Астана Төв Азийн хот төлөвлөлтийн жишиг болов

Казахстаны нийслэл Астана хот Хүртээмжтэй аялал жуулчлалын Европын сүлжээ (ENAT)-нд гишүүнээр элсэж, хотын хөгжлийн түүхэндээ шинэ хуудас нээлээ. Ингэснээр тус хот нь Тусгаар улсуудын хамтын нөхөрлөлийн (ТУХН) орнуудаас Европт төвтэй платформд нэгдсэн анхны хот болж байна. Энэхүү үйл явдал нь Астана хот аялал жуулчлал болон хот төлөвлөлтдөө хүртээмжтэй байдлыг хөгжлийн гол чиг болгон хэрэгжүүлж байгааг илтгэж байна.

ENAT нь Европ даяар хялбар аялал жуулчлал болон бүх хүнд хүртээмжтэй орчныг дэмждэг хамтын ажиллагааны сүлжээ юм. Тус байгууллагын гишүүн болох нь тухайн хот хөгжлийн бэрхшээлтэй иргэд, өндөр настан болон хөдөлгөөний хязгаарлагдмал хүмүүст зориулсан дэд бүтэц, үйлчилгээний олон улсын стандартыг хангаж байгааг хүлээн зөвшөөрсөн хэрэг юм.

Астана хотын нийтийн тээврийн парк шинэчлэгдэж, автобуснуудын дийлэнх нь налуу зам болон нам шалтай болсон байна. Мөн ажилтнууд хүртээмжтэй харилцааны сургалтад тогтмол хамрагдах болжээ.

Музей болон урлагийн байгууламжууд физик орчноос гадна мэдрэхүйн хүртээмжийг нэмэгдүүлсэн байна. Тухайлбал, аудио тайлбар, хүртэлцэх үзмэр, харааны чиглүүлэгч зэргийг нэвтрүүлснээр хүн бүр соёл урлагийг саадгүй мэдрэх боломж бүрджээ.

Астана нь хөгжлийн бэрхшээлтэй иргэдийнхээ бодит хэрэгцээнд тулгуурлан хот төлөвлөлтөө хийж байгаа нь аялал жуулчлалыг татах ая таатай орчныг давхар бүрдүүлж байна.

ENAT-д элссэнээр Астана хот олон улсын шилдэг туршлагаас суралцах, техник туслалцаа авах болон шинэлэг шийдлүүдийг хамтран хэрэгжүүлэх боломжтой болж байна. Энэ нь зөвхөн хөгжлийн бэрхшээлтэй иргэд гэлтгүй, хүүхэдтэй гэр бүлүүд, өндөр настнууд зэрэг бүх хүнд аюулгүй, тухтай хотыг бий болгоход чиглэжээ.

Астанагийн энэхүү амжилт нь эцсийн цэг биш бөгөөд эдийн засгийн өсөлтийг нийгмийн дэвшилтэй хослуулсан, хүн төвтэй, ирээдүйд бэлэн хот болох урт хугацааны өөрчлөлтийнх нь эхлэл юм.

www.travelandtourworld.com

Г.СҮХ