Н.Номтойбаярын зөвлөх асан МИАТ-ийн гүйцэтгэх захиралд горилж байна

Г.Занданшатарын Засгийн газар төрийн өмчит компаниудад реформ хийхээ зарласан. Үр ашиггүй, алдагдалтай ажилладаг төрийн өмчийг цөөлөх, олон нийтийн хяналт оруулж ирэх, IPO хийх зэргээр өөрчлөлт хийхээ зарласан. Энэ хүрээнд зарим төрийн өмчит компанийн удирдлагыг өөрчлөхөөр болжээ. Засгийн газрын хуралдаанаас компаниа алдагдалтай ажиллуулсан гэх үндэслэлээр МИАТ-ийн гүйцэтгэх захирал Б.Мөнхтамирт хариуцлага тооцож, үүрэгт ажлаас нь чөлөөлөх чиглэлийг Төлөөлөн удирдах зөвлөлд нь өгсөн. Б.Мөнхтамир нь МАН дахь Харвард бүлэглэлийнх. УИХ-ын дарга асан Д.Амарбаясгалан, Ерөнхий сайд асан Л.Оюун-Эрдэнэ болон МАН-ын нарийн бичгийн дарга Н.Энхбаатар нартай АНУ-д хамт суралцаж байсан гэдэг.

Түүнтэй холбоотой хууль бус асуудлууд олон байгаа, тиймээс “Эрчим Монгол” компанийн зүгээс МИАТ-т олон улсын аудит оруулах шаардлагатай гэсэн санал гаргасан байна.

Түүний оронд Н.Тэлмэнийг томилуулахаар АТГ-т материалыг нь хүргүүлсэн гэх албан бус мэдээлэл бий. Н.Тэлмэн нь УИХ-ын гишүүн, Үндэсний эвслийн тэргүүн Н.Номтойбаярыг Хөдөлмөр, нийгмийн хамгааллын сайд байх үед зөвлөхөөр нь ажиллаж байсан нэгэн. Мөн “МАК” компанид ажиллаж байсан гэх хувийн намтартай. Тэрбээр өдгөө Монголбанкны хяналтын зөвлөлийн гишүүнээр ажилладаг аж.

Г.Занданшатарын Засгийн газрыг огцруулахаар идэвхийлэн зүтгэж явсан Н.Номтойбаяр гэнэт чимээгүй болсон нь зөвлөхөө МИАТ-ийн гүйцэтгэх захирал болгохоор тохирсон байхыг үгүйсгэхгүй.

Дашрамд дурдахад, УИХ-ын гишүүн Н.Номтойбаяр сонгуулийн өмнө “Женко, Л.Оюун-Эрдэнэ нартай тэмцэнэ” гэсэн түүний байр суурь өдгөө зуун хувь өөрчлөгдсөн болохоо өнгөрсөн өдрүүдийн МАН-ын зодооноор харуулсан, таниулсан байдаг.