Дэлхийн ардчилагчид Вашингтонд чуулж байна

Олон улсын ардчилсан холбооны хурал АНУ-ын Вашингтон хотноо энэ сарын 2-4 өдөр болж байна. Уг хурал жилд хоёр удаа болдог агаад энэ удаагийн хуралд Монголыг төлөөлж, цөөнгүй хүн оролцож байна.

Уг хуралд Монгол Улсын Ерөнхийлөгч асан, Олон улсын ардчилсан холбооны дэд ерөнхийлөгч Ц.Элбэгдорж илтгэгчээр оролцож буй аж. Тэгвэл зочин оролцогчоор АН-ын дарга О.Цогтгэрэл, УИХ-ын гишүүн Д.Ганбат, А.Ганбаатар, МоАХ-ны дарга Д.Монголхүү нар тус хуралд оролцож байна

АН болон МоАХ нь Дэлхийн ардчилсан холбоо болон Олон улсын ардчилсан холбооны гишүүн аж. Дэлхийн ардчилсан холбоо нь баруун төвийн үзэлтэй, эрх чөлөөний төлөөх намуудыг нэгтгэсэн хамгийн хүчирхэг байгууллага юм байна. Тус байгууллагад Монгол Улс, Ардчилсан нам, МоАХ 1993 оноос гишүүнчлэлтэй болж, тасралтгүй 30 гаруй жилдээ идэвхтэй ажиллаж байгаа юм. Энэ байгуулагыг 1980-аад оны эхээр Рейган, Тэтчэр, Коль, Накасонэ, эцэг Буш зэрэг баруун төвийн үзлийн домогт манлайлагчид үүсгэн байгуулсан гэдэг.

Дашрамд сонирхуулахад, Ардчилсан нам, Олон улсын ардчилсан холбоо /IDU/ хамтран “Монгол Улс-Ардчиллын баян” сэдэвт олон улсын бага хурлыг өнгөрсөн онд Улаанбаатарт зохион байгуулсан. IDU нь Монгол дахь ардчилсан хөгжлийн үйл явцад доголдол үүсч, ардчилсан өөрчлөлт шинэчлэлийн өмнөх ололт амжилтаасаа ухарсан, нэг хүн, эсвэл цөөнхийн ноёрхол давамгайлсан авторитар чиг хандлагууд ажиглагдах болсонд  зохих ёсоор анхаарал хандуулж, холбогдох тогтоол гарган дэлхийн олон нийтэд хандсан уриалга гаргаж байсан удаатай.

Монголд өнөөдөр улаан хөх өнгөнөөс илүү намуудад үзэл бодлын ялгарал явагдаж байгаа нь нэг талаасаа зүй ёсны үзэгдэл. Нөгөө талаасаа Монголын улс төр зарчим, үнэт зүйлээрээ ялгарч байгаа нь сайны дохио юм.