SOS: Дэлхий дахин дизель түлшний хомсдолд орох эрсдэл нүүрлэж байна

Дэлхийн томоохон газрын тосны компаниуд болох Shell, ExxonMobil, Chevron компаниуд дизель түлшний дэлхийн нийлүүлэлт ойрын саруудад хүндрэх эрсдэлтэй байгааг анхаарууллаа.

Тэдний мэдээлснээр асуудал нь түүхий газрын тосны хомсдол биш, харин түүнийг бензин, дизель түлш болгон боловсруулах үйлдвэрийн хүчин чадал хүрэлцэхгүй байгаа явдал аж.

Дизель түлш нь зөвхөн автомашины түлш биш. Уул уурхай, хөдөө аж ахуй, барилга, ачаа тээвэр, төмөр зам, усан тээвэр зэрэг эдийн засгийн гол салбаруудын үйл ажиллагаа дизель түлшнээс шууд хамаардаг. Иймээс нийлүүлэлт доголдвол олон салбарын үйл ажиллагаанд сөргөөр нөлөөлөх эрсдэлтэй.

Шинжээчдийн үзэж буйгаар дэлхийн газрын тос боловсруулах үйлдвэрүүд одоогоор маш өндөр ачаалалтай ажиллаж байна. Гэвч намрын улиралд төлөвлөгөөт засварууд эхлэх тул үйлдвэрлэл түр буурч болзошгүй байна.

Мөн намар ургац хураалтын ажил, өвлийн бэлтгэл зэрэгтэй холбоотойгоор дизель түлшний эрэлт улам өсөх төлөвтэй. Үүн дээр Ойрхи Дорнодын геополитикийн хурцадмал байдал, Украины дайны нөлөө зэрэг хүчин зүйлс давхцсанаар нийлүүлэлтийн дарамт нэмэгдэх эрсдэлтэй гэж шинжээчид үзжээ.

Үүнээс гадна зах зээлийн үнийн огцом савлагааг сааруулж ирсэн стратегийн болон арилжааны түлшний нөөцүүд багасч байгаа нь нөхцөл байдлыг улам хүндрүүлж болзошгүй байна.

Хэрэв дизель түлшний нийлүүлэлт цаашид хумигдвал тээврийн зардал өсөх, үйлдвэрлэл саарах, нийлүүлэлтийн сүлжээ доголдох, өргөн хэрэглээний барааны үнэ нэмэгдэх, улмаар инфляц дахин эрчимжих эрсдэл үүсэхийг салбарын шинжээчид анхааруулж байна.

Б.БАТ