Туулын хурдны замын мөнгө Л.Оюун-Эрдэнийн худын халаасанд орсон эсэхийг шалгах ёстой!

Байгаль орчин, уур амьсгалын өөрчлөлтийн сайд Ц.Сандаг-Очир Туулын хурдны замын ажлыг үргэлжлүүлэх зөвшөөрөл олгожээ. Үүний цаана мэдээж, хэн нэгний тушаал, даалгавар байсан нь нэн ойлгомжтой.

Байгаль орчны үнэлгээ дутуу хийгдсэн гэж үүнээс 14 хоногийн өмнө Ц.Сандаг-Очир Туулын хурдны замын төслийг түр зогсоох шийдвэр гаргаж байв. Гэвч үнэндээ энэ нь Х.Нямбаатарыг нийслэлийн Засаг даргаас нь огцруулахгүй гэсэн арга заль байлаа. Туулын хурдны замыг эсэргүүцэж буй иргэд нийслэлийн Засаг дарга Х.Нямбаатарыг огцруулахыг шаардаж, төв талбай дээр 20 гаруй хоног жагсаж байгаа юм.

Эрдэмтэн судлаачид, мэргэжлийн байгууллагаас Туулын хурдны зам нь байгаль экологид болон эдийн засагт асар хохирол дагуулахыг баримт судалгаан дээр үндэслэн тайлбарлах болсон. Гэсэн хэдий ч хотын дарга Х.Нямбаатар улайран зүтгэх болсны ард авлига, хулгай байх магадал асар өндөр байгаа юм. Л.Оюун-Эрдэнэ Ерөнхий сайд байхдаа Туулын хурдны замыг эсэргүүцсэн иргэдэд захиргаадалтын арга хэмжээ авна гэж сүрдүүлж байсан билээ. Тэгвэл Л.Оюун-Эрдэнэ, Х.Нямбаатар нар ямар учраас Туулын хурдны замыг тавихын тулд “амиа ч хайрлахгүй” аашлах болов гэх асуулт тавигдана. Хотын дарга Х.Нямбаатар хорооны ахмадуудтай жагсахдаа “Намайг алчихаад Туулын хурдны замыг зогсоогоорой” гэсэн нь олон хардлага дагуулсан.

Х.Нямбаатар ингэж галзуурах болсон шалтгаан нь үнэндээ Туулын хурдны замын төслийг хэрэгжүүлэхээр нийслэлийн төсвийн мөнгөнөөс ₮500 тэрбумыг урьдчилаад өгсөн компани нь олон нийтийн сүлжээнд гарсан баримтуудаас хөөвөл Л.Оюун-Эрдэнийн худ Ч.Өгөөдэйбаатартай ч нэр холбогдож байна.

Төслийг хэрэгжүүлэх БНХАУ-ын хөрөнгө оруулалттай “ХаоЮань групп” нь нэрээ олон янзаар бичих болсон. Энэ нь магадгүй иргэдийн анхаарлыг сарниулах “гөлөг төөрүүлэх” гэсэн хурган заль байх магадлалтай юм. Хятадын хөрөнгө оруулалттай гэх “Хаоюань женерал констракшн” нь УБЕГ-т “China Hyway group limited” нэрээр бүртгүүлсэн.  “China Hyway group limited” компанийн Монгол талын хамтрагч нь УБТЗ-ын орлогч Хоржавын Амгалан аж. Тодруулбал, “China Hyway group limited “компанийн 70% -ийг эзэмшигч нь “Хуваймонголиа” ХХК. “Хуваймонголиа” ХХК-ийг 30%-ийг Х.Амгалан эзэмшдэг аж.

Х.Амгалангийн бизнесийн гол хамтрагч нь Ц.Эрдэнэбилэг гэж хүн байдаг. Ц.Эрдэнэбилэг нь УИХ-ын гишүүн Л.Оюун-Эрдэнийн худ Ч.Өгөөдэйбаатартай халаас нэгтэй. Гэх мэтээр хөөвөл Ч.Өгөөдэйбаатарын ард дахь цаад эзэн нь УИХ-ын гишүүн Л.Оюун-Эрдэнэ, хотын дарга Х.Нямбаатар нар байх хардлага өндөр. Тэгэхээр Туулын хурдны замын мөнгө Л.Оюун-Эрдэнийн худын халаасанд орсон уу гэдгийг хууль, хүчнийхэн шалгах ёстой юм!

Б.БАТ