Украины энхийн гэрээ: Трампын эсрэг тавьж буй Европын төлөвлөгөө

Украинд энхийг тогтоох Трампын төлөвлөгөөний эсрэг Украин болон Европ өөрийн хувилбараа санал болголоо.

Өчигдөр (2025.11.23) Женев хотноо Украин-Европын болон АНУ-ын төлөөлөгчид уулзсан. Трампын санал болгосон 28 зүйлт төлөвлөгөөний зарим заалтыг Европ хүлээн зөвшөөрөхгүй байгаа юм. Тухайлбал, газар нутгийн хуваарилалт, Украины зэвсэгт хүчний тоог хязгаарласан байдал зэрэг. Хамгийн хүлээн зөвшөөрч чадахгүй зүйл нь Оросын царцаасан хөрөнгийг ОХУ-АНУ хоёр хамтран ашиглаж, аль аль тал нь ашиг унагахаар байгаа заалт юм. Мөн ОХУ Европ руу халдахгүй гэдэгт тэд огт итгэхгүй байгаа юм, учир нь, Путин аль хэдийнэ энэ амлалтаа эвдчихсэн гэж тэд үзэж байгаа.

Женевийн уулзалтаар Украин болон Европын зүгээс дараах өөрчлөлтүүдийг санал болгож байгаа тухай Reuters мэдээлсэн. Үүнд,

Нэгд, Украины цэргийн хүчний тоог 800 мянгаар хязгаарлах, Трамп 600 мянгыг санал болгосон,

Хоёрт, Украин НАТО- элсэх эсэх нь эвслийн гишүүдийн консенсусээр шийдэгдэнэ,

Гуравт, НАТО-гийн сөнөөгч онгоцууд Польшид байршина,

Дөрөвт, НАТО-гийн дүрмийн 5-д заасан аюулгүйн баталгааг АНУ Украинд өгнө

Тавд, энхийн цагт НАТО-гийн цэрэг Украинд байршихгүй

Зургаад, ОХУ Украинд учруулсан хохирлоо барагдуултал Оросын царцаасан хөрөнгө цоожлогдсон хэвээр байна, Оросын царцаасан хөрөнгөнөөс Украин санхүүгийн нөхөн төлбөр авна

Долоод, энхийн гэрээ зурагдсаны дараа Украин аль болох богино хугацаанд сонгууль явуулна, Трампын гэрээнд 100 хоног гэж заасан,

Наймд, зэвсгийн хүчээр эзэлж авсан газар нутгаа Украин буцаан авахгүй, газар нутгийн хэлэлцээг одоогийн байгаа байлдааны шугамыг бодолцон явуулна.

Харин үүний дараа The Telegraph Трампын 28 зүйлт төлөвлөгөөний эсрэг Европынхон 24 зүйлт төлөвлөгөөг санал болголоо гээд бүрэн эхээр нь нийтэллээ.

Украин-Европын төлөвлөгөө

1.Зөрчил шийдэгдсэний дараа найдвартай энх тайван, аюулгүй байдлыг хангах арга хэмжээнүүдийг авна,

2.ОХУ болон Украин агаар, газар, тэнгист гал зогсоох үүрэг хүлээнэ,

3.Москва болон Киев хяналт тавих гуравдагч улсын оролцоотойгоор гал зогсоох хэлэлцээг нэн даруй эхлүүлнэ,

4.Гал зогсоох шийдвэрийн хяналтыг АНУ-ын удирдлагаар Украины холбоотнууд хийнэ, хяналтыг гол төлөв зайнаас, хиймэл дагуул, нисгэгчгүй төхөөрөмж болон бусад хэрэгслийг ашиглан хийнэ,

5.Гал зогоох шийдвэрийн аливаа зөрчлийг тайлагнах механизмыг бүрдүүлж, нөхцөл байдлыг засч залруулах арга хэмжээг хэлэлцэнэ,

6.ОХУ украин хүүхдүүдийг бүгдийг буцаан өгөх бөгөөд энэ үйл явцыг олон улсын түншүүд хянана,

