Meta, Google-г донтуулагч нөлөөтэй гэж Калифорнийн шүүх үзлээ

Калифорни мужийн шүүхийн энэ шийдвэр нь АНУ-ын шүүхийн практикт шинэ жишиг тогтоож байна.

Олон нийтийн сүлжээ эдүгээ хүмүүсийн өдөр тутмын хэрэглээ болсон, хүн өглөө сэрээд цайгаа уухаасаа ч өмнө гар утсаа шүүрэн авч сошиал хаягаараа зочилдог болсон нь бодит байдал. Яг донтсон мэт.

Тэгвэл эдгээр сошиал сүлжээ хүнд үнэхээр донтуулах нөлөө үзүүлдэг үү гэдэгт хариу өгсөн шүүх хурал өчигдөр АНУ-д боллоо. Эдүгээ 20 настай Кэйли Meta болон YouTube-ийн эсрэг зарга үүсгэсэн бөгөөд тэрбээр эдгээр компанийн платформууд нь өөрсдийн бүтээгдэхүүнээс хүний хамааралтай болгож, донтуулдаг, энэ байдал түүний сэтгэхүйд нөлөөлсөн гэж үзэн зарга мэдүүлэн нөхөн төлбөр шаардсан юм.

Шүүхийн шийдвэрээр Meta компанийн Instagram, Facebook, WhatsApp платформууд, мөн Google-ийн YouTube платформ нь зориудаар өөрийн бүтээгдэхүүнээс хамааралтай байхаар алгоритм ажиллуулж, улмаар нэхэмжлэгч 20 настай эмэгтэй сэтгэхүйд сөргөөр нөлөөлсөн гэж үзлээ. Нөхөн төлбөрийн хэмжээг $3 сая гэж шүүх тогтоолоо.

Meta болон Google шүүхийн шийдвэртэй санал нийлэхгүй гэдгээ мэдэгдээд давж заалдах болно гэлээ. Meta компанийн өмгөөлөгчид нэхэмжлэгч Кейли бага насандаа хүнд амьдралыг туулсан нь сэтгэхүйн байдлынх шалтгаан болсон болохоос бага наснаасаа сошиал суваг ашигласан нь шалтгаан биш гэсэн тайлбарыг хийсэн байна. “Бид шүүхийн шийдвэрийг хүндэлж байна, гэхдээ бид шүүхийн шийдвэртэй санал нийлэхгүй байна, эрх зүйн хувьд цаашид авах алхмуудынхаа талаар бид ярилцаж байна” хэмээн Meta-гийн өмгөөлөгч шүүхийн шийдвэрийн дараа мэдэгджээ.

Харин Google-ийн өмгөөлөгч “Бид шүүхийн шийдвэртэй санал нийлэхгүй байгаа учраас давж заалдана. Энэ хэрэг дээр YouTube зорилго, утга учрыг буруугаар тайлбарлаж байна, энэ бол сошиал сүлжээ биш, YouTube бол видео бичлэгийг дамжуулдаг платформ” хэмээн байр сууриа илэрхийлжээ.

Шүүгчид энэ хэргийн нэхэмжлэгчид учирсан хохирлын 70%-ийн бурууг Meta, 30%-ийг YouTube хариуцах ёстой гэж үзсэн байна. Энэ нь нэхэмжлэгч Кейлид төлөх нөхөн төлбөр юм. Харин хоёр компанид ногдох торгуулийн хэмжээг шүүх дараа тогтоох бөгөөд зарга үүсгэсэн Калифорни мужийн хуулийн заалтаар авч үзвэл торгуулийн хэмжээ $30 сая хүрч болохоор байгаа юм.

Калифорни мужийн шүүхийн энэ шийдвэр нь АНУ-ын шүүхийн практикт шинэ жишиг тогтоож байна. Бага насны хүүхдүүдэд үзүүлж буй сошиал сүлжээний сөрөг нөлөөллийн талаар сүүлийн жилүүдэд маш их ярьж байгаа бөгөөд энэ жишгийн дараа шүүхэд очих зарга эрс нэмэгдэх нь тодорхой болоод байна.