Нүүрсний мөнгөөр АН-ыг авлах ажиллагаа эхлэв?!

Боохой борооноор гэж ярьдаг. Энэ нь муу хүмүүс бусдын сиймхийг ашигладаг гэсэн утгатай. Яг ийм үйл явдал Ардчилсан намд өнөөдөр өрнөж байна.

Ордны хэрүүл түр завсарласан, улстөрчид хөдөө, гадаадын томилолттой байх хойгуур Ардчилсан намын Ерөнхий нарийн бичгийн дарга(асан) Н.Ганибал намынхаа дунд шатны байгууллагын дарга нартай цахим уулзалт хийж, гишүүдийн бүртгэл мэдээллийг 1 дүгээр сарын 16-ны өдрийн 17:00 цагаас  өмнө албан бичгээр болон info@an.mn и-мэйл хаягаар ирүүлэхийг үүрэг болгожээ. Пэйж хуудсандаа тавьсан мэдээнээс харахад энгийн л нэг зар. Авчиг, үүний ард Ардчилсан намын дотоод сонгуулийн зодоон аль хэдийнэ эхэлснийг илтгэнэ.

Ардчилсан намын хуучин Үндсэн дүрмийн гуравдугаар бүлгийн 3.2.3 дахь заалтад төв байгууллага нь жил бүрийн 2 дугаар сарын 1-ний дотор гишүүдийн шинэчилсэн бүртгэл, шилжилт хөдөлгөөн, татвар төлөлтийн тайланг нэгтгэн намын мэдээллийн системд оруулна гэж заасан бий. Гэхдээ энэ дүрмийн дагуу үйл ажиллагаа явуулах боломжгүй.

Улс төрийн намын тухай хуульд намууд 2025 оны арванхоёрдугаар сарын 31-нээс өмнө Үндсэн дүрэм, бүтэц, бүрэлдэхүүндээ өөрчлөлт хийнэ гэж зааж өгсөн. Хуулийн заасан хугацаанд Ардчилсан нам дүрмээ шинэчлэн боловсруулж, УДШ-д хүргүүлжээ. Ирэх долоо хоногийн Даваа гаригт Ардчилсан намын шинэчилсэн дүрмийг УДШ хэлэлцэх товтой байгаа аж.

УДШ-ийн шийдвэрийн дараа Улс төрийн намын тухай хууль, Үндсэн шинэ дүрэмд нийцүүлэн намын дотоод сонгуулийг бүх шатны байгууллагын хүрээнд зохион байгуулах учиртай. Үүнийг хамгийн сайн мэдэж байгаа атлаа Н.Ганибал яаран сандран дотоод сонгуулийн хугацааг наашлуулсан нь мэдэн будилсных уу, мэдсээр байж даргаа эсэргүүцсэнийх үү?!

Намын дарга О.Цогтгэрэлийн зүгээс ирэх гуравдугаар сарын 1-н хүртэл гишүүдийн шинэчилсэн бүртгэл явагдана гэх мэдээллийг гишүүддээ өгсөн байна.

Шинэ дүрмийг бүртгэж авснаар Н.Ганибал Ерөнхий нарийн бичгийн албан тушаалаасаа автоматаар огцорно. Намын Үндсэн дүрэмд зааснаар О.Цогтгэрэл түүний орны хүнийг оруулж ирж, ҮБХ-нд танилцуулах ёстой.

Атал дүрмийн дагуу огцрохоосоо өмнө дүрмийн бусаар бүртгэл, шинэчлэлт хийж буйн ард асар том эрх ашгийн бүлэглэл байна. Товчхондоо, Монголын хамгийн баян, бяртай нүүрсний бүлэглэл Ардчилсан намыг авлах ажиллагаагаа эхлүүлжээ гэсэн үг.

Н.Ганибал нь “Нэг Монгол” фракцынх. УИХ-ын сонгуулийн дараа, зүүн бүсэд өрсөлдөн, ялагдал хүлээсэн түүнийг Л.Гантөмөр Ерөнхий нарийн бичгийн даргаар томилсон нь Э.Одбаярын “шахаа” байсан гэх мэдээлэл ч тухайн үед цацагдаж байв. Тэр мөртлөө сонгуульд “өвдөг шороодсон” хүнээр намын гал тогоог бариулах нь буруу гэх шүүмжлэл гарч байлаа. Түүний өмнө эл албан тушаалыг УИХ-ын гишүүн Э.Одбаяр хашиж байсан билээ.

УИХ-ын гишүүн Э.Одбаярын намтарыг сөхвөл С.Эрдэнийг Ардчилсан намын даргаар ажиллаж байх үед Хэрэг эрхлэх газрын дарга нь байсан. Энэ үедээ Ардчилсан намаас мөнгө завшсан гэх асуудалд орж, хууль, шүүхэд шалгагдаж явсан байдаг.

Намдаа, намын гишүүд дундаа тэрбээр нэр хүндтэй нэгэн биш. Намын жагсаалтаар УИХ-ын гишүүн болсон түүнийг Засгийн газар сайд болохын тулд намаа зарсан гэж Ардчилсан намын жирийн гишүүд одоог хүртэл буруутгадаг. Л.Оюун-Эрдэнийн хамтарсан Засгийн газрын үед Монгол Улсын сайд, Хяналт, үнэлгээний Үндэсний хорооны даргаар ажиллаж байсан билээ.

УИХ-ын 2024 оны сонгуулийн үеэр Ардчилсан намын нэр дэвшүүлэх үйл явцыг будилаантуулсан гол эздээр Ц.Туваан, Э.Одбаяр нарыг нэрлэх хүмүүс ч бий. Хоржоонтой нь, тэд өнөөдөр Ардчилсан намын шинэчлэлт, дотоод сонгуулийг будилаантуулах ажилдаа идэвхийлэн орцгоосон бололтой.

Б.БАТ