Шакира 2026 оны хөлбөмбөгийн ДАШТ-ий нээлт дээр орлон тоглогч ашигласан уу?

www.euronews.com

Цахим ертөнцийн хэрэглэгчид Шакираг энэ удаагийн хөлбөмбөгийн ДАШТ-ий үеэр орлон тоглогчтой байсан хэмээн шуугисан байна. Энэхүү цуурхал хэр зэрэг үнэний ортойг тодруулахын тулд бид бичлэгийг дахин нягталж үзлээ.

6-р сарын 11-ний Пүрэв гаригт Мехико хотноо 2026 оны Хөлбөмбөгийн ДАШТ-ий нээлтийн сүр жавхлант ёслолын ажиллагаа эхэлсэн билээ. Тус тайзнаа Жэй Балвин (J Balvin), Мана (Maná), Лила Даунс (Lila Downs) болон мэдээж Шакира зэрэг одод гарч дуулсан бөгөөд Колумб гаралтай тус дуучин өдгөө өөрийн экс нөхөр Жерар Пикегээс ч олон удаа ДАШТ-ий “талбай” дээр гарсан амжилтыг үзүүлээд байна.

Гэвч цахим орчинд хүмүүсийн анхаарлыг хамгийн их татсан зүйл нь оргилуун салют ч биш, дуу хөгжим ч байсангүй.

Шоу дууссанаас хэдхэн цагийн дараа тус тэмцээний албан ёсны сүлд дуу болох "Dai Dai"-г дуулсан хүн үнэндээ Колумбын нэрт дуучин биш байсан гэх яриа олон нийтийн сүлжээгээр эрчтэй тархаж эхлэв. Нэгэн хэрэглэгч бүр: -"Энэ бол Шакира биш ээ. ‘Dai Dai...’ гэж дуулахдаа тэр яаж хөдөлгөөнөө алдаж байгааг нь хараарай. Энэ бол орлон тоглогч байна. Шакира биднийг хуурчихлаа" хэмээн бичжээ.

Цуурхлыг дэвэргэж буй хүмүүсийн үзэж байгаагаар поп одын гадаад төрх ердийнхөөсөө өөр байсан гэнэ.

Шакира талбай дээр тод шар өнгийн цамц, цагаан шорт, өндөр ултай пүүз өмсөж, нүүрэндээ аварга том бараан нарны шил зүүн гүйж гарч ирсэн юм. Мөн олон дагагчид нь түүний үсний өнгө ердийнхөөсөө арай өөр туяатай харагдаж байсныг онцолжээ. Нүүрнийх нь тодорхой хэсэг том шилний цаагуур нуугдсан, мөн шүтэн бишрэгчдийнх нь дассан дүр төрхөөс бага зэрэг өөр байсан зэрэг нь Х (хуучнаар Твиттер), ТикТок болон бусад платформ дээр цуурхал хурдацтай газар авахад хүргэв. Хэдхэн цагийн дотор интернет ертөнц түүнийг үнэхээр Шакира байсан уу, эсвэл орлон тоглогч байв уу гэдэг дээр маргаж эхэлжээ.

Одоогоор дуучны баг хамт олон энэхүү цуурхалд ямар нэгэн албан ёсны хариу өгөөгүй байна. Гэсэн хэдий ч талбай дээр гарч ирсэн хүн үнэхээр Шакира өөрөө байсан гэдгийг батлах нэгэн шинж тэмдэг бий.

Нэрт дуучны олон жилийн турш авхуулсан гэрэл зургуудад нь тод харагддаг духан дээрх жижиг сорви байдаг. Жишээлбэл 2026 оны 5-р сард Нью-Йорк хотноо болсон нэгэн арга хэмжээний үеэр "Associated Press" агентлагийн авсан зургуудаас үүнийг тодорхой харж болно. Тэгвэл яг энэхүү өвөрмөц сорви нь ДАШТ-ий нээлтийн ёслолын гэрэл зургуудад ч мөн адил үлдсэн байв.

Мэдээж хэрэг, нөгөөх цуурхалд дурдагдаад буй орлон тоглогч нь сая үзэгчид болон өндөр нягтралтай олон арван камерыг мэхлэхийн тулд Шакирагийн хөдөлгөөн бүрийг хэдэн сарын турш судалж, бүжиг болон үсний засалтыг нь дуурайж, бүр нүүрэн дээрх өчүүхэн жижиг сорвийг нь хүртэл ижилхэн зурж бэлдсэн байх нь онолын хувьд боломжтой.

Эсвэл тэр хүн нь ердөө л Шакира өөрөө байсан байж таарна.

Бид лав хоёр дахь хувилбарыг нь үнэн гэдэгт итгэлтэй байна. Тэгээд ч, түүний гуалиг ташаа хэзээ ч худал хэлдэггүй шүү дээ (Those hips don’t lie).