлаар томиллоо. Б.Чагнаадорж захиралтай “Дарханы төмөрлөгийн үйлдвэр” 2025 онд түүхэн дээд амжилт тогтоож, 72,6 тэрбум төгрөгийн ашигтай ажилласан. Өнгөрсөн онд татварт 82,1 тэрбум төгрөг төлөхөөр төлөвлөсөн. Төлсөн нь 246,6 тэрбум болсон байна. Энэ нь Дарханы төмөрлөгийн үйлдвэрийн 33 жилийн туршид нийт 407,8 тэрбум төгрөгийн татвар төлсөнөөс 60 орчим хувийг зөвхөн 2025 онд  бүрдүүлжээ. Өнгөрсөн онд 551,6 тэрбум төгрөгийн орлоготой ажиллахаар төлөвлөсөн нь 593,1 тэрбум болж, 42 тэрбумаар давж биелсэн.

Б.Чагнаадоржийг 2024 оны 7-р сард захирлаар томилогдоход “Дарханы төмөрлөгийн үйлдвэр” ХХК-ийн 1634 ажилтан дунджаар 3,2 сая төгрөгийн цалинтай байсан бол өнөөдөр 6,8 сая төгрөг болж өсжээ. 

“Эрдэнэс Монгол” нэгдлийн 31 компани, төслийн нэгжийн үйл ажиллагааны үр дүнгээр “Дарханы төмөрлөгийн үйлдвэр” 95,6 оноо авч тэргүүлсэн. “Эрдэнэс Тавантолгой” ХК-ийн ТУЗ-ийн эдгээр үр дүнг харгалзан тооцож, Б.Чагнаадоржийг гүйцэтгэх захирлаар сэлгэн томилсон байна. Б.Чагнаадорж нь “Эрдэнэс Монгол”, “Монросцветмет” компанид ажиллаж байсан юм.