OpenAI-ийн эрсдэлтэй алхам: IPO-ын өмнөх бүдрэлт, санхүүгийн савлагаа ба дотоод зөрчил

Сара Фриар, OpenAI-ийн санхүүгийн захирал

Хиймэл оюун ухааны салбарт цахиур хагалж буй OpenAI компани энэ оны сүүлээр олон нийтэд хувьцаагаа гаргахаар (IPO) яаравчилж байгаа ч, дотооддоо орлого болон хэрэглэгчийн өсөлтийн зорилтдоо хүрч чадалгүй томоохон саадтай тулгараад байна. Тус компанийн Санхүү эрхэлсэн захирал (CFO) Сара Фриар болон Төлөөлөн удирдах зөвлөлийн гишүүд өсөлт саарч байгаа энэ үед дата төвүүдэд асар их хөрөнгө зарцуулах нь хэр оновчтой эсэхэд эргэлзэж эхэлжээ.

OpenAI-ийн санхүүгийн байдал сүүлийн саруудад удирдлагуудын дунд маргаан дагуулах болов. Компанийн CFO Сара Фриар орлого хангалттай хурдан өсөхгүй бол ирээдүйн тооцоолон бодох хүчин чадлын гэрээний төлбөрүүдийг төлж чадахгүйд хүрэх вий гэх айдсаа бусад удирдлагууддаа илэрхийлсэн байна.

Гүйцэтгэх захирал Сэм Олтмен олон жилийн турш "тооцоолон бодох хүчин чадлын хомсдол бол өсөлтийн гол чөдөр" гэж үзэн, дата төвүүдэд тэрбум тэрбумаар нь хөрөнгө хаяж ирсэн. Тэрээр өнгөрсөн жил л гэхэд ирээдүйд 600 тэрбум орчим ам.долларын зардал гаргах амлалт бүхий хэд хэдэн томоохон хэлцэл хийсэн юм. Гэвч бизнесийн өсөлт саарч эхэлсэн нь ТУЗ-ийн зүгээс Олтмений энэхүү "юу ч хамаагүй худалдаж авах" стратегид хяналт тогтооход хүргэжээ.

OpenAI-ийн гүйцэтгэх захирал Сэм Олтмен

Хэдийгээр Олтмен болон Фриар нар хамтарсан мэдэгдэлдээ "Бид тооцоолон бодох хүчин чадлыг нэмэгдүүлэх тал дээр бүрэн санал нэгтэй байгаа" гэж няцаасан ч, бодит байдал дээр зардлаа хянах гэсэн санхүүгийн багийнхан болон хязгааргүй тэлэхийг хүсэгч Гүйцэтгэх захирлын хооронд ан цав үүссэнийг эх сурвалжууд баталж байна.

ChatGPT-ийн ялагдашгүй мэт харагдаж байсан амжилт өнгөрсөн оны сүүлээс эхлэн саарчээ. OpenAI-ийн дотоод төлөвлөгөөнд ChatGPT-ийн долоо хоног тутмын идэвхтэй хэрэглэгчдийн тоог өнгөрсөн оны эцэс гэхэд 1 тэрбумд хүргэх зорилт тавьсан ч үүнийгээ биелүүлж чадаагүй байна.

Үүнээс гадна:

• Google Gemini-ийн дайралт: Google-ийн Gemini загвар эрчээ авснаар OpenAI-ийн зах зээлийн эзлэх хувиас "хумсалж", жилийн орлогын төлөвлөгөөг тасалдуулахад нөлөөлжээ.

• Anthropic-ийн нөлөө: Код бичих болон байгууллагын (enterprise) зах зээлд Anthropic компани илүү хүчирхэгжсэнээр OpenAI сарын орлогын зорилтуудаа хэд хэдэн удаа зөрчсөн байна.

• Хэрэглэгчдийн шилжилт: Төлбөртэй хэрэглэгчдийн дунд үйлчилгээнээс татгалзах (churn rate) үзэгдэл нэмэгдэж байгаа нь хөрөнгө оруулагчдыг түгшээж эхлэв.

Силикон хөндийн түүхэнд байгаагүй хамгийн том санхүүжилт болох 122 тэрбум ам.долларыг OpenAI саяхан босгож чадсан. Гэвч энэ их мөнгө ч хангалтгүй байж магадгүй юм. Тус компанийн тооцоолж буйгаар, хэрэв орлого амбицтай төлөвлөгөөний дагуу өсөхгүй бол энэхүү санхүүжилтийг ирэх гурван жилийн дотор дата төвийн зардалд "шатааж" дуусгахаар байна.

Үүнтэй холбоотойгоор компани зарим төслүүдээ танаж эхэлжээ. Жишээлбэл, видео үүсгэгч Sora апп-ийн зардлыг танаж, оронд нь хэрэглэгчдийн дунд эрэлт ихтэй байгаа Codex код бичих хэрэгсэл болон шинээр гарсан GPT-5.5 загвартаа илүү ач холбогдол өгч байна.

Сара Фриар компанийг энэ оны эцэс гэхэд олон нийтэд нээлттэй компани болоход бэлэн биш байна гэж үзэж байна. Олон улсын тайлагналын хатуу стандартыг хангахын тулд дотоод хяналтаа сайжруулах шаардлагатайг тэрээр анхааруулсан. Харин Сэм Олтмен илүү түрэмгий хугацааг (энэ оны сүүл) дэмжиж байгаа юм.

IPO хийхэд санхүүгээс гадна өөр хэд хэдэн том тээг байна:

Удирдлагын хоосон орон зай: Компанийн хоёрдугаар хүн болох Фижи Симо эрүүл мэндийн шалтгаанаар гэнэт чөлөө авсан нь удирдлагын багт цохилт болов.

Элон Маскын шүүх хурал: Элон Маск Сэм Олтменийг албан тушаалаас нь огцруулах, OpenAI-ийг ашгийн төлөөх бүтэц рүү шилжсэнийг цуцлах тухай нэхэмжлэл гаргаж, шүүх хурал энэ долоо хоногт эхэллээ.

OpenAI одоо нэг талаас хиймэл оюун ухааны салбарт ноёрхлоо хадгалахын тулд асар их зардал гаргах, нөгөө талаас бодит ашиг орлогоо нэмэгдүүлж, IPO-д бэлтгэх гэсэн хоёр галын дунд байна. Хэрэв тэд дата төвийн зардлаа өсөлттэйгөө уялдуулж чадахгүй бол "Силикон хөндийн түүхэн дэх хамгийн үнэтэй туршилт" болон үлдэх эрсдэлтэй юм.

Anthropic-ийн Гүйцэтгэх захирал Дарио Амодейн хэлсэнчлэн, зарим компаниуд дата төвийн зардалд "эрсдэлийн хэмжүүрээ хэт өндөр тавьсан" нь сахилга батгүй байдал уу, эсвэл алсын хараа юу гэдгийг цаг хугацаа харуулах биз ээ.