Хаалттай хурлын нээлттэй тэмдэглэл: "АБ" бүлэг Ерөнхий сайдыг налжээ

МАН-ын бүлэг хуралдаж, Ерөнхий сайд Н.Учрал оролцжээ. Тэрбээр намын бүлгийнхэндээ махны үнийн эсрэг авах арга хэмжээ болон Үндсэн хуульд заасан бүрэн эрхийн хүрээнд Х.Нямбаатарыг огцруулсан шийдвэрээ болон Оюутолгойн хэлэлцээрийн талаар, тэтгэврийн тогтолцоод реформ хийх, мөн бусад том төслүүдийн хэрэгжилтийг танилцуулсан байна.

Бүлгийн хуралдааны үеэр А.Ариунзаяа, Ж.Чинбүрэн, Зулпхар, Х.Ганхуяг, Д.Рэгдэл, Г.Дамдинням нар үг хэлж, Х.Нямбаатарын бүдүүлэг ааш авир хэрээс хэтэрснийг буруутгажээ. Бүлгийн гишүүд хотын дарга зөв, соёлтой, хүн байх ёстойг хэлж, төр төмбөгөр, ёс ёмбогор байхыг бүгд сануулсан гэнэ.

Тэр тусмаа МАН-ын бүлэг дэх "АБ" фракц Ерөнхий сайдад илэрхий налсан маягтай үг хэлцгээсэн байна.

Том төсөл сонсоход гоё ч ямар үнэ өртөг, үр ашигтай вэ гэдэг нь хамгийн чухал. Гэхдээ том төсөл болгон том боломж авчирдаггүй. Зарим нь том хулгай, том луйвар болж байгааг МАН-ын бүлэг онцлон ярьсан аж. Мөн өнгөрсөн оны 10, 11-р сард түлшний үнэ хэвийн байхад нөөцийн махаа бэлтгэлгүй, тендерт шалгарсан гэх Х.Баттулгын хамаарал бүхий компаниуд ард иргэдийн аягатай хоолны махыг булаасанд Х.Нямбаатар буруутай гэх байр суурийг МАН-ын бүлгийн гишүүд хэлсэн байна.

Үндсэндээ, МАН-ын бүлгийн олонх нь Х.Нямбаатартай хариуцлага тооцсон Ерөнхий сайдын шийдвэрийг дэмжжээ.

Б.БАТ