Г.Уянга: НЗДТГ-аас нэр бүхий тролл иргэдийг цалинжуулж байсан гэв

Нийгмийн сэтгэл судлаач Г.Уянга хотын дарга асан Х.Нямбаатартай холбоотой асуудлаар дөрөв дэх өдрөө мэдээлэл хийлээ. Тэрбэр хотын дарга Х.Нямбаатар нэр бүхий сэтгүүлчдийг амыг хаах зорилгоор хууль бусаар газар олгосон байж болзошгүй баримтыг дэлгэсэн. Мөн үндэслэлгүй хөрөнгөжсөн байж болзошгүй гэх мэдээллийг өгч, баримтуудыг АТГ болон ЦЕГ-ын Мөрдөн байцаах газарт өгч шалгуулахаар болжээ.  Мөн хотын даргаар Х.Нямбаатарыг ажиллаж байх үед НЗДТГ-ын Олон нийттэй харилцах хэлтэс нь дэргэдээ 14 хүнтэй тролл арми ажиллуулж, татвар төлөгчдийн мөнгөөр цалинжуулж байсан гэх ноцтой баримтыг дэлгэлээ.

Г.Уянга хэлэхдээ “Хатан Туулаа хамгаална гэж гурван сараас хойш талбай дээр жагсах үеэр Ялгуунаа, Лхагва-Очир, Соёлоо гэх мэт тролл хаягнаас гэр бүл болон үр хүүхэд, өөрийнх нь амь насанд үргэлж заналхийлдэг байсан. Тэдгээр тролл баг нь НЗДТГ-ын байрны 3-4 давхарт, "Нэгдсэн төв" гэх нэгж доор байрлаж,  иргэд, олон нийтийн сүлжээ хариуцсан ажилтан нэрээр бусдыг заналхийлж, гутаан доромжилж ирсэн. Нийтдээ 14 хүний бүрэлдэхүүнтэй ажиллаж байсан. Тэд татвар төлөгч бидний мөнгөөр цалинждаг байсан гэх сэжүүр байна. Эдгээр хүмүүс нь Халиун, Баярсүрэн, Халиун.М, Ганчимэг, Мөнх-Өлзий, Одгэрэл, Нандин-Эрдэнэ, Оргил, Энхцэцэг, Балжинням, Оюунгэрэл, Тэмүүлэн, М.Тэмүүлэн гэдэг нэртэй. Тэднийг шалгуулахаар цагдаад хандаж байна” гэв.