Үхрийн махны үнэ Улаанбаатарт сүүлийн 2 жилд 50-78%-иар өсчээ

Үндэсний статистикийн хороо 2026 оны 8-р сарын дүн мэдээгээ гаргасан байна. Хэрэглээний бараа, үйлчилгээний үнэ 2026 оны 8-р сард улсын хэмжээнд өмнөх оны мөн үеэс 12.5%-иар, өмнөх сараас 1.1 хувиар тус тус өссөн байна.

Өмнөх оны мөн үетэй харьцуулахад улсын хэмжээнд барааны бүлгийн үнэ 13.0%, үйлчилгээний бүлгийн үнэ 10.9%, хүнсний бүлгийн үнэ 21.5%, хүнсний бус бүлгийн үнэ 9.1%-иар тус тус өссөн байна.

Инфляцын түвшин 2025 оны 8-р сард 8.8% байсан бол 2026 оны 8-р сард 12.5% болж, өсөлтийн хурдац өмнөх оны мөн үеэс 3.7 нэгж хувиар өссөн байна.

Улсын инфляцад бензин, түлшнээс бусад импортын барааны үнэ 2.0 нэгж хувиар (16.0%), мах, хатуу түлшнээс бусад дотоодын барааны үнэ 4.4 нэгж хувиар (35.0%) тус тус нөлөөлсөн байна.

Инфляцын түвшин 2026 оны 8-р сард улсын хэмжээнд 12.5% гарсны 5.8 (46.9%) нэгж хувь нь хүнсний бараа, ундаа, усны бүлэг, 1.7 (13.3%) нэгж хувь нь тээврийн бүлэг, 1.2 (9.2%) нэгж хувь нь боловсролын үйлчилгээний бүлэг, 0.9 (7.6%) нэгж хувь нь хувцас, бөс бараа, гутлын бүлгийн үнийн өсөлтөөс голлон шалтгаалжээ.

Хэрэглээний бараа, үйлчилгээний үнэ Улаанбаатар хотод 8-р сард өмнөх сараас 0.8%-иар, өмнөх оны мөн үеэс 11.6%-иар тус өсчээ.

Улаанбаатар хотын инфляцын түвшин буюу хэрэглээний бараа, үйлчилгээний үнийн индекс 2025 оны 8-р сард 9.8% байсан бол 2026 оны 8-р сард 11.6% болж, өсөлтийн хурдац өмнөх оны мөн үеэс 1.8 нэгж хувиар өссөн байна.

Улаанбаатар хотын инфляцад бензин, түлшнээс бусад импортын барааны үнэ 1.4 нэгж хувиар (11.7%), мах, хатуу түлшнээс бусад дотоодын барааны үнэ 4.6 нэгж хувиар (40.0%) тус тус нөлөөлсөн байна.

Улаанбаатар хотод 2026 оны 8 дугаар сард хэрэглээний сагсны 418 нэрийн бараа, үйлчилгээнээс 148 (35.4%) бараа, үйлчилгээний үнэ өмнөх сараас өсөж, 22 (5.3%) бараа, үйлчилгээний үнэ буурч, 248 (59.3%) бараа, үйлчилгээний үнэ өөрчлөлтгүй байна.

Улаанбаатар хотод худалдаалагдаж буй үхрийн цул 1 кг махны дундаж үнэ 2026 оны 8 дугаар сард 36521 төгрөг болж, 2024 оны 8 дугаар сараас 78.8 хувиар, 2025 оны 8 дугаар сараас 50.7 хувиар тус тус өсөж, өмнөх сараас 4.6 хувиар (1772 төгрөгөөр) буурсан байна.

1-р зэргийн гурилын дундаж үнэ 2026 оны 8 дугаар сард 2522 төгрөг болж, 2024 оны 8 дугаар сараас 3.5 хувиар, 2025 оны 8 дугаар сараас 4.2 хувиар, өмнөх сараас 0.1 хувиар (1 төгрөгөөр) тус тус өссөн байна.

Нэг литр АИ-92 бензиний дундаж үнэ 2026 оны 8 дугаар сард 2958 төгрөг болж, 2024 оны 8 дугаар сараас 23.8 хувиар, 2025 оны 8 дугаар сараас 14.2 хувиар, өмнөх сараас 4.2 хувиар (118 төгрөгөөр) тус тус өссөн байна.

Орон нутгийг авч үзэхэд бүх аймагт бараа, үйлчилгээний үнэ 8-р сард өмнөх оны мөн үеэс 9.4-17.5%-иар өссөн байна. Сүхбаатар аймагт 9.4%-иар өссөн нь хамгийн бага, Увс, Сэлэнгэ аймагт 17.5%-иар өссөн нь хамгийн өндөр байна.