“Ухаа худаг” уурхайн өгөөжийн 70 орчим хувийг улс, олон нийт хүртэж байна

Жил бүрийн тавдугаар сарын хоёр дахь долоо хоногийг “Татвар төлөгчдийн өдрүүд” болгон зохион байгуулдаг. Монголын татварын алба 27 дахь жилдээ “ХЭРЭГЦЭЭНД ҮНДЭСЛЭСЭН ЗӨВЛӨГЧ ТАТВАРЫН АЛБА” уриан дор орон даяар зохион байгуулж байна. Энэ хүрээнд Монгол Улсын Үндсэн хуулиар хүлээсэн үүргээ нэр төртэй биелүүлж шударгаар татвараа төлсөн шилдэг татвар төлөгчдөд шагнал гардуулах ёслол хүндэтгэлийн арга хэмжээ Төрийн ордонд боллоо. Энэ үеэр Ерөнхий сайд Н.Учрал “Хөлс хүч, хөдөлмөр зүтгэлээ шингээн татвар төлж, Монгол Улсын хөгжил дэвшлийн хөдөлгөгч хүч нь болсон Та бүхэндээ энэ өдрийн мэнд дэвшүүлье. Та бүхэн бол монгол хүнд хийх ажил, авах цалин олгогчид, Монгол Улсын эдийн засгийн тулгуур багана, Монголын хөгжлийн хөдөлгүүр юм.Төсвийн мөнгө гэж үгүй. Татвар төлөгч Та бүхний мөнгө л бий. Та бүхний төлсөн татвараар улсын төсөв бүрдэж, эмч, багш, төрийн албан хаагчдад цалин хөлс олгож, эмнэлэг, сургууль, цэцэрлэг барьж, зам, дэд бүтэц бүтээн байгуулдаг. Энх цагийн хамгийн эх оронч үйл хэрэг бол татвар төлж, хөгжил дэвшилд хувь нэмрээ оруулж, ирээдүйг өнөөдөр бүтээлцэж буй иргэний өндөр үүрэг хариуцлага юм” гэв.

Монголын топ 10 татвар төлөгчдийн нэгээр жил бүр тодордог “Энержи ресурс” 2025 онд групп компанийн хэмжээнд 512 тэрбум төгрөгийн татвар, хураамж, шимтгэл улсын төсөвт оруулжээ.

Тавантолгойн бүлэг ордын 4%-д үйл ажиллагаа явуулдаг “Энержи Ресурс” ХХК 17 жил татвар төлж байгаагаас 15 жилд нь шилдэг татвар төлөгчийн жагсаалтад багтаж байна. Тус компани өнгөрсөн жил групп компанийн хэмжээнд орлогын албан татвар, борлуулалтаас шууд төлдөг АМНАТ, агаар, ус, газрын лицензийн төлбөр гээд нийт 16 төрлийн татвар, хураамж, шимтгэлд 512 тэрбум төгрөг төлжээ.

Дээрх олон төрлийн татвараас гадна ажиллагсдын цалин, тэтгэлэг, захиргааны гээд "нүдэнд харагддагүй" олон зардлыг аж ахуйн нэгжүүд үүрч явдаг.

Татварын төрлүүдийг задлаж харвал:

• Аж ахуйн нэгжийн орлогын албан татвар

• Ашигт малтмалын нөөц ашигласны татвар

• Эрүүл мэнд, нийгмийн даатгалын шимтгэл

• Суутган татварууд 

• Хувь хүний орлогын албан татвар

• Импортын гаалийн татвар

• Экспортын гаалийн хураамж 

• Агаарын бохирдлын төлбөр

• Үл хөдлөх хөрөнгө эзэмшсэний татвар 

• Усны төлбөр

• Нэмүү өртөг ашигласан татвар

• Газрын төлбөр

• Авто татвар

• Уурхайн лицензийн төлбөр

• Экспортын гаалийн мэдүүлэг

• Бусад татвар, хураамж

Түүнчлэн сум, орон нутгийн бүтээн байгуулалтад “Энержи Ресурс” ХХК  $1тэрбумын хөрөнгө оруулалт хийжээ.