Х.Нямбаатарын шилжүүлсэн ₮500 тэрбумын баталгааг гаргах даатгалын компани Монголд байхгүй

Нийслэлийн Засаг дарга Х.Нямбаатар “Туулын хурдны зам” төслийн гүйцэтгэгч “ХаоЮань групп”-т ₮500 тэрбум гаруйг шилжүүлснээ “Банкны баталгаа, олон улсын давхар даатгалын дагуу бид нар шахаж байгаад ₮500 тэрбумыг өгсөн. Олон улсын FIDIC silver book-р энэ гэрээг хийсэн. Бидний шилжүүлж байгаа мөнгө банкны баталгаатай юм уу, нөгөө тал үүргээ биелүүлээгүй бол олон улсын даатгал өгөх учраас энэ жил дахиад мөнгө өгнө” гэж тайлбарласан.

Гэвч УИХ-ын гишүүн Х.Ганхуяг “Даатгалын бичгээр урьдчилгаа шилжүүлсэн асуудал гарч ирсэн. Монголд ₮500 тэрбумын үнэ бүхий даатгал хийх ямар ч компани байхгүй” гэж хотын дарга Х.Нямбаатарын мэдээллийг үгүйсгэсэн.

Тэгвэл УИХ-ын гишүүн Б.Мөнхсоёл Санхүүгийн зохицуулах хороонд “Туулын хурдны зам” төслийн урьдчилгаа төлбөрийн баталгаа нь эрх зүйн чадамжтай эсэх талаар асуулга тавьжээ.

Санхүүгийн зохицуулах хорооноос “Мөнх даатгал” ХХК нь 500 тэрбум төгрөгийн тендерийн баталгаа гаргах боломжгүй. Хорооноос энэ асуудлаар хяналт шалгалт хийж байна” гэх хариу өгсөн байна.

Хотын дарга Х.Нямбаатар “Том төслийг хэрхэн яаж явуулах вэ” гэдэг бестселлер номыг уншсан гэж ирээд ярьсан ч түүний үг бүр нь үгүйсгэгдэж байгааг харвал уншсанаа бодит мэтээр төсөөлж яваа бололтой. “Худалч хүний нээрээ олон” гэгчээр мөнгө мөртэй учраас хэчнээн сайн ярилаа ч баригдаад байна.