Жензичүүд миллениалуудаас илүү орлоготой!

1990-ээд оны сүүлээр төрсөн 24 настай ажилчид 1950-иад оныхоос хойших аль ч үеийнхнээс илүү өндөр цалин авч байна.

The Guardian

Судалгаанаас үзэхэд Z үеийнхний (Gen Z) ажлын гараа миллениал үеийнхнээс илүү санхүүгийн өгөөжтэй байна. Түүнчлэн, "Resolution Foundation" судалгааны төвийн мэдээлснээр 1997-2012 оны хооронд төрсөн залуусын цалин хөлс эргэн сэргэж байгаа нь өмнөх үеийнхний хөдөлмөрийн зах зээлд хөл тавьж байсан үетэй эрс ялгаатай дүр зураг юм.

1980-аад оны эхнээс 1990-ээд оны дунд үе хүртэлх хугацаанд төрсөн миллениалууд нь өмнөх үеийнхнээсээ илүү өндөр хуримтлал, орлоготой байж чадаагүй анхны үе болсныг тус байгууллага тэмдэглэжээ. Энэхүү ухралт нь тэдний ажлын гараа 2008 оны дэлхийн санхүүгийн хямралын үетэй давхацсан, мөн түүнээс хойш бодит цалингийн өсөлт урт хугацаанд зогсонги байсантай холбоотой аж.

Гэвч Пүрэв гаригт танилцуулах тайлангийн урьдчилсан мэдээллээр 1990-ээд оны сүүлээр төрсөн залуусын 24 насан дээрх бодит долоо хоногийн цалин 1980-аад оны сүүлээр төрсөн үеийнхнээс 12%-иар өндөр гарчээ. Мөн 2000-аад оны эхээр төрсөн 24 настнууд 1950-иад оныхоос хойших аль ч үеийнхнээс илүү өндөр орлого олж байна.

Resolution Foundation"-ий ахлах эдийн засагч Чарли МакКурди “Миллениал үеийнхний амьжиргааны түвшний зогсонги байдлыг сүүлийн арав гаруй жил хангалттай судалсан. Олон хүн энэхүү ухралт Z үеийнхэнд ч үргэлжилнэ гэж таамаглаж байв. Гэвч Z үеийнхний хамгийн ахмадууд хэдийн хөдөлмөрийн зах зээлд хөл тавьж, цалингийн мини-сэргэлтийг мэдэрч байгаа нь сайн мэдээ юм” гэжээ.

Судалгаагаар хамгийн бага цалинтай (доод 10%-ийн) ажилчдын орлого хөдөлмөрийн хөлсний доод хэмжээ нэмэгдсэнтэй (ялангуяа 2016 оноос хойш) холбоотойгоор хамгийн их өссөн байна. Түүнчлэн, тэдний бодит цалин 2012-2025 оны хооронд 36%-иар өсчээ. Цалингийн шатлалын дунд хэсэгт байгаа 22-29 насны ажилчдын цагийн цалин тухайн хугацаанд 15%-иар өссөн нь 30 гаруй насныхны 4%, нийт ажилчдын 11%-ийн өсөлттэй харьцуулахад өндөр байна.

Гэсэн хэдий ч судлаачид Z үеийнхний энэхүү таатай үе хэдийн аюулд ороод байгааг анхааруулав. Ойрхи Дорнод дахь дайны улмаас үнэ өсч, эдийн засгийн өсөлт суларч байгаа нь бодит цалинг бууруулж болзошгүй юм.

Мөн хөдөлмөр эрхлээгүй, сургууль болон сургалтад хамрагдаагүй (Neet) 16-24 насны залуусын тоо 1 саяд хүрчээ. Хөдөлмөрийн намын сайд асан Алан Милбурн өнгөрсөн сард Засгийн газраас яаралтай арга хэмжээ авахгүй бол 2030-аад оны эхэн үе гэхэд энэ тоо 25%-иар өсч, 1.25 саяд хүрч, “алдагдсан үе” бий болох эрсдэлтэйг анхааруулсан юм.

“Z үеийнхний нэлээд хэсгийнх нь карьер огт эхлээгүй байна. Британийн Neet (ажилгүй, сургуульгүй залуусын) хямрал нь Z үеийнхний хувьд урт хугацааны томоохон сорилт бөгөөд үүнийг шийдвэрлэх нь Засгийн газрын нэн тэргүүний зорилт байх ёстой” гэж тус сан нэмж дурджээ.