Баялгийн луйврыг таслан зогсоох нь Б.Энхбаярын гол ажил

Эрх мэдэл бүхий хүмүүс өргөн цар хүрээтэй схемээр улс орныг тонон дээрэмдэж байсныг "Нүүрсний сонсгол" ил болгосон.

УИХ-ын гишүүн Баттөмөрийн Энхбаяр 2025 оны аравдугаар сарын 24-ний өдөр Хууль зүй, дотоод хэргийн сайдын үүрэгт ажилдаа орлоо. Ерөнхий сайд Г.Занданшатар Монгол Улсын Үндсэн хууль, Засгийн газрын тухай хуульд заасан бүрэн эрхийнхээ хүрээнд УИХ-ын гишүүн Б.Энхбаярыг Монгол Улсын Засгийн газрын гишүүн, Хууль зүй, дотоод хэргийн сайдаар томилж байгаагаа мэдэгдсэнээр хойш ийнхүү 24 хоногийн дараа Б.Энхбаяр сайдын ажлаа хүлээж авлаа.

Хууль зүй, дотоод хэргийн сайдад нэр дэвшигч Б.Энхбаяр өмнөх УИХ-ын үед буюу 2023 оны арванхоёрдугаар сард зохион байгуулсан “Нүүрсний сонсгол”-оор эрх мэдэл бүхий хүмүүс өргөн цар хүрээтэй схемээр улс орныг тонон дээрэмдэж байсныг илчилсэн.

Сайдад нэр дэвшигчийн УИХ-ын нэгдсэн чуулганд танилцуулах үеэр Б.Энхбаяр “намайг сайдаар томилогдсоныхоо маргааш Төрийн ордноос хэн нэгнийг бариад явчих байх гэж хүмүүс бодож байх шиг байна, энэ бол гэмт хэрэг мөрдөн шалгах байгууллагын ажил, би улс төрийн манлайллаа илэрхийлнэ” хэмээн гол зорилгоо илэрхийлсэн.

Түүний хэлснээр нэн тэргүүнд хийх ажлууд нь Гэр бүлийн тухай хуулийн төслийг санаачлахаас гадна Төрийн болон албаны нууцын тухай хуулийн шинэчилсэн найруулгыг төслийг боловсруулан, төрийн нууцад юуг оруулах вэ гэдгийг Засгийн газар бус УИХ шийддэг байх зохицуулалтыг хуульчилна гэлээ.