7.”Бүгдийг” гэсэн томъёоллоор Москва болон Киев цэргийн олзлогдогсдыг солилцоно, мөн Москва саатуулаад байгаа Украины бүх энгийн иргэнийг чөлөөлнө,

8.Газар нутгийн хуваарилалтын асуудлаарх хэлэлцээр одоо байгаа байлдааны шугамыг бодолцон явуулна,

9.Гал зогсоон зөрчилдөөн намжин тогтворжсоны дараа хүмүүнлэгийн арга хэмжээнүүдийг авч эхэлнэ, үүнд галын шугамаар хязгаарлагдсан гэр бүл харилцан бие биедээ очих асуудал багтана,

10.Украины тусгаар байдлыг нотолно, хэн ч Киевийг нейтрал байр суурь баримтлахыг хүчлэхгүй,

11.НАТО-гийн дүрмийн 5-д заасан аюулгүйн баталгааг АНУ Украинд өгнө (НАТО-гийн дүрмийн 5-д хамтын хамгаалалтын талаар заасан байдаг. Эвслийн гишүүн аль нэг, эсвэл хэд хэдэн орон руу зэвсэгт халдлага болбол үүнийг эвслийн бүх орон руу халдсан гэж үзнэ. Энэ тохиолдолд эвслийн гишүүн улс НҮБ-ын дүрмийн 51-д заасны дагуу өөрийгөө хамгаалах эрхтэй, халдлагад өртсөн талд тусламж үзүүлнэ, үүнд, зэвсгийн хүч ашиглах эрхтэй),

12.Украины цэргийн хүч болон батлан хамгаалах үйлдвэрлэлд ямар ч хязгаарлалт тогтоохгүй,

13.Европын бүлэг улс, мөн сонирхлоо илэрхийлсэн улс Украины аюулгүй байдлын баталгаа болно, Украин өөрийн газар нутаг дээр холбоотны хүчээ байршуулах эрхтэй,

14.НАТО-гийн эвслийн бүх гишүүн зөвшөөрсөн нөхцөлд Украин НАТО-д элсэх боломжтой,

15.Украин Европын холбоонд элсэнэ,

16.Украин цөмийн зэвсэггүй улс хэвээр үлдэхэд бэлэн, мөн Цөмийн зэвсгийг үл дэлгэрүүлэх гэрээг сахин мөрдөнө

17.Гал бүрэн зогссоны дараа ОХУ-тай газар нутгийн асуудлыг хэлэлцэнэ,

18.Газар нутгийн асуудлыг ОХУ, Украин хоёр харилцан тохиролцсоны дараа газар нутгийн эзэмшлийг хүчээр өөрчлөхгүй гэдэгт харилцан үүрэг хүлээнэ,

19.Запорожийн цөмийн станц болон Каховын усан цахилгаан станцын хяналтаа Украин АНУ-ын тусламжтайгаар сэргээнэ, хяналтыг Украинд шилжүүлэх механизмыг бүрдүүлнэ,

20.Днепр мөрөн болон Кинбурнийн үзүүрээр чөлөөтэй зорчих эрхийг Киев эдэлнэ

21.Киев болон түүний түншүүд эдийн засгийн хамтын ажиллагааг ямар нэг хязгаарлалтгүйгээр хэрэгжүүлнэ,

22.ОХУ Украинд учруулсан хохирлоо барагдуултал Оросын царцаасан хөрөнгө цоожлогдсон хэвээр байна, Оросын царцаасан хөрөнгөнөөс Украин санхүүгийн нөхөн төлбөр авна,

23.Тогтвортой энх цаг тогтсоны дараа ОХУ-ын эсрэг авсан хориг арга хэмжээг аажмаар сулруулна, энхийн гэрээг зөрчсөн тохиолдолд эргэн сэргээнэ,

24.Европын Аюулгүй байдал, хамтын ажиллагааны байгууллагын бүх гишүүн орныг ороцуулан Европын аюулгүй байдлын хэлэлцээрийг эхлүүлнэ.